Wat Jesus Show John 16

Hawai‘i Pidgin

Da Seven Bowl Show Dat God No Take Da Bad Kine Stuff

16 Den jalike one dream, I hear one loud voice from da Real Real Spesho Place dat tell da seven angel messenja guys, “Dis da seven bowl dat show dat God stay huhu, an no take da bad kine stuff da peopo inside da world stay doing. Take um, an go pour da stuff inside um on top da earth.”

² Da first angel guy wen go an pour out da stuff from his bowl on top da earth. Den da peopo dat get da Wild Animalʼs mark on top dem an dat go down an pray to his statue, dey get bad kine sore dat come out all ova dem an hurt real bad.

³ Da numba two angel guy wen pour out da stuff from his bowl on top da ocean, an wen make um jalike da blood from one mahke guy. Den all da tings dat stay alive inside da ocean wen mahke.

⁴ Da numba three angel guy wen pour out da stuff from his bowl on top all da river an puka wea water come out, an dey wen come blood too. ⁵ Den I wen hear da angel guy dat stay in charge a da water tell,

⁷ Den I hear one voice from da altar say,

⁸ Da numba four angel guy wen pour out da stuff from his bowl on top da sun. Den God wen give power to da sun fo burn da peopo wit fire. ⁹ Dey wen get burn plenny cuz da sun so hot. Dey talk stink bout God, cuz he get da power fo make all dis kine trouble come on top dem. But still yet, dey no like change an come sorry fo da bad kine stuff dey do, an dey no like talk good bout God.

¹⁰ Da numba five angel guy wen pour out da stuff from his bowl on top da Wild Animalʼs throne. An every place da Wild Animal stay king, wen come real dark. Den peopo ova dea bite dea tongue cuz dey suffa real bad. ¹¹ Dey talk stink bout God in da sky cuz dey stay suffa an get bad kine sores all ova dem, but dey no like change an come sorry fo da bad kine stuff dey do.

¹² Da numba six angel guy wen pour out da stuff from his bowl on top da big Eufrates River, an all da water wen come dry up, fo make ready da way fo da kings from da east fo come.

¹³ Den jalike one dream, I wen see three bad kine spirits wen look jalike frogs. One wen come outa da dragonʼs mout, one outa da Wild Animalʼs mout, an one outa da mout a da guy dat say he talk fo God, but he bulai. ¹⁴ Dose bad kine spirits do all kine awesome stuff fo show dea power. Dey go out an get all da kings in da whole world fo bring dem togedda fo fight on da Big Day. Dass da time wen da God Dat Get All Da Power goin come fo judge everybody.

¹⁵ Da Boss say, “Look! I goin come quick, jalike one steala guy! Whoeva stay awake, an get dea clotheses wit dem, dey no goin come shame cuz dey naked. But dey goin stay good inside.”

¹⁶ Den da bad kine spirits bring da kings togedda inside one place da Jews call “Armageddon,” dea language.

¹⁷ Den da numba seven angel guy wen pour out da stuff from his bowl in da air. An one loud voice wen come from da throne inside da Real Real Spesho Place an say, “Dass all. Everyting pau.” ¹⁸ Den get big lightning, plenny noise, big thunder, an da earth stay shake so hard -- neva had dat kine big shaking befo, wen peopo stay on top da earth, till now. ¹⁹ Babylon, da mos importan big town, wen split an come three. An da big towns fo da diffren peopos all ova da world wen get wipe out. God wen come huhu wit da peopo inside Babylon, da big town. He make um suffa real bad, cuz he no take da bad kine stuff da peopo ova dea stay do. He make to dem jalike wen one guy make anodda guy drink too much real strong wine, fo make um come real drunk.

²⁰ All da islands an all da mountains wen fall down! ²¹ Den real big kine ice storm wen come down from da sky jalike rain. Every piece ice weigh bout 75 pounds, an dey fall down on top da peopo! Den da peopo wen talk stink bout God cuz a da ice, cuz was so bad.