Add parallel Print Page Options

Shitajkwilu ipal ne tanawatiani ipal ne sennemit tik Sardis:

"Ini tay ina ne kipia ne chikume nawal ipal Teut wan ne chikume sital: Nikishmati ne mutejtekiw. Inat ka taja tiyultuk, wan taja miktuk. Shipewa tikishpelwia wan shikmaka ifuerzaj ne tay nakat wan yawit mikit, ika inte nikita ka ne mutejtekiw yekajtiwit tik itachialis ne nuTeut. Shikelnamiki tel ken tikwij wan titakakik, wan shitajpia wan shimuyulpata, ka asu inte tikishpelwia niaw niwitz ken se techtekini wan te tikmati tay horaj niaw niajsi mutech. Melka uni, tikpia ankakeski tik Sardis ne inte kisusulwijtiwit ne inkwajkwach wan nejnemisket nuwan tik istak ika yejyek. Ne welituk ijkiuni yawi mutakentia tik ikwajkwach istak, wan te niaw nikishtia ne itukay tik ne amat yultuk, wan niaw nina ka yek ne itukay tik itachialis ne nuteku wan tik itachialis ne itajtanawatiani. Ká ne kipia takakilis, ma takaki tay kinhilwia ne Ijiutzin ne sejsennemit."

Shitajkwilu ipal ne tanawatiani ipal ne sennemit tik Piladelpia:

"Ini tay ina ne ipal Teut, ne yekkaya, ne kipia ne itepus Dawid, ne tatentapua wan te aka weli kitentzakwa, wan tatentzakwa wan te aka weli kitentapua: Nikishmati ne mutejtekiw. Ashan niktalijtuk muishpan se tentzakka tapujtuk ne inte aka yawi weli kitzakwa, ika tikpia chiupi mutajpal wan titajpishki ne nupalabraj wan te inak ka inte ne nutukay. Ashan niaw nimetzmaka sejse ipal ne isennemit ne Tenewani, ne inat ka yejemet Yudayujmet wan inte tejkia, yejemet inat sanka; ashan niaw nikchiwa ma wikikan mutankwaketzat ishpan mujmukshi wan ma kimatikan ka naja nimetztasujta; 10 ika titejchishki nejnejmach ken ninak, wan naja nusan niaw nikchiwa se mupal, niaw nimetzishtilia ne horaj ipal taejekulis ne yawi ajsi ipal muchi ne tajtal kinhejekua ne chanejket ipal ne tal. 11 Niaw niwitz nemanha. Shikitzki ne tay tikpia pal te aka yawi kikwi ne muyawal. 12 Ne welituk niaw nikchiwa se taketzal tik ne iteupantzin ne Teut, wan intea yawi kisa tatenpan, wan niaw nitajkwilua ijpak ne itukay ne nuTeut wan ne itukay ne itechan ne nuTeut, ne yankwik Yerushalem, ne kutemutuk tik ne ilwikak itech ne nuTeut, wan ne nutukay yankwik. 13 Ká ne kipia takakilis, ma takaki tay ne kinhilwia ne Ijiutzin ne sejsennemit."

14 Shitajkwilu ipal ne tanawatiani ipal ne sennemit tik Laodikea:

"Ini tay ina ne Amen, ne tanutzki yek wan ina tejkia ne iwan pejki muchi tay kichijki ne Teut. 15 Nikishmati ne mutejtekiw, ka taja nian tisesek nian titutunik. Niknekiskia ma shisesek o ma shitutunik. 16 Ijkiuni, ika nian tisesek nian titutunik asunte tiyamanka, niaw nimetzisuta tik ne nuten, 17 ika tina: 'Nikpia wey, wan wey nutumin, wan te nimuneki tatka', wan te tikmati ka tajasan ne ká nechkukua nuyulu wan tamaka lastimaj wan te kipia tatka wan pupuyut wan petznaj. 18 Naja nimetzilwia ma shinechkuili teukwit tatatuk tik tit pal tikpia, wan mukwajkwach istak pal timutzakwa wan te timuilwitia wan tishpinawa ipanpa ne mupetztikayu, wan ma shikmawalti ne mujmuish iwan ishpajti pal tiweli titachia. 19 Muchi ká nikintasujta naja nikinhajwa wan nikinhiskalia; shikishpelwi tel wan shimuyulpata. 20 Nikan ninemi itech ne tentzakka niktujtunwia. Asu aka nechkaki wan kitapua, niaw nikalaki ka ichan wan niaw sentakwa iwan wan yaja nuwan. 21 Ne welituk niaw nikajkawa mutalia nunawak tik nukuijpal, ken naja nusan niwelik wan nimutalijtuk inawak ne nuteku tik ne ikuijpal. 22 Ká ne kipia takakilis, ma takaki tay kinhilwia ne Ijiutzin ne sejsennemit."