Add parallel Print Page Options

Nuk ocx tuˈn t‑xtalbil Dios jiquen koˈ twitzxin

Cxeˈltzen nkbaˈna tey ti tten tuˈn cyten ocslal cyxol kej xjal yaaˈn ocslal. Kbanx cyexin tuˈn toc cybiˈnxin tley gobierno bix tuˈn cynimanxin tyol cykil cawel ncawen cyibajxin tuj tnom. Xnakˈtzanx cyexin tuˈn tbint cyuˈnxin alcyej akˈuntl baˈn tuˈn tbint cyuˈnxin, bix tuya cykil cycˈuˈjxin. Bix xnakˈtzanx cyexin tuˈn miˈn chi xooˈnxin kaˈ yol tiˈ juntl, bix tuˈn miˈn chi kˈojxin cyuya xjal. Nuk oˈcx tuˈn cyyeecˈanxin cynaablxin baˈn cywitz xjal, bix tuˈn cyyolenxin maans cyuya xjal.

Tumelte tuˈn cyyeecˈanxin cynaablxin baˈn cywitz xjal yaaˈn ocslal, cuma nejl, jax juˈx ejooˈ min el kniyˈ tiˈj. Min oc kbiˈn Dios. Bix e xiˈ lpey koˈ nuk tiˈj ẍtakˈ xnakˈtzbil. E ten koˈ tjakˈ tcawbil kxumlal, bix nuk kaˈ e tajbe kxumlal. Ex kkˈij nuk nko binchan jyaaˈn baˈn, bix nuk e chiˈl kcˈuˈj. Oc ten koˈ cyakwusalte ke xjal, bix el kiiqˈuen kiib kxolx. Pero amale nimet kaˈ e bint kuˈn, pero e tzaj tyeecˈan Dios, Clol ke, tkˈakˈbil tcˈuˈj kiˈj. Oc kakˈ texin, bix e coˈpaxin ke tuj kil. Pero yaaˈn tuˈnj jun kchunkˈlal jiquen ma ko clet, sino nuk oˈcx cuma e tzaj kˈontexin lastim ke. Ma ko clet nuk tuˈnj ttxjontexin kanem, bix tej ttxjet nuk tuˈnj, e kiikˈ jun acˈaj kchunkˈlal bix jun acˈaj knaabl tuˈn Espíritu Santo. Tuya cykil tcˈuˈjxin bix tuˈn Jesucristo, Clol ke, e cuˈtz tkˈoˈnxin Espíritu Santo ke. Tuˈn tzunj t‑xtalbilxin, jiquen koˈ twitzxin, bix attzen koclen tuˈn kpon tuyaxin te junx maj. Tiˈj tzunj kkab nko ayon tiˈj.

Jaxxix taˈ jma txiˈ nkbaˈna, bix baˈn tuˈn toc ke kcˈuˈj tiˈj. Kˈumenx tuya tipemala, tuˈntzen t‑xiˈ cykˈon cyiibxin tiˈj tuˈn cybinchanxin baˈn te juntl.

Baˈnxsen kej xnakˈtzbil lu, bix at cˈajbela cye xjal. Pero cawenx kej ocslal tuˈn miˈn chi kˈojl cyiˈj xnakˈtzbil min chi ajben. Miˈn chi kˈojlxin tiˈj alcyej cyxeˈchel judío mas jawnex, bix tiˈj alcyej tley Moisés tuˈn cynimantexin. Paˈmel tiiba cyiˈj xnakˈtzbil lu, cuma nuk kˈoj ntjyoˈn, bix mintiiˈ tajbel. 10 Ka at jun xjal ma takˈ jun xnakˈtzbil yaaˈn jaxxix, kbanx texin tuˈn miˈntl xnakˈtzanxin takˈ. Ka ma txiˈ tkbaˈna tcab maj tuˈn miˈntl cub tkˈoˈnxin kˈoj cyxol ocslal, bix tcyˈixin tuˈn t‑xiˈ tbiˈnxin tyola, ljomax cyxola. 11 Il tiˈj tuˈn tel t‑xooˈna, cuma ttzkiˈna ma txiˈ tnaablxin tuj il. Binchal ilxin, bix jaxxin njyonxin tcastiwaxin.

Tej t‑xiˈ tkbaˈn Pablo te Timoteo alcye tuˈn tbint tuˈn

12 Cxeˈl nsmaˈna jxin Artemas tuyey bix ka jaj xin Tíquico. Oj tpon jun cyxolxin tuyey, kˈoˈnc tipena tiˈj tuˈn tpon naja tuj tnom Nicópolis, cuma tuj tzunj tnom lu chin temela tuj tyem te cheˈw tzul.

13 Ja tzunj xin Zenas, jxin txˈolbal ley, tuyax jxin Apolos, oj cyetzxin tuj ttanema, kˈonx chˈin onbil cyexin, tuˈntzen mintiiˈ pena tuj cybexin. 14 Yeecˈanx cye ocslal ti tten tuˈn cyonen cyiˈj xjal at pena eteˈ, tuˈntzen cyajben ocslal tuj taakˈen Dios.

Mancˈbil yol cye ocslal

15 Cykilca kej ocslal at wuyena nxiˈ cykˈoˈn jun cykˈolbebl cyey. Kˈonxa kkˈolbebla cyej xjal n‑oc kakˈa cye bix junx cyocslabl kuyena.

Tzajxit t‑xtalbil Dios cyibaja. Oˈcx nyolja.