Sprejchwead 2

Reimer 2001

2 Mien Sän, wan du miene Wead aun näme woascht, un miene Jeboote enn die bewoare woascht,

² Soo daut du dien Ua dol beaje deist to Weisheit, dan woascht du dien Hoat op moake to Festentnis;

³ dan wan du roope deist fa unjascheede, diene Stemm opphäwe fa Festentnis;

⁴ Wan du ar seakje woascht aus Selwa, un seakje deist soo aus fa festoakne Schats;

⁵ dan woascht du däm Herr Gott siene Forjcht festone, un woascht Erkjantnis fonn Gott finje.

⁶ Dan dee Herr Gott jeft Weisheit; ut sien Mul kome Wissenschoft un Festentnis.

⁷ Hee lajcht jesunde Wiesheit opp fa dee Opprajchte; Hee es en Schilt to dän dee enn Follstendijchkjeit waundle,

⁸ dee Jerejcht Wäaj to beschutse, un Hee beschutst siene Heilje äa Wajch.

⁹ Dan woascht du Jerajchtijchkjeit un Jerejcht un Opprajchtijchkjeit festone; jo, jieda gooda Stijch.

¹⁰ Wan Weisheit enn dien Hoat enenn kjemt; un Wissenschoft Fejneaje es to diene Seel;

¹¹ dan woat Fäasejcht die bewoare; Festentnis woat äwa die woake;

¹² die fonn dän beesa Wajch to bewoare; fonn dän Maun dee Fekjeadet rät;

¹³ soone dee dän opprajchta Stijch felote omm enn dee Wäaj fonn Diestanes to gone;

¹⁴ dee sikj freihe Beeset to doone; dee fejneaje sikj enn dee Beese äa Fekjeadet;

¹⁵ dän äa Stijch Kromm es; jo, dee sent hinjalestijch enn äa Gone.

¹⁶ Dise woare die rade fonn dee framde Fru, fonn dee Framde dee met äare Wead schmeijchelt;

¹⁷ dee de Leida fonn äare Jugent felat, en fejat dän Bunt fonn äa Gott.

¹⁸ Dan äa Hus deit nom Doot leide, un äare Jleise no dee Doodje.

¹⁹ Aule dee doa enenn gone kome nijch trigj; un doone uk nijch bott dän Läwes Stijch kome.

²⁰ Dan woascht du kjenne enn dee Goode äa Stijch gone, un dee Jerajchte äa Stijch hoole.

²¹ Dan dee Opprajchte selle enn daut Launt läwe; un dee Follkomne selle doabenne bliewe.

²² Oba dee Beese selle fonn dee Ead aufjeschnäde woare; un dee Äwaträda selle doa rut jewartelt woare.