Salmo 82

Ang Salita ng Dios (Tagalog Contemporary Bible)

82 Pinamumunuan ng Dios ang pagtitipon ng kanyang mga mamamayan.
    Sa gitna ng mga hukom^[a] siya ang humahatol sa kanila.
² Sinabi niya sa kanila, “Hanggang kailan kayo hahatol ng hindi tama?
    Hanggang kailan ninyo papaboran ang masasama?
³ Bigyan ninyo ng katarungan ang mga dukha at ulila.
    Ipagtanggol ninyo ang karapatan ng mga nangangailangan at inaapi.
⁴ Iligtas ninyo ang mahihina at mga nangangailangan mula sa kamay ng masasamang tao!
⁵ Wala silang nalalaman! Hindi sila nakakaintindi!
    Wala silang pag-asa, namumuhay sila sa kadiliman at niyayanig nila ang pundasyon ng mundo.
⁶ Sinabi ko na sa inyo na kayo ay mga dios, mga anak ng Kataas-taasang Dios.
⁷ Ngunit gaya ng ibang mga namumuno ay babagsak kayo, at gaya ng ibang tao ay mamamatay din kayo.”
⁸ Sige na, O Dios, hatulan nʼyo na ang lahat ng bansa sa mundo, sapagkat sila namaʼy sa inyo.