26 Pamatud-i, Ginoo, nga wala ako sing sala,
kay nagakabuhi ako nga wala sing kasawayan
kag nagasalig ako sa imo nga wala gid sing pagpangduhaduha.
² Usisaa ako, Ginoo;
usisaa ang akon hunahuna kag tagipusuon.
³ Kay permi ko madumduman ang imo gugma,
kag nagakabuhi ako nga matutom permi sa imo.
⁴ Wala ako nagaupod sa mga tawo nga dayaon kag hipokrito.
⁵ Kontra ko ang pagtililipon sang malaot nga mga tawo.
Indi gid ako mag-upod sa ila.
⁶ Ginahinawan ko ang akon kamot sa pagpakita nga wala ako sing sala.
Kag dayon nagalibot ako sa imo halaran sa pagsimba sa imo, Ginoo,
⁷ samtang nagakanta ako sang mga kanta sa pagpasalamat
kag nagasugid sang tanan mo nga makatilingala nga mga binuhatan.
⁸ Ginahigugma ko ang templo nga ginapuy-an mo, Ginoo,
ang lugar nga sa diin ara ang imo gamhanan nga presensya.
⁹ Indi ako paglaglaga upod sa mga makasasala,
pareho sang mga manugpatay sang tawo.
¹⁰ Ini sila nagahimo permi sang kalautan
kag ginakuwartahan nila ang iban.
¹¹ Pero ako iya nagakabuhi nga wala sing kasawayan,
gani luwasa ako kag kaluoyi.