Add parallel Print Page Options

Min‑al jun xjal mas nintzaj twitz juntl

Key ocslal, tuj cyocslabla tiˈj jawnex Kaaw Jesucristo, miˈn txiˈ cyximana cyiˈj xjal ka at jun mas nintzaj twitz juntl. Ka ma tzˈocx jun xjal cyxola tuj tja Dios, bix tcub t‑xmulkˈab te oro, bix toc tbanel t‑xbalen tiˈj, bix jax juˈx ka ma tzˈocx jun xjal mebe bix toc t‑xbalen ttxˈakan, miˈn tzˈoc cykˈoˈna mas tajbel jxjal kˈinawe. Ka ma txiˈ cykbaˈna tej xjal toc t‑xbalen wiˈyel tiˈj: “Kequey tzalu tuj jun kˈukbil tbanelxix,” bix ka ma txiˈ cykbaˈna tej xjal mebe: “Kequey tzalu twitz txˈotxˈ, bix ka weˈqˈuey jatzewe cyiˈjxe xjal,” ka ma bint cyuˈna juˈwa, yaaˈntzen junx taˈ cycˈuˈja cyiˈ xjal cyxola. Matzen tzˈoc cykˈon cyiiba tisen ke juez nuk cyaj tuˈn cyajben cyej xjal nintzaj, tuˈn cycaman pwak. Yaaˈntzen tumel cyuˈna. Key ocslal n‑oc cyakˈa weya, cˈoquel cycwenta tiˈj nyola. Kej xjal mebe tuj cywitz xjal te twitz txˈotxˈ, ma jaw tscyˈoˈn Dios tuˈn cyoc te kˈina, cuma tuˈnj cyocslabl ckˈojel cye tuˈn cyoc tuj tcawbil Dios, tisen ma cyaj tkbaˈn Dios te cye kej xjal n‑oc takˈ Dios cye. Pero cyey, nuk n‑el cyiiqˈuena kej xjal mebe. ¿Pero alcye kej xjal nchi binchan kaˈ cyiˈja? ¿Yaaˈmpatzen ejeeˈx kej xjal kˈina? ¿Yaaˈmpatzen cyuˈn kˈina tuˈn cycambil n‑el cyiiˈn tikˈch cyey tuj juzgado? ¿Yaaˈmpatzen jax kej kˈina nchi xmucchan tiˈj jawnex tbi Jesús, jxjal Cyaawa?

Pero ka ma tzˈoc cyakˈ ke cyuyey cyey tisenj n‑oc cyakˈ cyiiba cyey, baˈntzen tzin cybinchaˈna, cuma nintzaj ja ley lu tuj jawnex tley Dios. Pero ka ma txiˈ cyyeecˈana mas nimbil cyej xjal kˈina cywitzj xjal mebe, attzen cyila, bix nchicˈajax min txiˈ cybiˈna tley Dios. 10 Ka at jun xjal ma txiˈ tbiˈn cykilca tley Dios, pero ma tzpet tuj jun mandamyent te ley, amale nuket jun mandamyent, ya ma cub tzˈak tuj cykilca ley. 11 Ktzkiˈn juˈ tten, cuma e tkba Dios tuˈn miˈn cyaj cycyeˈyena cyxuˈla tuˈn juntl xuuj, bix jax Dios e kbante tuˈn miˈn tzˈoc cybyoˈna xjal. Juˈ tzunj, ka ma tzˈoc cybyoˈna jun xjal, amale mint chi wutana tuya juntl xuuj yaaˈn cyxuˈla, pero ma bint il cyuˈna, cuma min ma cynima cykilca yol kˈoˈn tuˈn Dios.

12 Chi yolena tuya tkˈakˈbil cycˈuˈja cyiˈ xjal, bix cybinchama baˈn cye xjal, cuma oj toc tcyeˈyen Dios ejeeˈy ka ma bint baˈn cyuˈna bix ka min, cmloltzen ejeeˈy tiiˈnkey tiˈ ley tzin tkbaˈn cˈoquel kkˈoˈn lastim cye xjal. 13 Ka mintiiˈ lastim cyuˈna cye xjal, jax mintiiˈ lastim tkˈaˈ Dios cyey oj cyoca tuj xkel twitzxin. Pero ka ma tzaj kˈakˈen cycˈuˈja cyiˈ juntl, tzul kˈakˈan tcˈuˈj Dios cyiˈja oj cypona twitzxin.

Ka at jun xjal tzin tkbaˈn at tocslabl tiˈ Dios, pero ka mintiiˈ n‑oc tonen juntl, mintiiˈ tajbelel tocslabl

14 Key ocslal, cxeˈl nkanena cyey, ka at jun xjal tzin tkbaˈn at tocslabl tiˈ Dios, pero ka mintiiˈ tonbil nbint tuˈn tiˈ juntl, ¿titzen tajbel tocslabl? ¿Jacˈapa clet ka min tzˈajben tocslabl? 15 Cxeˈl nkanena cyey, ka at jun ocslal cyxola mintiiˈ t‑xbalen bix mintiiˈ twa, 16 bix ka ma txiˈ cykbaˈna te: “Tenxita tuj ttz̈yal. Cutz̈it ka ma cnet t‑xbalena bix tway tuˈna,” ka tz̈ikey te, pero mintiiˈ onbil ma txiˈ cykˈoˈna te, ¿ti tajbel cyyola te? 17 Juˈ tzunj, min tzˈajben kocslabl ka nuk nko yolen at kocslabl pero min ma txiˈ kyeecˈan ka at‑xix kocslabl tuˈnj baˈn tzin kbinchaˈn.

18 Pero kape at jun cyxola nbaj tcˈuˈj tiˈj ja yol luwe, bix nxiˈ tkbaˈn cyjulu: “At caˈba wik ocslal. At juun at nim cyocslabl, bix at juuntl at nim cybinchben baˈn,” tz̈i tzunj xjal yaaˈn jax tuˈn. Pero cxeˈl nkbaˈna te, ka mintiiˈ tbinchben baˈn jun xjal, mintzentiiˈ tyecˈbil ka at tocslabl tiˈ Dios. Pero ka baˈn nbint tuˈn, nyeecˈantzen at tocslabl tiˈ Dios. 19 Nchi ocslana junx Dios at, bix baˈn ja lu. Pero cˈoquel cycˈuˈja tiˈj jax juˈx ke biman ocslaˈn cyuˈn junx Dios at. Pero min tzˈajben cyocslabl, cuma min nchi binchan baˈn bix juˈ tzunj nuk nchi luˈlen tuˈn ttz̈i cyiˈj.

20 Key xjal min tzˈel cyniˈya tiˈj, min tzˈajben cyocslabla ka mintiiˈ baˈn nbint cyuˈna. 21 Cˈoquel cycˈuˈja tiˈ kxeˈchel Abraham. ¿Mimpa e tyeecˈaxin ka jiquenxin twitz Dios tuˈnj tbinchbenxin? E tbixin tajbil Dios. At jun maj e xiˈ toyenxin tcwalxin Isaac te Dios twiˈ altar, tisen e tkba Dios. 22 Tzinenxsen taˈ junx eteˈ tbinchbenxin tuya tocslablxin, bix tuˈnj e bint tuˈnxin, e tyeecˈaxin tocslablxin tzˈaklxix. 23 Juˈtzen e japan baj Dios tiˈj tyol tzin tkbaˈn cyjulu: “Oc ke tcˈuˈj Abraham tiˈ Dios, bix juˈ tzunj e tzaj kˈoˈn te Abraham tuˈn jiquen taˈ tuj twitz Dios,” tz̈i tyol Dios. Bix cuma e tbincha Abraham j‑e tkba Dios, juˈ tzunj oc tkˈoˈn Dios jaxin te tuya Diosxin.

24 Juˈ tzunj, key hermano, il tiˈj qˈuelel cyniˈya tiˈj ka jiquen eteˈy twitz Dios ka at yecˈbil te cyocslabla tuˈnj cybinchbena, bix yaaˈn nuk tuˈnj cyocslabla bix ka mintiiˈ cyakˈbila ma bint. 25 Juˈ e cyjaˈ jxuj xuuj Rahab aj paj jiquen twitz Dios jatxe ootxa. E tyeecˈaxuj at tocslablxuj tiˈ Dios tej eˈwen ke tsanjel Dios tuˈnxuj tuj tjaxuj, bix e tzaj tonenxuj ejeeˈxin tuˈn cyel okxin, tuˈn tcoˈpantexuj ejeeˈxin twitz cawel tuj tnom te Jericó. 26 Cytzkiˈna cyimne taˈ jun xjal mintiiˈtl t‑xew. Jaxsen juˈx cyocslabla, cyimne taˈ ka mintiiˈ baˈn ma bint cyuˈna.