¡Ayxsen tej xjal ncub tkˈoˈn tzpetsabl tuj tbe juntl!

18  Cyuj ja kˈij lu, e pon lkˈe ke t‑xnakˈatz Jesús tiˈjxin, bix e xiˈ cykanenxin texin:

―Oj tul tcawbil Dios tzul tuj cyaˈj, ¿alcye xjal mas jawnex tuj?―tz̈ikexin.

² Tuˈntzen taj ttzakˈbeˈnxin, e tzaj ttxcoˈnxin jun neeˈ ttxlajxin tuˈn toc weˈ cywitzxin. ³ Bix e xiˈ tkbaˈnxin cyexin:

―Jaxxix cxeˈl nkbaˈna cyey, ka min ma cub cychˈixpuˈna cynaabla tuˈn cyoca tisen ja neeˈ lu, mlay chi ocxa tuj tcawbil Dios tzul tuj cyaˈj. ⁴ Alj xjal ma tzˈoc tkˈon tiib tuˈn toc te jun xjal maans tisen ja neeˈ lu, ja tzunja mas jawnex tuj tcawbil Dios. ⁵ Alj ma tkba ka il tiˈ jun neeˈ, jaxse weya il wiˈja. ⁶ Pero alj xjal ncub tkˈoˈn tzpetsabl tuj tbe juntl yaaˈn cyiw tuj tocslabl tuˈn t‑xiˈ tzpet tuj tbe Dios, masetlpele baˈn oj tcub yeˈ jun xak al tkul, tuˈn t‑xiˈ xeˈt tuj mar. ⁷ ¡Ayxsen cyej xjal twitz txˈotxˈ, cuma ncub cykˈoˈn tzpetsabl tuj cybe juntl! Mlay weˈ at ocsabl cˈuˈjbaj tuˈn t‑xiˈ tzpet jun xjal tuj tbe Dios. ¡Pero ayxsen tej xjal ncub tkˈoˈn tzpetsabl tuj tbe juntl!

⁸ Yaltzen ka ma chi cub tzˈaka tuj il tuˈn cykˈaba bix ka tuˈn cykena, cytxˈomela bix cyxoomexa. Mas baˈntetpele oj tel txˈomet jun cykˈaba bix ka jun cykena tuˈn cycyaja cox pero tuˈn cyocxa tuj cyaˈj twitzj tuˈn cyxiˈy tuj kˈakˈ te junx maj tuya caˈba cykˈaba bix ka caˈba cykena. ⁹ Bix ka nchi jyona il tuya tbakˈ cywitza, cyimetz bix cyxoomexa. Mas baˈntetpele tuˈn cytena tuya junx tbakˈ cywitza twitz txˈotxˈ pero tuˈn cyocxa tuj cyaˈj twitzj tuˈn cyxiˈy tuj kˈakˈ te junx maj tuya cycaˈbel tbakˈ cywitza.

Jaj jun techel tiˈj jun carnel e xiˈ tzˈak

¹⁰ Miˈn tzˈel cyiiqˈuena ke neeˈ, cuma jaxxix cxeˈl nkbaˈna cyey, n‑oc cycyeˈyen tsanjel Dios tuj cyaˈj ti nbaj cyiˈj, bix nchi pon kej ángel lu twitz Dios te kbalte texin ti nbaj.

¹¹ Il tiˈj qˈuelel cyniˈya tiˈj o chin uˈla te jyol cyej xjal o cheˈx tzpet, tuˈntzen cyclet wuˈna, inayena, jxjal Smaˈn tuˈn Dios tuˈn ntena cyuya xjal. ¹² ¿Ti toc cyuˈna? Ka at jun cylel carnel, ka at syent tcarnelxin, bix ka ma txiˈ tzˈak junjil, ¿miˈmpa cyaj tkˈoˈnxin jnoventa y nuevejil jaaˈ eteˈjil, tuˈn t‑xiˈxin jyol tej jil otk cyaj tzˈak, tuˈn tcnetjil? ¹³ Bix ka ma cnetjil tuˈnxin, jaxxix cxeˈl nkbaˈna cyey, mas ctzalajelxin tiˈj ja jil lu twitzj noventa y nuevejil min e cheˈx tzpet. ¹⁴ Juˈ tzunj, tzinen taˈ tcyˈi Cymana tuj cyaˈj tuˈn t‑xiˈ jun neeˈ tuj il.

Ti tten tuˈn tcub knajsaˈn til kermano

¹⁵ Ka at jun kˈiˈn tyol Dios tuˈn bix ka ma tbincha il, cutxetey tuya tuˈn t‑xiˈ tkbaˈn te tuˈn miˈn binchantl il, pero cyjunala tuya. Ka ma cyaj tkˈoˈn til, ma camana tuˈn miˈn cyaj j‑ocslala tuj til. ¹⁶ Pero ka min ma cyaj tkˈoˈn til, kˈiˈnx juntl ocslal bix ka caˈba ocslal tuyey, tuˈntzen at caˈba oxe tstiwa tuˈn toc cycyeˈyen tiiˈn tnaabl j‑ocslala. ¹⁷ Ka tcyˈi binchal il tuˈn toc tbiˈn cyyola, kbanx cye cykilca ocslal tuj tja Dios. Ka ma tzˈel tiiqˈuen cyyol cykilca ocslal, yaaˈntltzen ocslal tuj cywitza, sino tisencˈa jun xjal yaaˈn te ttanem Dios bix ka jun chmol alcabala.

¹⁸ Jaxxix cxeˈl nkbaˈna cyey, ejeeˈy kbalte ti pjel cyxol ocslal twitz txˈotxˈ. Alcyej cxeˈl cykbaˈna yaaˈn baˈn tuˈn tbint, baˈntzen qˈuelel cyyola tuj cyaˈj. Bix alcyej cxeˈl cykbaˈna baˈn tuˈn tbint cyxol ocslal, jax baˈntzen qˈuelel cyyola tuj cyaˈj.

¹⁹ Juntl maj cxeˈl nkbaˈna cyey, ka at caˈba cyey twitz txˈotxˈ junx taˈ cykanbila te Dios, ctzaal kˈoˈn cyey tuˈn Nmana Dios tuj cyaˈj. ²⁰ Cbinel tuˈn Nmana, cuma jaaˈ nchmet caˈba oxe ocslal tuˈn cyajben weya, ntiiˈn tzuna cyxol―tz̈i Jesús cye t‑xnakˈatz.

²¹ Bix e pon lkˈe Pedro tiˈ Jesús, bix e xiˈ tkanenxin te:

―Taat, ¿jteˈ maj cwel nnajsaˈna til jun xjal ka ma tbincha jun kaˈ wiˈja? ¿Yaaˈmpa wuuk maj?―tz̈i Pedro.

²² Aj ttzakˈbeˈn Jesús:

―Min nxiˈ nkbaˈna tey ka oˈcx wuuk maj. Jatzen nxiˈ nkbaˈna tey tuˈn tcub tnajsaˈna cykilca maj, seya wuuk maj setenta. ²³ Jnbaj cyej xjal ttanem Dios tisenj e baj cyej xjal jun maj tjakˈ tcawbil junxin rey twitz txˈotxˈ. E tajbe rey tuˈn tchjet texin cykilca cycˈasben t‑akˈanalxin. ²⁴ Tej cypon t‑akˈanalxin twitzxin tuˈn tchjet cycˈasben, e pon kˈiˈn twitzxin jun t‑akˈanalxin nimxsen tcˈasben. Laaj mil talento tcˈasben. ²⁵ Pero mintiiˈ tpwak. Juˈ tzunj, e tkba rey tuˈn t‑xiˈ qˈueyet, tuyax t‑xuˈl, cyuyax tcwal, tuyax cykilcaj at te, tuˈntzen tkˈoj pwak te rey. ²⁶ Tej tbinte t‑akˈanalxin jlu, biˈxsen e cub mutzkˈajxin twitz txˈotxˈ twitz rey, bix e xiˈ tcubsaˈn twitz texin: “Taat, ten tpasensyiya wiˈja, bix cxeˈl nchjoˈna cykilca ncˈasbena tey,” tz̈i t‑akˈanalxin. ²⁷ Bix oc qˈuixbe tcˈuˈj rey tiˈ t‑akˈanalxin, bix e xiˈ ttzakpiˈnxin, bix e cub tnajsaˈnxin cykilca tcˈasben.

²⁸ Pero tej tetz jxin el libre, bix e xiˈxin jyolte tej jun tuyaxin cˈasbenel twitzxin. At chˈineeˈ tcˈasben twitzxin. Bix e xiˈxin tzyulte, bix oc tẍkˈoˈnxin tkul, bix e xiˈ tkbaˈnxin te: “Kˈontz jtey tcˈasbena jun syent denario weya.” ²⁹ Bix e cub mutzkˈaj tuyaxin twitz txˈotxˈ twitzxin, bix e xiˈ tcubsaˈn twitz texin: “Ten tpasensyiya wiˈja, bix cxeˈl nchjoˈna ncˈasbena tey,” tz̈i. ³⁰ Pero ja tzunj texin min e xiˈ tbiˈnxin tuyaxin. Nuk oˈcx ocx tkˈoˈnxin tuj tzeeˈ, tuˈn miˈn tzˈetz ojxe tchjet cykil tcˈasben.

³¹ Tejtzen toc cycyeˈyen niyˈtl t‑akˈanal rey ti otk baj, kaˈxsen el tuj cywitzxin, bix e xiˈkexin kbalte te rey ti otk baj. ³² Tbintetzen rey, bix e tzaj ttxcoˈn rey jaj xin akˈanalxin otk najsaxin tcˈasben, bix e xiˈ tkbaˈnxin te: “Jay akˈanal yaaˈn baˈn, e cub nnajsaˈna cykilca tcˈasbena weya cuma e tzaj tcubsaˈna twitza weya. ³³ ¿Yaaˈmpatzen tuˈn toc qˈuixbe tcˈuˈja tiˈ tuyey, tisen e xiˈ nkˈoˈna lastim tey?” tz̈i rey. ³⁴ Bix e tzaj tkˈoj rey, bix e xiˈ tkˈoˈnxin tuj cykˈab pjul xjal tuˈn tqˈuixbaset nim ojxe tchjet cykilca tcˈasben texin.

³⁵ Jax juˈx ctbinchaˈ Nmana tuj cyaˈj cyiˈja ka min xcub cynajsaˈna ke cyuyey tuya cykil cycˈuˈja―tz̈i Jesús cye t‑xnakˈatz.