Reema 16

Reimer 2001

16 Nu laj ekj en goodet Wuat enn fa onnse Sesta Pheebe, dee en Deena es enn dee Jemeent en Kenchrea,

² so daut jie aea aunnaeme em Herr soo auset dee Heilje tookjemt, en aea biestone enn wautemme aea faele mucht; dan see holp faele, mie uk.

³ Jreest Prisila en Akwila, miene metoabeide em Herr Jesus;

⁴ dee sade aea Laewe opp Spel fa mie, daen nich bloos ekj dank doafaea, oba uk aul dee Heide Jemeente.

⁵ Jreest uk dee Kjoakj dee sikj enn aea Hus fesaumelt. Jreest mien leefsta Frint Epeneetus, dee de easchte Frucht wea fa Christus enn Asien.

⁶ Jreest Marie, dee fa ju seeha jeoabeit haft.

⁷ Jreest mien Frintschofft Andronikus en Junias, dee uk met mie toop jefange weare, dee uk beriemt weare mank dee Apsotel, en eare enn Christus weare aus ek.

⁸ Jreest Ampliatus, daem ekj em Herr leef ha.

⁹ Jreest Urbanus, onns Metoabeide enn Christus, en uk mien leewa Frint Stachis.

¹⁰ Jreest Apeles dee enn Christus en goode Nome haft. Jreest dee Aristobulus Famielje.

¹¹ Jreest Herodian, mien Frintschofft. Jreest dee, dee fonn Narsissus siene Famielje sent, dee em Herr sent.

¹² Jreest Trifena en Trifosa, dee fa daem Herr oabeide. Jreest dee leefste Persis, dee seeha fa daem Herr jeoabeit haft.

¹³ Jreest Rufus, daem de Herr jewaelt haft, uk siene en miene Mutta;

¹⁴ Jreest Asenkretus, Flegon, Hermas, Patrobas, Hermes, en dee Breeda met an;

¹⁵ Jreest Fililogus, en Julia, Nereus en siene Sesta, en Olimpas en aul dee Heilje met an.

¹⁶ Jreest eena daem aundra met en heilje Kuss.

¹⁷ Nu pracha ekj ju, Breeda, seet ju faea fa dee, dee Tranunja en Schkendaul moake, en jaeajen dee Lea gone dee jie jeleat ha, en blieft fonn soone wajch;

¹⁸ Wiel soone deene nich onns Herr Jesus Christus, oba aea eajana Buck, en derch seete Wead en Schmeichelraed fefeare see eefache Hoate.

¹⁹ Jun Jehuarsaum es aulewaeaje bekaunt jeworde. Ekj frei mie doaromm aewa junt; en ekj wensch mie daut jie Weis wudde senne fa daut Goodet, oba eefach fa daut Beeset.

²⁰ En dee Fraedensgott woat daen Soton boolt unja june Feet fekjnedre. Mucht onns Herr Jesus Christus siene Jnod met ju senne. Amen.

²¹ Timotaeus mien Metoabeide jreest ju, uk Lusius, Jason, en Sosipater mien Frintschofft.

²² Ekj, Tertius, dee dis Breef schrift, jrees ju em Herr.

²³ Gajus, dee mie, en dee gaunse Jemeent oppneem, jreest ju. Erastus, dee Stauts Kausefeare, en onns Brooda Kwartus jreese junt.

²⁴ Mucht onns Herr Jesus Christus siene Jnod met ju aule senne.

²⁵ Daem oba, dee junt stoakje kaun no mien Evanjeelium en Praedicht fonn Jesus Christus, no dee Oppenboarunk fonn dit Jeheemnes, daut fonn Eewichkjeit es Jeheem jewast,

²⁶ oba nu jeoppenboat es, en derch dee Profeete Schreft no daem Eewje Gott sien Jeboot bekaunt jemoakt es mank aule Felkje tom Jehuarsaum em Gloowe;

²⁷ to daem eensje, weise Gott saul Harlichkjeit senne derch Jesus Christus fa aule Eewichkjeit. Amen