Psalmi 147

Biblia Sacra Vulgata

147 Alleluja. Lauda, Jerusalem, Dominum; lauda Deum tuum, Sion.

² Quoniam confortavit seras portarum tuarum; benedixit filiis tuis in te.

³ Qui posuit fines tuos pacem, et adipe frumenti satiat te.

⁴ Qui emittit eloquium suum terrae: velociter currit sermo ejus.

⁵ Qui dat nivem sicut lanam; nebulam sicut cinerem spargit.

⁶ Mittit crystallum suam sicut buccellas: ante faciem frigoris ejus quis sustinebit?

⁷ Emittet verbum suum, et liquefaciet ea; flabit spiritus ejus, et fluent aquae.

⁸ Qui annuntiat verbum suum Jacob, justitias et judicia sua Israel.

⁹ Non fecit taliter omni nationi, et judicia sua non manifestavit eis. Alleluja.