Psalme 54

Reimer 2001

Dee 54 Psalm

To dän Haupt Musikaunt opp Neginot: en Psalm fonn Doft- aus dee Zifim kjeem en saed to Saul, Deit Doft sikj nijch festäakje mank onnse?

¹ Rad mie, O Gott derjch dien Nome, un doo mie derjch diene Krauft rejchte.

² Hea mien Jebäd, O Gott; horjch no dee Wead ut mien Mul.

³ Dan Framde sent oppjestone jäajen mie, un ommenschlijche Mane seakje miene Seel. Dee ha Gott nijch fer sikj jestalt. Selah.

⁴ See, Gott es mien Helpa. Dee Herr es met dän dee miene Seel opprajcht hoole.

⁵ Hee woat Beeset fejelte to dän dee miene Fiend sent; schnied dän auf enn diene Woarheit.

⁶ Ekj woa friewelijch to die opfre; ekj woa dien Nome preise, O Herr Gott, dan daut es goot.

⁷ Dan Hee haft mie ut aul miene Trubbels jerat; un mien Uag haft sien Felange jeseene opp miene Fiend.