Oppenboa 16

Reimer 2001

16 Ekj head ne lude Stem utem Tempel to dee saewen Enjel saje: "Got en jeet dee saewen Komme foll Gott siene Oaja oppe Ead!"

² En dee easchta jinkj en goot siene Kommfoll oppe Ead; en doa kjeeme beese en schlajchte Schwaeare opp dee Mensche dee daut Tia sien Teakjen jenome haude, en dee sien Bilt aunbaede.

³ En dee tweeda goot siene Kommfoll opp daut Maea; en daut wort soo aus Bloot fonn en doodja Mensch, en aulet laewendje em Maea jinkj doot.

⁴ En dee dredda goot siene Kommfoll opp dee Wotastreem en Wota kjwale, en daut wort Bloot.

⁵ En ekj head daen Enjel, dee aewa Wota es, saje: "Du best jerajcht, dee du best, en weascht, dee Heilja, daut du soo jerecht hast;

⁶ dan see ha dee Heilje en Profeete aea Blot fegote, en nu hast du an Bloot jejaeft to drinkje, dan see ha daut fedeent."

⁷ Ekj head daen Aultoa saje: "Yo, Herr, aulmajchtja Gott, Tru en Jeracht sent aul diene Jerechte."

⁸ En dee feada goot siene Kommfoll ut oppe Sonn enopp, en am wortet jejaeft daut hee Mensche met Fia brenne sull.

⁹ En Mensche worde fesengt met groote Het, en see lastade Gott sien Nome, dee de Follmacht haud aewa dise Ploag, oba deede nich Buesse, am dee Harlichkjeit to jaewe.

¹⁰ En dee fefte Enjel goot siene Kommfoll ut opp daut Tia sien Troon; en sien Kjeenichrikj wort diesta, en Mensche gnoagde aeare Tunge fa Weedoag,

¹¹ en lastade Gott em Himel waeajen dee Weedoag, en aeare Schwaeare, oba see deede nich Buesse aewa aeare Woakje.

¹² En dee sasta Enjel goot siene Kommfoll aewa daem Eufrat Wotastroom; en dee dreajd ut, soo daut daen Wajch fa dee Kjeenije fomm Ooste kunn reed jemoakt woare.

¹³ En ekj sach dree onnreine Jeista soo aus Pogge rut kome ut daem Drache sien Mul, en daut Tia sien Mul, en daem faulscha Profeet sien Mul.

¹⁴ Dee sent Diewelsjeista dee Wunndateakjens doone, en dee gone aewa dee gaunse Ead no dee Kjeenije, daen toop to saumle fa Gott sien groota Kjrichsdach.

¹⁵ Kjikj! ekj kom soo aus en Deef. Seelich es dee, dee woakt, en siene Kjeelda reed helt, daut hee nich noaktich jeit, en Mensche siene Schaund seene.

¹⁶ En hee saumeld an toop en ne Staed dee opp Hebraeasch Harmagedon heet.

¹⁷ En dee saewenda Enjel goot siene Kommfoll enne Lofft enenn; en doa kjeem ne lude Stem fom Troon utem Tempel, dee saed: "Daut es paseat!"

¹⁸ En doa weare Blitstrole, en stemme, en daut donnad, en doa kjeem en grootet Eadbaeabe, soo es noch niemols oppe Ead es jewast seit Mensche sent jewast, soon grootet Eadbaebe.

¹⁹ En dee groote Staut deeld sikj en dree Deel, en dee Natsjoone aeare Staede folle. En dee groote Staut Babieloon wort fer Gott em Jedajchtnes behoole, aea daut Kuffel foll Wien fonn sien Oaja to jaewe.

²⁰ En aule Insel feschwunge, en dee Boaj weare nich to finje.

²¹ En groote Hoagelsteena, bie hunndat Punnt groot, folle utem Himel opp Mensche; en de Mensche lastada Gott waeajen dee Hoagelploag, dan dee Ploag wea seeha groot.