Da True Spirit an da Spirit Dat Bulai

4 My good friends, no go trus jus anybody dat say dey get Godʼs Spirit, but check um out fo see if dey come from God. Cuz get plenny fake guys wen go all ova da world. Dey say dey talkas fo God, but dey not. ² Dis how you know da Spirit dat come from God: wen get somebody dat say Jesus Christ wen come one real guy jalike us, dass da guy wit da Spirit dat come from God. ³ But wen somebody say dat Jesus neva come one real guy, dass da guy wit da spirit dat no come from God. Dass da same spirit dat stay go agains Christ. You guys wen hear dat one guy dat go agains Christ goin come, an now dat guy stay awready inside da world.

⁴ My good friends, you guys come from God. Da One dat stay inside you guys mo strong den da Bad Guy dat stay inside da world. Dass why you guys wen stand up agains dem guys dat bulai an you guys wen win ⁵ Dem guys dat bulai, dey come from dis world. Dass why da tings dey say come from dis world, an da peopo inside da world listen to dem. ⁶ But us, we come from God. Da guy dat know God listen to us. Da guy dat no come from God no listen to us. Dass how we know da Spirit dat tell da trut an da spirit dat bulai.

God Get Love an Aloha fo Everybody

⁷ My good friends, we gotta get love an aloha fo each odda, cuz love an aloha come from God. Everybody dat get love an aloha, dey Godʼs kids, an know God. ⁸ Da guy dat no mo love an aloha donno God, cuz God everytime get love an aloha fo everybody -- dass how he stay. ⁹ Dis how God wen show us dat he get love an aloha fo us: he wen send his one an ony Boy fo come inside da world, so dat we can come alive inside fo real kine, cuz a him. ¹⁰ Dis how da real kine love stay: God wen get love an aloha fo us guys, no matta us guys neva get love an aloha fo him. An he wen send his Boy fo mahke so he can be da sacrifice dat hemo da shame fo all da bad kine stuff we wen do.

¹¹ My good friends, cuz God wen show dat kine love an aloha fo us guys, den us guys gotta show love an aloha fo each odda too. ¹² No matta no mo nobody eva wen see God fo real kine -- if we get love an aloha fo each odda, den God stay wit us an his love stay to da max inside all us guys.

¹³ Dis how we know dat we stay tight wit God an he stay tight wit us, cuz he wen give us his Spirit fo take charge a us. ¹⁴ Me an da odda peopo wen see Godʼs Boy, an we tell everybody dat da Fadda wen send him fo take da peopo inside dis world outa da bad kine stuff dey doing. ¹⁵ Whoeva say dat Jesus, he Godʼs Boy, God stay tight wit dem, an dey stay tight wit God too. ¹⁶ We know an trus dat God get love an aloha fo us guys.

Da way God stay, he everytime get love an aloha fo everybody. Whoeva get love an aloha, dey stay tight wit God, an God stay tight wit dem too. ¹⁷ I mean dis: wen da same kine love an aloha dat God get, stay to da max inside all us guys, den we no need be scared wen we stand in front God da Judge, cuz inside dis world we jalike Christ awready. ¹⁸ No need be scared if get love an aloha. Cuz if da same kine love an aloha dat God get stay plenny, den no goin stay scared. Whoeva stay scared, dey suffa plenny, jalike somebody stay punish dem. Jalike dey not grown up inside, dey still yet jalike one small kid, cuz dey no mo plenny love an aloha.

¹⁹ Us guys get love an aloha fo God cuz he wen get love an aloha fo us first. ²⁰ Whoeva say, “I get love an aloha fo God,” but dey hate dea brudda o sista, dey bulai. Cuz if dey no mo love an aloha fo dea brudda o sista dat dey can see, how dey can get love an aloha fo da God dat dey neva see? ²¹ Dis wat Christ wen tell us guys fo do: Whoeva get love an aloha fo God gotta get love an aloha fo dea brudda an sista too.