Nnwom 55

Nkwa Asem

Adamfo a n’adamfo ayi no ama mpaebɔ

55 O Onyankopɔn, tie me mpaebɔ. Nnan wo ho nkyerɛ me nkotosrɛ! ² Tie me na bua me! Me dadwene ama mabrɛ. ³ M’atamfo ahunahuna abɔ me hu na amumɔyɛfo nyadi abubu me. Wɔma ɔhaw ba me so; wɔn bo afuw me, na wɔtan me. ⁴ Mabɔ hu na owu ahunahuna abubu me. ⁵ Ehu ne ahopopo akyekyere me. Ahohuru afa me. ⁶ Sɛ mewɔ ntaban sɛ aburuburu a, anka metu akɔpɛ homebea akyirikyiri. ⁷ Anka metu akɔ akyirikyiri akɔkyekyere fi wɔ sare so. ⁸ Anka, ntɛm so, mɛpɛ hintabea afi mframa a ano yɛ den ne ahum ano.

⁹ O Awurade! Toto m’atamfo kasa. Mihu basabasayɛ wɔ kuropɔn no mu ¹⁰ awia ne anadwo ama bɔne ne ɔhaw ahyɛ no ma. ¹¹ Amumɔyɛ wɔ baabiara. Nsisi ne nnaadaa ahyɛ mmɔnten so ma.

¹² Sɛ ɛyɛɛ ɔtamfo na ɔreserew me a, anka metumi agyina ano; sɛ ɛyɛɛ ɔtamfo na ɔrehoahoa ne ho kyerɛ me a, anka metumi de me ho asie no. ¹³ Nanso, ɛyɛ wo, me yɔnko pa. ¹⁴ Me ne wo aka atirimsɛm asom wɔ Hyiadan baako mu.

¹⁵ M’atamfo nwuwu ansa na wɔn bere aso. Ma wɔnkɔ asaman anikan. Bɔne wɔ wɔn afi ne wɔn koma mu. ¹⁶ Nanso misu frɛ Awurade Nyankopɔn sɛ ɔmmoa me na obegye me nkwa nso. ¹⁷ Anɔpa, awia, anadwo, me nsɛm ne m’apinisi kɔ ne nkyɛn na ɔbɛte me nne. ¹⁸ Ɔde me befi ɔko a mereko atia m’atamfo dodow no mu no aba dwoodwoo.

¹⁹ Onyankopɔn a wadi hene fi tete no betie me na wadi wɔn so efisɛ, wɔmpɛ sɛ wɔsakra, na wonsuro no nso.

²⁰ Me yɔnko a odi kan kɔɔ ne nnamfonom so. Wanni ne bɔhyɛ so. ²¹ Na n’ano asɛm yɛ dɛ sen wo, nanso na ɔtan wɔ ne koma mu. Ne nsɛm yɛ brɛoo sɛ ngo, nanso etwa te sɛ nkrante a ɛyɛ nnam.

²² Gyaa wo haw mu ma Awurade na ɔbɛko agye wo. Ɔremma ɔnokwafo nni nkogu. ²³ Nanso, wo, O Onyankopɔn, bɛma awudifo ne atorofo akɔ wɔn damoa mu ansa na wɔawie wɔn nkwa nna fa. Me de, mede me ho meto wo so.