Jesus An Da Guy Dat No Can Move

9 Jesus wen go inside da boat, fo go back da odda side da lake, an he come by da town wea he live. ² Had some guys dat wen bring one guy by Jesus on top one mat. Da guy, he no can move, notting. Jesus wen see dat, an he tink, “Eh, wow! Dis guys trus me fo real kine, dat I goin make dea friend come good!” Den he tell da guy, “Eh, you, make strong! You know all da kine bad stuff you wen do? I tell you now, da shame from all dat, pau awready!” ³ But get some teacha guys dea dat teach Godʼs Rules. Dey tinking, “Eh, dis guy ack jalike he God! [Ony God can hemo da shame fo da bad kine stuff peopo do!]”

⁴ But Jesus wen know wat dey tinking. He say, “How come you guys tinking bad kine stuff lidat? I like show proof you guys, dat I da Guy Dass fo Real, an I get da right inside dis world, fo let peopo go an hemo da shame dat dey get fo da bad kine stuff dey wen do. But, easy fo talk bout hemo da shame -- anybody can talk dat kine. But not easy fo do um. Same ting, easy fo tell one sick guy dat no can move, ‘Eh, stand up an move aroun!’ -- anybody can talk dat kine. But not easy fo do um. But now, I goin show proof you guys -- I goin make dis sick guy make strong.”

Dass why he tell da guy, “Eh, get up! Take yoa mat an go home awready!” ⁷ So da guy wen get up an go home. ⁸ All da peopo wen see dat, an dey wen come real scared. An dey tell how awesome God stay, cuz he da kine God dat give peopo dat kine power.

Jesus Tell Matthew “Be My Guy!”

⁹ Den Jesus wen go way from dea. He wen spock one guy name Matthew. He stay inside da tax place taking money fo da govermen. Jesus tell um, “Come wit me! Be one a my guys!” Matthew wen get up, an wen go wit him.

¹⁰ Dat time Jesus go Matthew house fo eat. Plenny tax guys an odda kine peopo dat get bad name jalike dem wen go sit down fo eat wit Jesus an his guys. ¹¹ Da Pharisee guys see dat, an dey aks Jesus guys, “Eh, yoa teacha, how come he eating wit da tax guys an odda kine peopo dat get bad name jalike dem?”

¹² Jesus wen hear dat, an he tell um, “Da guys dat not sick no need docta, ony da sick guys need docta. ¹³ Go figga dis dat Godʼs talka Hosea wen say befo time, ‘I like my peopo give chance to each odda. Dat mo betta den jus make sacrifice inside da temple.’ Dass wat God say. But me, I neva come fo tell da guys dat everytime do wat God say fo come by me fo be my guys, but I wen come fo da peopo dat get bad name.”

How Come Jesus Guys No Skip Food So Dey Can Pray?

¹⁴ Had guys, John Da Baptiza Guy was dea teacha. Dey wen come by Jesus, an aks him, “How come us guys skipping food so we can pray, an da Pharisee guys skipping food so dey can pray, but da guys you teaching, dey not skipping food, but still yet dey can pray?”

¹⁵ Jesus tell um, “Wat you tink? You go one wedding an hang yoa face an cry wen da guy dat getting married stay dea? Not! Bumbye, da time goin come wen dey goin take away da guy dat getting married, an den, dat time, his friends goin skip food.

No Mix Da Old Kine Teaching Wit Da New Kine Teaching

¹⁶ “Fo fix up one old puka clothes, you no goin take one new piece cloth dat no shrink yet fo cover da puka. You do dat, den wen you go wash um, da new piece goin shrink an make one mo big puka, an you make da old clothes mo worse. ¹⁷ Same ting, you no goin put grape juice fo make wine inside one old kine leather bag an close um fo let um ferment. You do dat, da new wine goin ferment an bus da old wine bag, an da wine goin spill out. Da old leather no good no moa. Mo betta, you put da grape juice inside one new kine leather bag. Den da wine an da bag stay good.”

One Leada Guyʼs Girl An One Wahine

¹⁸ He stay talking to dem, an one leada guy wen go dea an go down in front Jesus, an say, “My girl jus wen mahke. Try come an put yoa hand on top her. Den she goin come back alive.”

¹⁹ Jesus wen go wit him, an da guys he teaching wen go too. An you know wat? Ova dea, had one wahine who stay bleeding twelve years. She tink, “If I ony touch Jesus clotheses, I know I goin come good.” Dass why she go behind Jesus, an wen touch his clotheses.

²² Jesus wen turn aroun, an wen spock her behind him, an he say, “Sista, make strong! You trus me, dass why you come good awready.” Right den an dea she wen come good.

²³ Jesus wen come near da leada guyʼs house, an see da guys playing funeral kine music. Everybody stay making big noise an crying plenny. ²⁴ He tell um, “Everybody go way! Da girl neva mahke, she ony sleeping.” But da peopo make fun a him. ²⁵ He send um all outside. He go inside, an take da girlʼs hand, an she wen come back alive. ²⁶ Da peopo all ova da place ova dea hear bout dis.

Jesus Make Two Blind Guys See

²⁷ Jesus wen go way from dea. Had two blind guys go behind Jesus yelling, “Eh, you, dey call you Da Guy dat from King David ohana! Make pity on us, an give us chance!”

²⁸ Wen Jesus go inside his house, da blind guys go inside dea too. Jesus tell um, “Fo real kine, you guys trus me, dat I can make you guys see?”

Dey tell him, “Yeah, Mista.”

²⁹ Den he touch dea eyes an say, “Da way you guys trus me, dass how goin be.” ³⁰ An right den an dea dey wen see. Den Jesus tell um strait, “You guys betta not tell nobody notting bout dis.” ³¹ But dey wen go all ova da place an tell everybody.

Jesus Make One Guy Dat No Can Talk Come Good

³² Da guys dat was blind befo wen go way from dea. An you know wat? Odda guys wen bring one guy by Jesus. Had one bad kine spirit dat wen take ova him, dass why da guy no can talk. ³³ Jesus make da bad kine spirit let um go, an den da guy can talk. All da peopo, wen blow dea minds. Dey say, “Us Israel peopo, we neva see dis kine stuff happen befo!” ³⁴ But da Pharisee guys stay telling, “Dis bugga stay tight wit da leada guy fo da bad kine spirits, da Devil, you know. Dass why he can make um let go da peopo!”

Jesus Feel Pity Fo Da Peopo

³⁵ Jesus go aroun all da big an small towns, an he teach inside da Jewish churches. He teach da Good Kine Stuff bout how dey can get God fo dea King, an he make all da sick guys an da guys dat not strong come good. ³⁶ He look all da peopo, an he get love an aloha an pity fo dem, cuz dey all worn out inside an no can help demself. Dey jalike da sheeps dat no mo one sheep farma fo take care dem.

³⁷ So den he tell his guys, “Eh! Da peopo jalike da crop. Get plenny crop fo bring inside, but no mo nuff worka guys fo do um. ³⁸ Dass why you guys gotta aks da boss guy who own da crop fo send da worka guys fo bring um in.”