Mathayo 26:6-13

Agano Jipya: Tafsiri ya Kusoma-Kwa-Urahisi

Mwanamke Ampa Yesu Heshima

(Mk 14:3-9; Yh 12:1-8)

⁶ Yesu alipokuwa Bethania katika nyumba ya Simoni aliyekuwa na ugonjwa mbaya sana wa ngozi. ⁷ Mwanamke alimwendea, akiwa na chupa yenye manukato ya thamani kubwa. Yesu akiwa anakula, mwanamke huyo akamwagia manukato hayo kichwani.

⁸ Wanafunzi walipomwona mwanamke akifanya hivi walimkasirikia. Walisema, “Kwa nini kuharibu manukato hayo? ⁹ Yangeuzwa na pesa nyingi ingepatikana, na pesa hiyo wangepewa maskini.”

¹⁰ Lakini Yesu alijua kilichokuwa kinaendelea. Akasema, “Kwa nini mnamsumbua mwanamke huyu? Amenifanyia jambo zuri sana. ¹¹ Mtaendelea kuishi na maskini siku zote.^[a] Lakini ninyi hamtakuwa nami siku zote. ¹² Mwanamke huyu amenimwagia manukato. Amefanya hivi kuniandaa kwa ajili ya mazishi baada ya kufa. ¹³ Habari Njema itahubiriwa kwa watu wote ulimwenguni. Na ninaweza kuwathibitishia kuwa kila mahali ambako Habari Njema zitahubiriwa, jambo alilofanya mwanamke huyu litahubiriwa pia, na watu watamkumbuka.”