Matye 26:59-66

Nouvo Testaman: Vèsyon Kreyòl Fasil

⁵⁹ Chèf prèt yo ak gran Konsèy Juif la t ap chache fo temwayaj pou yo met sou do Jezi pou yo ka jwenn yon rezon pou yo touye l. ⁶⁰ Men yo pa t ka jwenn anyen malgre te gen anpil fo temwen ki t ap eseye fè manti sou li. Finalman gen de pami yo ki pase devan, ⁶¹ epi yo di: “Misye^[a] te di: Mwen gen pouvwa pou m detwi tanp Bondye a, epi rebati l nan twa jou.”

⁶² Lè sa a, Granprèt la leve kanpe epi l di Jezi: “Ki sa w di sou akizasyon sa yo? Èske sa yo di a se vre?” ⁶³ Men pèsòn pa t ka rache yon mo nan bouch Jezi.

Granprèt la di Jezi ankò: “Nan non Bondye vivan an, m ap mande w pou di m tout verite a. Di m non: èske se ou menm ki Mesi a, pitit Bondye a?”

⁶⁴ Jezi reponn li: “Sa ou di a se sa. Men kite m di w yon bagay: Nou gen pou n wè Pitit Lòm nan sou tèt nyaj yo k ap desann sou latè avèk anpil pouvwa ak gwo onè.”

⁶⁵ Lè sa a Granprèt chire rad sou li, epi l di: “Li derespekte Bondye. Ki lòt prèv nou bezwen ankò? Nou fèk tande ak de zòrèy nou kijan l pa gen okenn respè pou Bondye. ⁶⁶ E nou menm, sa nou di?”

Yo reponn li: “Li merite lanmò.”