Matay 18

Ne Bibliaj Tik Nawat

—Katiawel ne mas wey ijtik ne tatekimakalis ipal ne ilwikak?

—Kia nimetzinhilwia, asu inte anmuishkwepat wan anmuchiwat ken ne kukunetzitzin, inte anyawit kalakit ijtik ne tatekimakalis ipal ne ilwikak. ⁴ Yajika, ká ne mutemultia ken ini kunetzin, yajane ne achtu ijtik ne tatekimakalis ipal ne ilwikak, ⁵ wan ká ne kikwi se kunetzin ken yajini tik nutukay, najasan nechkwi.

⁶ Ká ne kitekukujmati se pal ini chijchikitik nechyulmatit, mas yek ma mupilu se burrojmetat itech ikechkuyu wan ma atuki tik ne miktan at.

⁷ Ay! pobrej taltikpak ipanpa ne tajtatzunchaluas. Senpa nemisket tajtatzunchaluas; saman ne takat ká kalwika ne tatzunchaluas, ay pobrej!

⁸ Asu ne mumey o ne mukshi metztekukujmati, shikutuna wan shiktamima wejka. Mas yek ma shiyultuk makutu o metzkelu wan te ma metztamutakan wan ume mumey wan ume mukshi tik ne tit pal senpa! ⁹ Wan asu se muish metztekukujmati, shikwiwita wan shiktamima wejka. Mas yek ma shiyultuk ishpupuyut wan te ma shikpia ume muish wan ma metztamutakan ka miktanshaput kan tata.

¹⁰ Shikitakan ma inte shikijilwikan nian se pal ini chijchikitik, ika nimetzinhilwia ka ne tanawatianimet ne kinpalewiat ka ikajku kitat nemit ne ishkalyu ne Nuteku pal ne ilwikak. ⁽¹¹⁾ . ¹² Tay anhinat: su se takat kipia sentzunti ichkat wan se yejemet kipulua ne ujti, yaja yawi kinhajkawa ne sejseuk tik ne tepet pal yawi kitemua ne se pulijtuk, o inte? ¹³ Wan asu kiajsi, kia nimetzinhilwia ka pajpakiskia mas ipanpa yajuni que inpanpa ne nawpual-kashtul-nawi ne inte pulijtiwit. ¹⁴ Ijkiuni tel, Anmuteku ka ikajku inte kielewia ma wilewi nian sechin pal ini chijchikitik.

¹⁵ Asu se muiknew metztateyekchiwilia, shu shikajajwa musel ijtik taja wan yaja. Su metzkaki, timukwepa tikpia muiknew. ¹⁶ Su inte kineki metzkaki, shikwika se o ume tukniwan pal kiane, su ume o yey inat, ma naka ijkiunisan. ¹⁷ Asu nusan inte kinkaki, shu-shikilwi ne sennemit. Asu inte takaki kenhayuk, ma kenha ken se pal tepal techan wan kenha ken ne tumintepewani. ¹⁸ Kia nimetzinhilwia: muchi tay ankilpiat pak ne tal ilpituk nemis tik ne ilwikak, wan muchi tay ankisutumat pak ne tal sutuntuk nemis tik ne ilwikak. ¹⁹ Senpa nimetzinhilwia ka su mutajtani se pal mumati, wan su ume anmejemet annankiliat kenha, inpal ne Nuteku ka ikajku kichiwas ken annankilijket, ²⁰ ika nujme kan ume o yey musentepejtiwit tik nutukay, uni ninemi intzalan.

—Tajtzin, hasta keski wipta weli ma nechchiwili nuiknew tay te yek wan ma niktapupulwi kenhayuk? Anka chikume?

—Inte nimetzilwia chikume wipta, asunte chikume wan chikume wan uk chikume wipta!

²³ Yajika nina ka ne tatekimakalis ipal ne ilwikak ken se tatuktiani ká kinekik kichiwa ne tapualis pal kita keski kiwikiliat ne itejtekitini. ²⁴ Pejki, wan kalwikaket se tawikilia sujsul. ²⁵ Yaja inte kipiatuya pal kitashtawia, yajika ne itekuyu tatuktij ma kinnamakakan yaja wan ne isiwaw wan ne ipilawan wan muchi tay ipal, wan ma kitashtawikan. ²⁶ Ne tekitini mutamutak talchi mutankwaketza wan kilwij ne tatuktiani:

    "Nimetztajtani, semaya shitejchia achi wan niaw nimetztashtawia muchi."

²⁷ Ne itekuyu kitasujtak, yajika kichulultij wan kielkaw muchi ne ijaranaj. ²⁸ Wan kwak kiski yajuni, kinamik se ikunpa ká kiwikilia katka ankakeski pesojchin, wan pejki kikechpachua, ina:

    "Shinechtashtawi tay ne tinechwikilia!"

²⁹ Ne ikunpa mutamutak talchi mutajtawelia, ina:

    "Nimetztajtani, semaya shitejchia achi wan niaw nimetztashtawia muchi."

³⁰ Inte kinekik tejchia; kitentzak hasta ma kikwepili ne ijaranaj. ³¹ Kwakuni ne ikunpawan kitaket tay panutuk wan sea mukwalantijket, wan ajsiket itech ne intekuyu kinawatiat muchi tay panutuk. ³² Kwakuni ne tajtzin kalnutzki ne tekitini wan kiajwa, ina:

    "Tay ini tikchijtuk? Naja nikelkaw muchi ne mujaranaj ika taja tinechtajtan. ³³ Taja nusan nemi pal tikpalewia mukunpa, kenha ken nimetzpalewij!"

³⁴ Sujsul kwalanik ne itekuyu, wan tatuktij ma kilpikan tik ne tatzakwiluyan hasta ma kikwepa muchi ijaranaj.

³⁵ Ijkiuni ne Nuteku ipal ne ilwikak nusan yawi metzinchiwilia su inte antetapupulwiat ijtik ne anmuyujyulu tay ne anmukniwan kichijtiwit anmuwan.