—Shiktalikan cuidadoj ma inte shikchiwakan tay yek ishpan muchi pal ma metzinhitakan, ika asu ijkiuni inte ankikwisket anmupatiw itech Anmuteku ka ikajku.

² Yajika, kwak titasujtatakulia maka shu-shitatzutzuna muishpan ken kichiwat ne tensasalmet tik ne kalsennemit wan tik ne ujti pal muchi kimatit; kia nimetzinhilwia ka yejemet kipiata ne inpatiw. ³ Taja kwak titasujtatakulia, ma inte kimati ne se mumey tay kichiwa nemi ne seuk, ⁴ pal ma shitasujtatakuli ichtaka, wan ne Muteku ne kita muchi yawi metztashtawia.

⁵ Wan kwak ankinutzat ne Teut, maka shipanukan ken ne tensasalmet ne kinhajwiak tanujnutzat tik ne kalsennemit wan tik ne ujujti pal muchi tachiat. Kia nimetzinhilwia, kipiata ne inpatiw. ⁶ Taja kwak tiknutza ne Teut, shimutentzakwa ijtik ne mucuartoj wan shiknutza ichtaka Muteku ka ikajku, wan Muteku ne kita muchi yawi metzmaka tay tiktajtani. ⁷ Kwak ankinutzat ne Teut maka shitenpupulukakan kenha ken muchi ne tejtechan ika inat ka asu taketzat wey ne Teut yawi kinkaki. ⁸ Maka shipanukan ken yejemet tel, ika Anmuteku kimatiaya tay anmunekit achtu ka ankitajtanit. ⁹ Yajika, ijkini shiktajtanikan ne Teut:

    "Tuteku ka ikajku,

    ma inakan ka wey mutukay,

¹⁰     ma wiki mutatekimakalis,

    ma muchiwa mutaelewilis,

    ken tik ilwikak, nusan tik ne tal;

¹¹     shitechmaka tik ini tunal tutamal pal timutekipanuat;

¹²     wan shitechtapupulwi tujajjaranaj

    ken tejemet nusan tikelkawat ká techwikiliat;

¹³     wan maka shikajkawa ma techejekukan,

    wan shitechmakishti itech tay te yek."

¹⁴ Ika asu ankielkawat tay kichijtiwit ne seki tay inteyek, Anmuteku pal ikajku nusan kielkawas tay ankichijtiwit. ¹⁵ Asu inte ankielkawat tay kichijtiwit ne seki, ne Anmuteku nusan inte yawi kielkawa tay ankichijtiwit.

¹⁶ Kwak ankisejseliat mayan, ma inte muita ne anmutachialis pobrejchin ken ne tensasalmet, ne mutaliat ishshujshupilnaj pal kilwitiat ka majmayanat nemit. Kia nimetzinhilwia ka yejemet kipiata ne inpatiw. ¹⁷ Taja kwak tikselia mayan, shiktzikwasti mutzunkal wan shimuishpaka ¹⁸ pal te mumati ka timayana, sema ne Muteku ká inte tikitat yawi kimati wan Muteku ne kita muchi metztashtawis.

¹⁹ Maka shikanakan chajchalchiwit ijpak ne tal kan mayat wan kwilin kipuluat wan kan techtekinimet kaltapanat wan kichtekit; ²⁰ shikanakan chajchalchiwit tik ne ajku kan nian mayat nian kwilin kipuluat, wan kan techtekinimet inte kaltapanat nian techtekit, ²¹ ika kan nemi anmuchalchiw, unisan nemi anmuyulu.

²² Ne itawilyu ne muweyka ne muish. Yajika asu ne muish tachia yek, muchi ne muweyka nusan mutawilua. ²³ Asu ne muish inte tachia yek, muchi ne muweyka yawi kunyua. Asu ne tawil ijtik taja kunyua, ne kunyua keski tel!

—Inte aka weli tekiti pal ume itekuyu, ika kishijias ne se wan kitasujtas ne seuk, wan asu inte, kitajpias ne se wan kijilwis ne seuk. Inte welit antekitit ipal ne Teut wan ipal ne tumin.

²⁵ Yajika nimetzinhilwia: ma inte metzinyulkakasu tay anyawit kikwat wan kiunit nian taiwan anyawit mutzakwat: weli mas tualmaj que ne takwal, wan weli mas tuweyka que tukwajkwach.

²⁶ Shikitakan ne tujtutut patanit ka ikajku: yejemet inte tatukat nian tapishkat nian tatepewat tik shajkal, wan ne Anmuteku ka ikajku kintakwaltia. Wan mas anmupatiw anmejemet que yejemet! ²⁷ Wan melka yaja sujsul yulkakasiwiskia, katiawel pal anmejemet weli kipetewa ne iweyka nian se chiupichin?

²⁸ Wan taika metzinyulkakasua anmukwajkwach? Shimumachtikan tech ne shujshuchit pal ne kojtan. Shikitakan ken mutiskaliat: nian kujkutiat, nian ichmalinit; ²⁹ nimetzinhilwia ka nian ne wey Shalomo mutakentij galantzin ken se yejemet! ³⁰ Asu ne Teut kitakentia ijkiuni hasta se sakat ipal ne taweykan ne ashan nemi wan musta yasneki tik tit, ken ka inte yawi metzintakentia sujsul mas? Anmejemet inte ankipiat tayulmatilis!

³¹ Yajika, maka shimuyulkakasukan, maka shinakan: "Tay tiawit tikwat?" wan "Tay tiawit tikunit?" wan "Tay tiawit tiktaliat ijpak tuweyka?" ³² ken muishtemuat muchi ne tejtechan, ika kimatiaya Anmuteku ka ikajku ka anmunekit muchi uni. ³³ Shiktemukan achtu ne itatekimakalis ne Teut wan ne tay yek, wan muchi uni yawi metzintalilia. ³⁴ Yajika, ma inte metzinyulkakasu ne musta, ka ne musta isel yulkakasiwis! Techajsi iwan ne pejpenaj ipal ne tunal pal ashan!