² Israeli anene kuti:
    “Chikondi chake ndi chosatha.”
³ Banja la Aaroni linene kuti,
    “Chikondi chake ndi chosatha.”
⁴ Iwo amene amaopa Yehova anene kuti:
    “Chikondi chake ndi chosatha.”

⁵ Ndili mʼmasautso anga ndinalirira Yehova,
    ndipo Iye anayankha pondichotsa mʼmasautsowo.
⁶ Yehova ali nane; sindidzachita mantha.
    Munthu angandichite chiyani?
⁷ Yehova ali nane; Iye ndiye thandizo langa.
    Ndidzayangʼana adani anga mwachipambano.

⁸ Nʼkwabwino kuthawira kwa Yehova
    kusiyana ndi kudalira munthu.
⁹ Nʼkwabwino kuthawira kwa Yehova
    kusiyana ndi kudalira mafumu.

¹⁰ Anthu a mitundu yonse anandizinga,
    koma mʼdzina la Yehova ndinawawononga.
¹¹ Anandizinga mbali zonse,
    koma mʼdzina la Yehova ndinawawononga.
¹² Anandizinga ngati njuchi,
    koma anatha msanga ngati moto wapaminga;
    mʼdzina la Yehova ndinawawononga.

¹³ Anandikankha uku ndi uko ndipo ndinali pafupi kugwa,
    koma Yehova anandithandiza.
¹⁴ Yehova ndiye mphamvu yanga ndi nyimbo yanga;
    Iye wakhala chipulumutso changa.

¹⁵ Mfuwu wachimwemwe ndi chipambano
    ukumveka mʼmatenti a anthu olungama mtima kuti:
“Dzanja lamanja la Yehova lachita zamphamvu!
¹⁶     Dzanja lamanja la Yehova latukulidwa mmwamba
    Dzanja lamanja la Yehova lachita zamphamvu!”

¹⁷ Sindidzafa koma ndidzakhala ndi moyo
    ndipo ndidzalalika za ntchito ya Yehova.
¹⁸ Yehova wandilanga koopsa,
    koma sanandipereke ku imfa.

¹⁹ Tsekulireni zipata zachilungamo,
    kuti ndifike kudzayamika Yehova.
²⁰ Ichi ndicho chipata cha Yehova
    chimene olungama mtima okha adzalowerapo.
²¹ Ndidzakuyamikani chifukwa Inu munandiyankha;
    mwakhala chipulumutso changa.

²² Mwala umene amisiri omanga nyumba anawukana
    wasanduka wapangodya;
²³ Yehova ndiye wachita zimenezi
    ndipo nʼzodabwitsa pamaso pathu.
²⁴ Lero ndiye tsiku limene Yehova walipanga;
    tiyeni tikondwere ndi kusangalala nalo.

²⁵ Inu Yehova, tipulumutseni;
    Yehova, tipambanitseni.
²⁶ Wodala amene akubwera mʼdzina la Yehova.
    Tikukudalitsani kuchokera ku nyumba ya Yehova.
²⁷ Yehova ndi Mulungu,
    ndipo kuwala kwake kwatiwunikira Ife.
Lowani nawo pa mʼdipiti wa ku chikondwerero mutanyamula nthambi mʼdzanja lanu,
    mpaka ku nyanga za guwa.

²⁸ Inu ndinu Mulungu wanga, ndipo ndidzakuyamikani;
    Inu ndinu Mulungu wanga, ndipo ndidzakukwezani.

²⁹ Yamikani Yehova chifukwa ndi wabwino;
    pakuti chikondi chake chosasinthika ndi chosatha.