Marko 7

Nkwa Asem

Honhom mu ahotew

7 Da bi, Farisifo mpanyin bi ne mmara no akyerɛkyerɛfo fi Yerusalem baa Yesu nkyɛn bɛpɛɛ no asɛm. ² Woduu hɔ no, wohui sɛ n’asuafo no bi redidi a wɔanhohoro wɔn nsa, wɔ ɔkwan a Farisifo no fa so hohoro wɔn nsa, ansa na wɔadidi no so. ³ Na Yudafo no, ne titiriw no, Farisifo no, nnidi da gye sɛ wɔahohoro wɔn nsa ho nyinaa, sɛnea wɔn amanne kyerɛ, ansa na wɔadidi. ⁴ Na sɛ wofi gua so ba a, wɔhohoro wɔn nsa ansa na wɔadidi. Eyi yɛ mmara bebree a wofi tete adi so no mu baako. Na mmara no bi ne sɛ, wɔhohoro nkuruwa, asɛn ne nwowa mu.

⁵ Enti, mmara no akyerɛkyerɛfo no bisaa Yesu se, “Adɛn nti na w’asuafo no nni yɛn amanne a efi tete no so? Efisɛ, wodidi a, wonni kan nhohoro wɔn nsa sɛnea amanne kyerɛ no.”

⁶ Yesu buaa wɔn se, “Mo nyaatwomfo! Asɛm a Yesaia ka faa mo ho se, ‘Saa nnipa yi de wɔn ano na edi me ni, nanso wɔn koma mmɛn me ho babiara. ⁷ Wɔsom me kwa, na wɔn nkyerɛkyerɛ yɛ nnipa nsa ano mmara’ no yɛ nokware turodoo! ⁸ Mugyaw Onyankopɔn mmara a wahyehyɛ no de mo ankasa mo amanne si ananmu. ⁹ Moahyɛ da sɛ mobɛpo Onyankopɔn mmara no, na moatiatia so, ama mo amanne no atim.

¹⁰ “Ɛho nhwɛso bi ne sɛ, Mose nam Onyankopɔn a ɔde mmara a ɛka se, ‘Di wo agya ne wo na ni’ no maa mo! Ɔkae se, obiara a ɔbɛkasa atia n’agya anaa ne na no, ɛsɛ sɛ wokum no. ¹¹ Nanso, muse, eye sɛ obi bɛka akyerɛ n’agya anaa ne na a ade bi hia no no se, ‘Merentumi mmoa mo! Efisɛ, mede nea anka ɛsɛ sɛ mede ma mo no, ama Onyankopɔn.’ ¹² Enti, mubu Onyankopɔn mmara a ɔhyɛɛ no so, sɛnea ɛbɛyɛ a mubetumi abɔ mo amanne ho ban. ¹³ Eyi yɛ nhwɛso baako pɛ. Nanso, bebree ka ho.”

¹⁴ Afei, Yesu frɛɛ nnipakuw no baa ne nkyɛn, ka kyerɛɛ wɔn se, “Mo nyinaa muntie asɛm a mereka yi yiye, na monte ase. ¹⁵ Ade biara a ɛkɔ onipa mu no, ngu ne ho fi. Na mmom, nea ebefi onipa mu aba no, na egu ne ho fi. ¹⁶ Nea ɔwɔ aso a obetie no ntie.”

¹⁷ Afei, Yesu fii nnipakuw no mu kɔɔ fie no, n’asuafo no bisaa no asɛm a ɔkae no ase.

¹⁸ Obisaa wɔn se, “Mo nso monte asɛm a mekae no ase? Munhu sɛ, nea mudi no ngu mo ho fi anaa? ¹⁹ Efisɛ, nea mudi biara no ne mo koma nni hwee yɛ, na mmom, ɛfa ɔyafunu no mu kɛkɛ.”

²⁰ Ɔtoaa so se, “Nea mudwen no na ɛhaw ɔkra no. ²¹ Afei, nea efi nnipa koma mu ba no, ɛde adwemmɔne, korɔn, awudi, aguamammɔ, ²² adifudepɛ, amumɔyɛ, nsisi, ahohwi, anibere, abususɛm, ahantan ne nkwaseasɛm ba. ²³ Saa nnebɔne yi nyinaa fi onipa mu na ɛba, na ɛnonom na egu onipa ho fi a, enti ɛmma ɔmfata Onyankopɔn anim no.”

Ɔbea bi gyidi

²⁴ Yesu fi hɔ no, ɔkɔɔ Tiro ne Sidon fam pɛe sɛ ɔkɔhyɛ hɔ komm a, obiara nte ne nka, nanso anyɛ ye. Da a oduu hɔ ara pɛ, na nkurɔfo tee ne nka sɛ waba hɔ.

²⁵ Ɛhɔ ara na ɔbea bi a hohommɔne hyɛ ne babea ketewa bi mu baa ne nkyɛn. Na wate Yesu nka enti, obebuu no nkotodwe. ²⁶ Ɔbea no srɛɛ no sɛ ontu saa hohommɔne no mfi ne ba no mu mma no. Na saa ɔbea yi yɛ Siro - Foinikeni.

²⁷ Yesu ka kyerɛɛ no se, “Ɛsɛ sɛ mma mee ansa. Na enye sɛ wɔde mma aduan ma akraman.”

²⁸ Ɔbea no nso buaa no se, “Owura, ɛyɛ nokware de, nanso ɛyɛ a wɔde aduan a aka wɔ mmofra no prɛte mu no bi ma akraman a, wɔhyehyɛ ɔpon no ase no.”

²⁹ Yesu ka kyerɛɛ no se, “Wo mmuae pa no nti, masa wo babea no yare. Kɔ fie. Hohommɔne no afi ne mu afi.”

³⁰ Oduu fie no, ohui sɛ ne babea no da mpa so dinn a, honhommɔne no afi ne mu ampa ara.

Mumu sotifo bi ayaresa

³¹ Yesu fi Tiro no, ɔfaa Sidon mansin a emu nkurow yɛ du no so, beduu Galilea po so. ³² Wɔde ɔsotifo bi a ɔsan yɛ mumu brɛɛ no. Wɔn a wɔwɔ hɔ no nyinaa srɛɛ Yesu sɛ, ɔmfa ne nsa nka ɔyarefo no, na ɔnsa no yare.

³³ Yesu soo ne mu de no fii nnipakuw no mu. Afei, ɔde ne nsateaa hyɛɛ ɔbarima no asom, tew ntasu de kaa ne tɛkrɛma. ³⁴ Ɔhwɛɛ soro, guu ahome teɛɛm se, “Hefata!” Ase ne Bue. ³⁵ Amonom hɔ ara, ɔbarima no tumi tee asɛm, kasae!

³⁶ Yesu bɔɔ nnipakuw no ano se, wɔmmɔ asɛm no dawuru nkyerɛ obiara. Nanso, mpɛn dodow a ɔbraa wɔn no, na trɛw ara na wɔn nso wɔretrɛw asɛm no mu. ³⁷ Saa asɛm yi maa wɔn ho dwiriw wɔn yiye. Enti, wɔkae se, “Yesu yɛ biribiara yiye. ɔma asotifo te asɛm, na mumu nso kasa!”