मरकुस 15:1-5

Awadhi Bible: Easy-to-Read Version

ईसू क पिलातूस क समन्वा पेसी

(मत्ती 27:1-2,11-14; लूका 23:1-5; यूहन्ना 18:28-38)

15 जइसे ही भिंसार भवा, मुख्ययाजकन, धरम सास्तिरियन, बुजुर्ग यहूदी नेतन अउर समूची यहूदी महासभा एक ठु खाका बनाएन। उ पचे ईसू क बाँधिके लइ गएन अउर ओका पिलातुस क सौंप दिहेन।

² पिलातुस ओसे पूछेस, “का तू यहूदियन क राजा अहा?”

ईसू जबाव दिहेस, “अइसा ही अहइ। तू खुदइ कहत अहा।”

³ फिन मुख्ययाजकन ओह पइ बहोत स दोख मढ़ेस। ⁴ पिलातुस ओसे फिन पूछेस, “का तोहका जबाव नाहीं देइ क अहइ? देखा, उ पचे केतॅनी बातन क दोख तोह पइ लगावत अहइँ।”

⁵ मुला ईसू अबहुँ कउनो जबाव नाहीं दिहस। एह पइ पिलातुस क बहोतइ अचरज भवा।