Kolosay 2

Ne Bibliaj Tik Nawat

2 Ika nikneki ma shikmatikan keski tasumalis nikpia anmupanpa wan ipanpa ne tukniwan ipal Laodikea wan sejseuk ká te kitztiwit ne nuishkalyu, ² pal muyulpaktiat, sejsenputzujtuk ijtik tetasujtalis wan ijtik muchi tay tikpiat kwak tikmatit ne yekkaya, pal muishmati ne ichtaka ipal ne Teut Mawaltijtuk. ³ Ijtik yaja nemit muchi ne chajchalchiwit ipal ne tamatilis wan taishmatilis mijminashtuk. ⁴ Ini nina pal te aka metzinshijshikua iwan inpajpalabraj, ⁵ ika melka te ninemi iwan nuweyka, iwan nuijiu ninemi anmutech wan nipaki nikita ken annemit wan ken chikawaya ne anmutayulmatilis ipal ne Mawaltijtuk.

⁶ Yajika, kenha ken ankikwijtiwit ne Mawaltijtuk Yeshu, ne Tajtzin, ijkiuni shinejnemikan ijtik Yaja. ⁷ Shikpiakan anmunelwayu ijtik Yaja, wan shimukejketzakan ijpak Yaja, wan ma wey anmutayulmatilis, ken metzinmachtijtiwit, wan shitamakakan panpadiush wey.

⁸ Shiktalikan cuidadoj ma inte aka metzinhitzki iwan ne tamatilis wan tashijshikulis te tatka ipatiw, ne kistuk itech tay ne inat katka ne takamet wan tay ne nemi tik ne taltikpak, wan te itech ne Mawaltijtuk, ⁹ ika ijtik Yaja muchantia muchi ne yekawilis ipal ne Teukayu ken se kipia iweyka; ¹⁰ wan shimuchiwakan yejyekawtuk tik Yaja ká ne itzuntekun ipal muchi ne tajtajtuli wan muchi ne tatuktilis. ¹¹ Anmejemet nusan anmuyawaltektiwit ijtik Yaja iwan ne tayawaltekilis ne inte techishtiliat itech ne inakayu ne tuweyka iwan ijimey se sute iwan ne itayawaltekilis ne Mawaltijtuk. ¹² Anmusentalpachujtiwit iwan Yaja tik ne teulyujmakalis, wan ijkiuni nusan anmusenyulkwijtiwit ika ankiyulmatit ne itekitilis ne Teut ne kiyulkwiltij kwak miktuk. ¹³ Wan anmejemet ká miktuyat ipanpa tay ankichijtiwit tay teyek wan ne anmutzuntepul ipal ne anmunakayu, Yaja metzinyulkweptuk iwan wan kitapupulwijtuk muchi tay ankichijtiwit. ¹⁴ Kipulujtuk ne tay mutuktij wan mujkwiluj anmupal tay teyek wan kishtij uni tatajku wan kitepustukak tik ne cruz. ¹⁵ Kipetztilijtuk ne tatuktianimet wan ne tatekimakat, ken muchi kimatket wan tajtaketzket ipanpa, wan ijkiuni kipishki victoriaj inhijpak.

¹⁶ Yajika, ma te aka metzintenewa ipanpa tay ankikwat nian tay ankiunit nian ipanpa se ilwit nian ne Selekmetzti nian ne tunal ipal sewilis. ¹⁷ Muchi uni iekawyu ne musta, ne iweyka ne Mawaltijtuk. ¹⁸ Ma te aka metzinhishtili anmupatiw ká kineki mutalia iwan kanawakmatilis wan tayulmatilis ipal tanawatianimet ne kinhitztuk pashaluat: ne tamatilis ipal inakayu kishpitza iwan te-tatka, ¹⁹ wan te weli kipachua ne itzuntekun, wan muchi ne iweyka kishtia itakwal wan nemi piktuk itech ne itzuntekun iwan ne tajtakutun ijilpituk, wan weya ken weya ne Teut. ²⁰ Su anmiktiwit iwan ne Mawaltijtuk ipal muchi tay ipal ne taltikpak, taika anmutuktiat ken su yujyultuk tik ne taltikpak: ²¹ maka shitzinkisa, maka shikejeku, maka shikmatuka? ²² Muchi uni nemi pal puliwi ken mukwi ken inat ne intajtatuktilis wan intajtamachtilis ne takamet. ²³ Melka yajuni muita ken kipiaskia tamatilis ipanpa tayulmatilis wan kanawakmatilis wan ika takwawak ipal ne iweyka, tesu tatka ipatiw wan sema ne tunakayu ishwi.