Jesus Promise Fo Send Godʼs Spirit

1 Aloha, Teofilus! I wen write one nodda book fo you befo, an I tell you all da stuff dat Jesus wen do an teach from da start, ² till da time God take him up inside da sky. Befo he go up, he tell da guys dat he wen pick fo send all ova, wat dey gotta do. Godʼs Spesho Spirit wen tell him all dat. ³ Now, afta Jesus wen suffa, he let da guys dat he wen pick see him, an he prove dat he stay alive fo real. He stay show up by dem fo forty days, an wen tell dem how everyting stay wen God stay King.

⁴ One time wen Jesus wen stay wit his guys, he tell dem, “No go way from Jerusalem, but wait ova hea till you guys get da Spirit my Fadda wen promise fo send. You guys wen hear me tell bout dat Spirit. ⁵ Befo time, John Da Baptiza Guy wen baptize peopo wit water, but pretty soon God goin baptize you guys diffren kine: he goin let his Spesho Spirit take charge a you.”

Jesus Go Up Inside Da Sky

⁶ One time, da guys dat Jesus wen pick wen come togedda wit him, an dey aks him, “Boss, you goin come King now fo da Israel peopo, jalike had king befo time?”

⁷ He tell dem, “Not yoa kuleana fo know da time o da day da Fadda wen pick. He da One goin do dat. ⁸ But you guys goin get spesho kine power wen Godʼs Spesho Spirit take charge a you. An den you guys goin tell da peopo in Jerusalem wat you know bout me, an da peopo all ova Judea, Samaria, an all ova da world.” ⁹ Afta he wen say dat, God wen take him up in front dem, an den one cloud wen move unda him, so dey no can see him no moa.

¹⁰ Dey still stay looking in da sky real good wen he stay going, an right den an dea two guys wit white clotheses wen stand by dem. ¹¹ Dey say, “You guys from Galilee, how come you stay standing hea an stay looking in da sky? Dis guy Jesus, God wen take him from you, up inside da sky. He goin come back da same way you wen see him go.”

Dey Pick One Guy Fo Take Judas Place

¹² Den da guys Jesus wen pick wen go way from Olive Ridge, an go back Jerusalem, bout half mile. ¹³ Wen dey wen come, dey all go da place upstairs wea dey was staying. Had

¹⁴ Plenny times dey all pray togedda, wit da wahines, an Jesus mudda Mary, an his bruddas.

¹⁵ Dat time had like hundred twenty peopo dat trus Jesus. Dey wen come togedda, an Peter wen stand up fo talk. ¹⁶ He say, “Bruddas an sistas, da Bible come true awready, an dass how gotta be. King David wen tell long time ago bout da guy Judas, cuz Godʼs Spesho Spirit wen tell David all dat. Judas, he da guy wen bring da guys dat bus Jesus, an wen show dem who him. ¹⁷ But Judas, he wen come from us guys an he wen work wit us.”

¹⁸ (Now, da guys dat like kill Jesus wen give Judas money fo da bad ting he goin do, an he wen go buy one field. But he wen fall down dea, an he bus open, an his guts all come out. ¹⁹ An everybody inside Jerusalem hear bout dat, so dey wen name da field “Akeldama,” dat mean “Blood Field.”)

²⁰ An den Peter say, “David wen write down inside da Songs Fo God,

An David wen write too,

²¹ “So, we gotta pick one guy dat wen stay wit us da whole time Jesus da Boss wen come an den go from us, ²² from da time John wen baptize him, till he go up to da sky. One a da guys gotta go wit us fo tell how Jesus wen come back alive again.”

²³ So, dey pick two guys: Joseph, da guy dey name Barsabbas o Justus, an Mattias. ²⁴ Den dey aks God fo help dem, an say, “Boss, you know how everybody stay inside. Show us da guy you wen pick from da two guys, ²⁵ so he can work fo you an tell bout you, cuz Judas no stay. Judas wen go da place dass fo him.” ²⁶ Den dey wen make jalike Jun Ken A Po kine, an Mattias wen win, so he wen come togedda wit da eleven guys dat Jesus wen send all ova.