Eb lix tzolom laj Juan queˈxcˈul li Santil Musikˈej aran Efeso

19  Nak laj Apolos cuan Corinto laj Pablo quinumeˈ saˈ eb li naˈajej toj quicuulac Efeso. Ut aran quixtauheb jun chˈu̱taleb laj pa̱banel. ² Quixye reheb: ―¿Ma quecˈul li Santil Musikˈej nak quexpa̱ban? chan laj Pablo reheb. Ut eb aˈan queˈxye: ―Incˈaˈ nakanau nak cuan ta li Santil Musikˈej, chanqueb. ³ Ut laj Pablo quixye reheb: ―¿Chanru nak quicubsi̱c e̱haˈ? Eb aˈan queˈxye: ―Li cubi haˈ li xkacˈul, aˈan li quixba̱nu laj Juan, chanqueb. ⁴ Laj Pablo quixye reheb: ―Laj Juan quixcubsiheb xhaˈ li queˈxyotˈ xchˈo̱l ut queˈxjal xcˈaˈux. Quixye reheb nak teˈpa̱ba̱nk saˈ xcˈabaˈ li Jesucristo li tol‑e̱lk mokon, chan. ⁵ Nak queˈrabi aˈan, queˈxtzˈa̱ma li cubi haˈ ut quicubsi̱c xhaˈeb saˈ xcˈabaˈ li Ka̱cuaˈ Jesús. ⁶ Laj Pablo quixqˈue li rukˈ saˈ xbe̱neb ut queˈxcˈul li Santil Musikˈej. Queˈa̱tinac saˈ jalan a̱tinoba̱l ut queˈxye resil li cˈaˈru quicˈutbesi̱c chiruheb xban li Dios. ⁷ Cuanqueb tana cablaju chi cui̱nk li queˈpa̱ban saˈ xya̱nkeb.

Eb laj pa̱banel queˈxtiquib xchˈutubanquil ribeb chi lokˈoni̱nc aran Efeso

⁸ Chiru oxib po laj Pablo quixchˈolob li xya̱lal chiruheb laj Efeso chi ma̱cˈaˈ xxiu saˈ li cab li nequeˈxchˈutub cuiˈ ribeb laj judío. Quixyal xkˈe xcˈutbal chi tzˈakal lix ya̱lal lix nimajcual cuanquilal li Dios. ⁹ Cuanqueb li queˈxcacuubresi xchˈo̱leb ut incˈaˈ queˈraj pa̱ba̱nc. Queˈoc chixmajecuanquil li evangelio chiruheb chixjunileb. Joˈcan nak laj Pablo quixcanab xchˈolobanquil li xya̱lal aran saˈ li cab li nequeˈxchˈutub cuiˈ ribeb laj judío. Ut quixcˈameb laj pa̱banel chirix. Rajlal cutan quixcˈut li xya̱lal chiruheb saˈ li cab li natzoloc cuiˈ jun li cui̱nk aj Tirano xcˈabaˈ. ¹⁰ Cuib chihab quixba̱nu chi joˈcaˈin. Ut chixjunileb li cuanqueb Asia, eb laj judío, joˈeb ajcuiˈ li ma̱cuaˈeb aj judío, queˈrabi li ra̱tin li Ka̱cuaˈ Jesús. ¹¹ Ut li Ka̱cuaˈ Dios quixqˈue xcuanquil laj Pablo chixba̱nunquil li sachba chˈo̱lej. ¹² Usta caˈaj cuiˈ lix tˈicr ut lix sut laj Pablo nequeˈxqˈue saˈ xbe̱neb li yaj, nequeˈqˈuira. Ut nequeˈel li ma̱us aj musikˈej riqˈuineb. ¹³ Cuanqueb aj judío nequeˈxye nak nequeˈxnau risinquileb li ma̱us aj musikˈej ut nequeˈxbeni ribeb chixba̱nunquil. Queˈxyal xpatzˈbal xcˈabaˈ li Ka̱cuaˈ Jesús saˈ xbe̱neb li cuan ma̱us aj musikˈej riqˈuineb ut queˈxye: ―Saˈ xcˈabaˈ li Jesús li naxjultica laj Pablo, tinye e̱re elenkex riqˈuin li cui̱nk aˈan, chanqueb. ¹⁴ Cuukubeb chi cui̱nk li yo̱queb chi ba̱nu̱nc re aˈin. Ralaleb jun li cui̱nk aj judío, aj Esceva xcˈabaˈ. Aˈan li xbe̱nil aj tij. ¹⁵ Saˈ jun li cutan jun li ma̱us aj musikˈej quichakˈoc ut quixye reheb: ―Ninnau ani li Jesús, ut ninnau ajcuiˈ ani laj Pablo. Ut la̱ex, ¿anihex? Ut ¿ani xqˈuehoc e̱cuanquil chi isi̱nc ma̱us aj musikˈej? chan reheb. ¹⁶ Li cui̱nk li cuan ma̱us aj musikˈej riqˈuin, quixcut rib saˈ xbe̱neb. Aˈan kˈaxal cuiˈchic cau rib chiruheb. Tacuasinbileb ut pejeleb chic li rakˈeb nak queˈe̱lelic saˈ li cab aˈan. ¹⁷ Chixjunileb li cuanqueb Efeso queˈrabi resil li cˈaˈru quicˈulman, joˈ aj judío joˈ eb ajcuiˈ li ma̱cuaˈeb aj judío. Quichal xxiuheb chixjunileb ut kˈaxal cuiˈchic queˈxqˈue xlokˈal li Ka̱cuaˈ Jesús. ¹⁸ Ut nabaleb li queˈpa̱ban queˈchal ut queˈxxo̱to lix ma̱queb chiru li Dios chiruheb chixjunileb li cuanqueb aran. ¹⁹ Nabaleb laj tu̱l queˈchal ut queˈxcˈam chak lix huheb li nacˈanjelac chiruheb re tu̱lac ut queˈxcˈat chiruheb chixjunileb li tenamit. Nak queˈxbir rix lix tzˈak chixjunil li queˈxcˈat, qui‑el laje̱b roxcˈa̱l mil (50,000) chi tumin plata. ²⁰ Ut li ra̱tin li Ka̱cuaˈ yo̱ chi e̱lc resil yalak bar ut yo̱ ajcuiˈ chi cˈutu̱nc xcuanquil li Dios. ²¹ Nak ac xnumeˈ chixjunil aˈin, laj Pablo quixcˈoxla xic toj Jerusalén, nak acak xbeni chak Macedonia ut Acaya. Quixye: ―Nak acak xinnumeˈ aran, tento ajcuiˈ tinxic Roma chirilbaleb laj pa̱banel li cuanqueb aran, chan. ²² Joˈcan nak quixtaklaheb Macedonia laj Timoteo ut laj Erasto, li nequeˈtenkˈan re. Ut laj Pablo toj quicana aran Asia.

Laj tenol chˈi̱chˈ xicˈ queˈrabi li cˈaˈru quixye laj Pablo

²³ Ut saˈ eb li cutan aˈan quiticla jun nimla chˈaˈajquilal xban nak nabaleb yo̱queb chixpa̱banquil li Dios. ²⁴ Jun li cui̱nk aj tenol plata, aj Demetrio xcˈabaˈ. Aˈan naxyi̱b riqˈuin plata li cocˈ ochoch re lix Diana lix dioseb. Ut nabal li tumin nequeˈxcˈul li nequeˈtrabajic rochben. ²⁵ Quixchˈutubeb chixjunileb li nequeˈcˈanjelac chiru joˈqueb ajcuiˈ chixjunileb laj tenol plata ut quixye reheb: ―La̱ex nequenau nak riqˈuin li cˈanjel aˈin nakaba̱nu, nakacˈul nabal li katumin. ²⁶ Ac e̱rabiom resil nak laj Pablo ac xtacchiˈi nabaleb li cuanqueb aran Efeso joˈ ajcuiˈ saˈ chixjunil li tenamit xcue̱nt Asia. Ac nequenau nak yo̱ chixyebal reheb nak moco dioseb ta li yal yi̱banbil xban cui̱nk. ²⁷ Ma̱re anchal ta̱sachk li kacˈanjel xban aˈan. Ut ma̱re anchal ta̱tzˈekta̱na̱k ajcuiˈ xlokˈal li rochoch lix Diana li kalokˈlaj dios. Ma̱re ta̱sachk lix cuanquilal li kadios li nequeˈxlokˈoni chixjunileb aran Asia, joˈ ajcuiˈ li cuanqueb saˈ chixjunil li ruchichˈochˈ, chan laj Demetrio. ²⁸ Ut eb li chˈutchˈu̱queb aran cˈajoˈ nak queˈjoskˈoˈ nak queˈrabi li cˈaˈru quixye. Queˈxjap reheb chixyebal: ―¡Nim xcuanquil lix Diana li kadios la̱o aj Efeso! chanqueb. ²⁹ Cˈajoˈ nak queˈjoskˈoˈ li tenamit. Incˈaˈ chic jultiqueb re cˈaˈru nequeˈxba̱nu. Jun xiquiqueb nak co̱eb chixsicˈbal laj Gayo ut laj Aristarco li queˈchal chak Macedonia rochben laj Pablo. Ut quelonbileb nak queˈcˈameˈ toj saˈ li naˈajej li nequeˈxchˈutub cuiˈ ribeb. ³⁰ Ut laj Pablo quiraj raj xic chi a̱tinac riqˈuineb li tenamit, abanan eb laj pa̱banel incˈaˈ queˈxcanab chi xic. ³¹ Cuanqueb cuib oxib li rami̱g laj Pablo li nequeˈcˈamoc be saˈ li tenamit. Aˈaneb aj Roma. Eb aˈan queˈxtakla xyebal re laj Pablo nak incˈaˈ ta̱xic saˈ li naˈajej li nequeˈxchˈutub cuiˈ ribeb li tenamit. ³² Chixjunileb li queˈxchˈutub ribeb aran yo̱queb chixjapbal reheb ut incˈaˈ chic jultiqueb re li cˈaˈru nequeˈxye. Lix qˈuialeb li tenamit incˈaˈ queˈxnau cˈaˈut nak queˈxchˈutub ribeb aran. ³³ Ut queˈrisi saˈ xya̱nkeb li tenamit laj Alejandro. Aˈan quixtaksi li rukˈ re teˈxcanab choki̱nc. Quiraj raj a̱tinac re xcolbal rib chiruheb li tenamit. ³⁴ Nak queˈril nak aˈan aj judío junaj xya̱b xcuxeb chixjunileb chixyebal: ―¡Nim xcuanquil lix Diana li kadios la̱o aj Efeso! chanqueb. Ut caˈchˈin chic ma̱ cuib o̱r queˈxjap reheb chixyebal aˈan. ³⁵ Nak ac xkˈunbesiheb li tenamit laj tzˈi̱b li nacˈanjelac saˈ po̱pol, quixye reheb: ―La̱ex aj Efeso, ¿ma cuan ta biˈ junak incˈaˈ naxnau nak li katenamit Efeso, aˈan li nacˈacˈalen re li rochoch lix Diana, li kalokˈlaj dios? Chixjunileb nequeˈxnau nak li jalam u̱ch aˈan chalenak chak saˈ choxa. ³⁶ Li kadios incˈaˈ ta̱ru̱k xsachbal ru. Joˈcan nak me̱qˈue e̱joskˈil. Cˈoxlahomak rix chi us li cˈaˈru te̱ba̱nu. ³⁷ ¿Cˈaˈut nak xecˈameb chak li cui̱nk aˈin arin? Eb aˈan incˈaˈ yo̱queb chixmuxbal ru le̱ dios, chi moco yo̱queb ta chixmajecuanquil. ³⁸ Cui ut laj Demetrio ut eb laj tenol chˈi̱chˈ li nequeˈcˈanjelac riqˈuin cuan junak ani teˈxjit, teto li po̱pol ut cuanqueb aj rakol a̱tin. Teˈjitok aran re nak ta̱ru̱k ta̱yi̱ba̱k ru lix chˈaˈajquilaleb. ³⁹ Cui ut te̱raj xcˈu̱banquil junak cˈaˈak re ru, takachˈutub kib ut saˈ xya̱lal takacˈu̱b ru. ⁴⁰ Anakcuan xiu xiu cuanco. Cui nocoeˈxjit riqˈuin li mululij ib yo̱co, ut cui eb laj Roma li nequeˈtaklan saˈ kabe̱n teˈxpatzˈ ke cˈaˈut nak yo̱co chixmululinquil kib, ma̱cˈaˈ naru takacol cuiˈ kib, chan. ⁴¹ Ut nak quirakeˈ chixyebal aˈin, quixchakˈrabiheb li tenamit.