Galatia 6

Ne Bibliaj Tik Nawat

Shikpalewi mukniwan

6 Nukniwan, melka se tay teyek kitzkia se wan yaja wetzi, anmejemet ká ipal ne Ijiutzin shikpalewikan yajuni pal mukwepa iwan se anmuijiu ipal yulyamanikayu, wan shimupajpachiwi ma te shimuejeku taja nusan. ² Shiksajsakakan anmukijkimil ne sejse ipal ne sejseuk, wan kiane anmutemasket ne itajtuli ne Mawaltijtuk, ³ ika su se kimati ka yaja wey wan yaja te tatka, mushijshikua. ⁴ Ma igustoj sejse itekiw, wan kwakuni yawi kipia taika muweymatiskia yajasan wan te ne seuk, ⁵ ika sejse kisajsaka ne ikimil isel.

⁶ Ne mumachtia ne palabraj, ma kipalewi ne tamachtia iwan muchi tay yejyek.

⁷ Maka shimushijshikukan, ka te welit tiajkawetzkat iwan ne Teut, ika ne ká tatuka, ijkiuni yawi tapishka. ⁸ Ika ne ká tatuka tik ne iweyka yawi kipishka itech iweyka puliwilis. Ne ká tatuka tik ne iijiu, yawi tapishka itech ne iijiu ma yultuk pal senpa. ⁹ Tejemet ká tikchiwat tay yek, ma te tikutiakan, ika kwak ajsi ne tunal ipal, su te timusewiat, tiawit titapishkat. ¹⁰ Yajika, ken tiwelit tikchiwakan tay yek iwan muchi, wan keski mas iwan ne tumiakwan ipal ne tayulmatilis.

Pal tami

¹¹ Shikitakan ken wejwey ini letraj ne nikijkwilua anmupal iwan ne numey. ¹² Muchi ne ká kinekit muishyektzinchiwat tik inweyka, yejemet metzinhilwiat ma shimuyawaltekikan semaya pal te mutalultiat ipanpa ne icruz ne Mawaltijtuk, ¹³ ika nian yejemetsan ne muyawaltektiwit tajpiat ne tajtuli, sute yejemet kinekit ma shimuyawaltekikan pal muweymatit ipanpa ne anmunakayu. ¹⁴ Naja te keman nimuweymatis, sute sema ipanpa ne icruz ne tutajtzin Yeshu Mawaltijtuk. Ipanpa mucruzpilujtuk nupal ne taltikpak, wan naja ipal ne taltikpak nusan. ¹⁵ Ika ne tayawaltekilis yaja inte tatka, wan ne tzuntepul nusan inte tatka; ashan muchijtuk se ká yankwik, ¹⁶ wan muchi ká ne taksasket kan ina ini tajshitilis, ma nemikan yek wan ma mupalewikan, wan ne Israel ipal ne Teut kenhaya.

¹⁷ Pal tami, ma te aka nechkakasu, ika naja nikwika tik ne nuweyka ne ipejpelech ne Yeshu.

¹⁸ Ma nemi ne itetasujtalis ne tutajtzin Yeshu Mawaltijtuk iwan ne anmuijiu, nukniwan. Amen.