Maka shimuyawaltekikan

5 Ne Mawaltijtuk techmakishtijtuk pal tikpiat tamakishtilis; yajika, shinakakan ejejkatuk wan maka shimuajkawakan muilpiat senpa tik tekitilis.

² Shikita, naja Pawlo nimetzinhilwia ka asu anmuyawaltekit, ne Mawaltijtuk inte yawi metzinpalewia nian se chiupi. ³ Senpa nikinhilwia muchi ne takamet ka su se muyawalteki, nemi pal kichiwa muchi tay ina ne tajtuli. ⁴ Ankipulujtiwit ne Mawaltijtuk su anhinat ka anyejyek ipanpa ne tajtuli, anwetztiwit, tea metztasujta; ⁵ ika tejemet tikmatit ka tikpiat tejchialis ipal tamelakchiwalis ipanpa ne Ijiutzin; ⁶ ika iwan ne Mawaltijtuk Yeshu, te kipia ipatiw nian tayawaltekilis nian tzuntepul, semaya tayulmatilis, ne tekiti iwan tetasujtalis.

⁷ Anyawit katka yektzin: ká kichijki ka ankiajkawket kitakamatit ne tejkia? ⁸ Tay ne metzinhilwijtiwit inte witz itech ká ne metzinnutzki! ⁹ Chiupichin shukutishti kichiwa ma kukukisa muchi ne chipusti! ¹⁰ Naja nikyulmati ne Tajtzin anmupal, yajika nina ka ankishkejketzat kenha. Te nikmati ká ne metzinkakasua, pero yawi muchiwa juzgar wan yawi kitashtawia. ¹¹ Naja, nukniwan, su niknajnawatiskia tayawaltekilis kenhayuk, taika nechtalultiskiat? Te tatka ne tatzunchaluas ipal ne cruz! ¹² Mas yek ma muteksiskutunakan ne metzinhishtapachuat!

Shiktasujta ne muiknew ken timutasujta

¹³ Metznutztiwit pal anmumakishtiat, nukniwan; sema ini, ne tamakishtilis ma inte muchiwa pal ne anmuweyka, asunte ma shimupalewikan sejse iwan sejse ipanpa ne tetasujtalis, ¹⁴ ika muchi ne tajtuli yekajtuk ijtik sanse taketza: Shiktasujta ne muiknew ken timutasujta. ¹⁵ Asu anmutankwat wan asu ne sejse kikwat ne sejseuk, shikitakan ma inte shimuwilewakan.

¹⁶ Naja nina: shimuwikakan itech ne Ijiutzin, wan maka shikchiwakan tay ne tajtani ne taelewilis ipal ne anmuweyka, ¹⁷ ika ne tuweyka kielewia ne tay inte kineki ne tuijiu, wan ne tuijiu tay te kineki ne tuweyka, ika yejemet mutejtenewat pal ma inte shikchiwakan tay ne ankinekit. ¹⁸ Su ankiajkawat ma metzinwika ne Ijiutzin, inte annemit ka itan tajtuli.

¹⁹ Ne itekiw ne tuweyka muita: yaja tatzinhejenchiwalis, susulkayu, wan ma shikilwitikan tay susul, ²⁰ teutzintankwaketzalis, kukuchpajti, taishijialis, musujsumalis, teyektachialis, kwajkwalan, ma shimusumakan pal muishtemuat tay ankinekit, ma shitzajtzayanikan wan ma shikchiwakan sejsectaj; ²¹ envidiaj, mutawantilis, yujyualu wan muchi ijkiuni. Naja nimetzinhilwia pal ankimatit, kenha ken nimetzinhilwija, ka ne ká kichiwat ijkiuni inte yawit kipiat ne itatekimakalis ne Teut.

²² Ne itakil ne Ijiutzin yaja tetasujtalis, pajpakilis, nejmachnemilis, weytejchialis, yejyek tutekiw, yek, tayulmatilis, ²³ yulyamanikayu, wan ma inte tikchiwakan tay tikelewiat su te yek. Te kanaj nian se tajtuli ina ka te tiwelit tikchiwat ijkiuni. ²⁴ Ká ne ipal ne Mawaltijtuk Yeshu, yejemet kicruzpilujtiwit ne inweyka, iwan ne itajtaekulis wan ne itajtaelewilis.

²⁵ Su tiyujyultuk iwan Ijiutzin, shimuwikakan nusan iwan Ijiutzin. ²⁶ Ma inte timumatikan wejwey melka inte tiwejwey, ma inte timunutzakan iwan kwalan, nian tikpiakan envidiaj sejse iwan sejse.