Add parallel Print Page Options

Kej wuuk ẍipbelte

Bix oc ncyeˈyena, bix el tiiˈn Tal Carnel jtneel ẍipbelte cyxol wuuk. Tejtzen tel tiiˈn, e xiˈ nbiˈna tej tjaw ts̈iˈn tneel wik iˈtz cyxolj cyaja. Tkˈajkˈajel tisenj kˈancyok. E xiˈ tkbaˈn:

―¡Ttzaja bix cyeˈnc!

Bix e wila jun tz̈ej sak. Jtjax tibajjil tz̈ej kˈiˈn jun xoobl tuˈn te tkˈojbil. Bix e jax kˈoˈn jun corona tuj twiˈ. Bix ex tuˈn t‑xcye tibaj cykilca, bix e xcye.

Tejtzen tel tiiˈnxin tcab ẍipbelte, e xiˈ nbiˈna tcab wik iˈtz. E xiˈ tkbaˈn:

―¡Ttzaja bix cyeˈnc!

Bix etz juntl tz̈ej. Cyak tilbil. Jtjax tibajjil e xiˈ kˈoˈn te tuˈn miˈn chi ten xjal tuj ttz̈yal, bix tuˈn tbaj cybyon cyiib xjal cyxolx. Bix e xiˈ kˈoˈn jun ma tij espada te.

Tejtzen tel tiiˈnxin toxen ẍipbelte, e xiˈ nbiˈna toxen wik iˈtz. E xiˈ tkbaˈn:

―¡Ttzaja bix cyeˈnc!

Bix e wila jun tz̈ej kˈek. Jtjax tibajjil jun malbil tuj tkˈab. Bix e xiˈ nbiˈna jun tkˈajkˈajel n‑etz cyxol ke cyaja jwik iˈtz. E xiˈ tkbaˈn tej tjax tibaj tz̈ej kˈek:

―Bincham tuˈn tbint tuˈn jun xjal tuˈn tlokˈonte caˈba libra triwa bix ka kak libra cebada nuk tuˈnj twiˈ tcˈuˈj ctcama te jun kˈij. Pero txiˈ tkbaˈna tuˈn cyxilanx xjal loˈpj te olivos bix uva―tz̈itzen.

Tejtzen tel tiiˈn Tal Carnel tcyaaˈn ẍipbelte, e xiˈ nbiˈna tkˈajkˈajel tyol tcyaaˈn jwik iˈtz. E xiˈ tkbaˈn:

―¡Ttzaja bix cyeˈnc!

Bix e wila jun tz̈ej spela kˈent. Jtjax tibajjil toc tbi Cyamecy, bix lepch Cynajbil Cyimne tiˈj. Jaaˈjxa iyˈyake kej caˈba lu, e cyim xjal cyuˈn. E xiˈ kˈoˈn cye tuˈn tcub cybyoˈn tcyaaˈn tkiyˈ xjal tuˈn kˈoj, tuˈn weyaj, tuˈn yabel, bix cyuˈn jil twitz txˈotxˈ.

Tejtzen tel tiiˈn Tal Carnel tjweˈyan ẍipbelte, e wila cyanem kej xjal otk chi cub byet cuma otk chi ocslan tyol Dios bix cuma otk chi kˈumen tyol Dios. Tocx cyanem tjakˈ altar. 10 Ejeeˈ tzunj lu e jaw s̈‑in cyiw:

―Jay Kman Dios xjan bix jaxxix, ¿jteˈtltzen tyem tyoˈy tuˈn tcub cykˈoˈna cycastiwa xjal twitz txˈotxˈ, tuˈntzen cykˈoj cye t‑xel kcyamecya?―tz̈i ke xjal otk chi cub byet cyuˈn aj il twitz txˈotxˈ.

11 E xiˈ kˈoˈn te teeyle juun jun xbalen sak, bix e xiˈ tkbaj cye tuˈn cyayon chˈintl, ojxe cybyet cykilcatl ocslal at tuˈn tcub byet tisenx cye otk chi cub byet.

12 Bix e wila tej tel tiiˈn Tal Carnel twukakan ẍipbelte. Bix e tzaj jun xcyaklajnab cyiwxsen. Biˈx oc kˈij kˈek tisen jun xbalen kˈek te bisbajil. Biˈx oc xjaw cyak tisen tz̈iyˈ. 13 Biˈx e cuˈtz tzˈak ke cheˈw twitz cyaˈj. Nuk nluˈle twitz cyaˈj tisen yucch jun tken higo tuˈn nim cykˈiˈk bix ntzaj tzˈak twitz. 14 E tzaj tzˈak cyaˈj tisen jun uˈj oj njaw balkˈet. Bix cykilca ke witz bix cykilca ke chˈin txˈotxˈ tmij mar iyˈ kˈiˈnke tuj cylugar. 15 Bix ke cawel twitz txˈotxˈ cyuyax cykilca nejenel cye xjal cyuyax capitán cyuyax ke kˈina cyuyax ke jawnex xjal cyuyax cykilca akˈanal bix kej xjal yaaˈn eteˈ tjakˈ tcawbil taaw akˈuntl, cykilca kej lu ocx ewenke cyuj jul bix tiˈ t‑xeeˈ xak cywiˈ witz. 16 Bix e xiˈ cykbaˈn cye xak bix cye witz:

―Cytzaj tzˈaka kibaja, tuˈntzen miˈn chicˈaj koˈya twitzj Dios kˈuklec tuj tkˈukbil, bix tuˈntzen miˈn tzaj tkˈoj Jtal Carnel kibaja―tz̈i ke xjal. 17 E jaw yolenke juˈwa cuma otk tzul cana jjawnex kˈij tuˈn tcub tkˈoˈn Dios tkˈoj tibaj twitz txˈotxˈ, bix min‑al jun xjal at tipemal tuˈn tiyˈx tuˈn.