Add parallel Print Page Options

Te muneki ma nimetzinhilwi ka tinemit pal titekitit ipal ne tayulmatit, ika nikmati ka ankinekit kinpalewiat sujsul, hasta nimuweymati anmupanpa iwan ne tukniwan ipal Macedonia, nikinhilwia ka ne tukniwan ipal Akaia ashan se shiwit muajshitijtiwita; wan ne anmudevocion kichijtuk ka miak nusan kinekit muejekuat sea.

Niktuktijtuk ne tukniwan pal te yawi muchiwa ka muchi tay ninatuk ipanpa uni te tejkia, ma muita ka anmuajshitijtiwit ken ninatuk, ma te yawit ajsit nuwan sejse ipal Macedonia wan kiajsit ka te anmuajshitijtiwit, wan su ijkiuni tejemet tiawit tishpinawat, ma te nina anmejemet, ika tinatiwit ka ijkia. Yajika tel, ninak ka nimuneki niktajtani ne nukniwan ma ajsikan anmutech achtu pal kipikit ne teteuchiwalis ne anhinaket ka yawi muchiwa, ma muchiwa ken teteuchiwalis wan tesu ken se tay titajtanit pal tikpiat wey.

Ini tay nina: ká tatuka wan sema chiupi kituka, sema chiupi yawi tapishka; wan ká tatuka iwan wey teteuchiwalis, iwan tejteteuchiwalis yawi tapishka nusan. Sejse tejemet ijkiunisan ken kielewia ne iyulu, tesu iwan yulkukulis nian tapachulis.

    "Ká tamaka iwan pakilis, ne Teut kitasujta."

Ne Teut kipia itajpal pal weli metzintepewilia muchi ne tejtetakulis pal senpa ankipiat muchi tay ankinekit tik muchi, pal kiane anyawit kipiat ipal muchi anmutekitilisyu yek, ken muijkwilujtuk:

    "Tasentaluj, kinmakak ne munekit; ne itamelakchiwalis naka pal senpa."

10 Ne ká kimaka ijish ne tatuka wan itamal, yawi metzinmaka wey anmuish pal antatukat, wan yawi kichiwa ma weya ne tay tamaka ne anmutamelakchiwalis; 11 anmupal muchi yawi tepewi pal antamakat muchi tay welit, wan ijkiuni tejemet tiwelit tikilwiat panpadiush ne Teut. 12 Ika kwak ankichiwat ini anmutekiw, tesu sema ankimakat ne tayulmatit tay yejemet munekit, nusan wey ipatiw pal ankilwiat sujsul panpadiush ne Teut 13 iwan ne taejekulis ipal ini tekitilis; ijkiuni ankichiwat ma inakan ka wey ne Teut ika ankitakamatit wan ankikwit ne yeknawatilis ipal ne Mawaltijtuk, wan ika ankitakuliat muchi tay anwelit ipal yejemet wan ipal muchi, 14 wan ika yejemet mutajtaweliat ka anmumaku wan metzintasujtat ipanpa ne sujsul wey itetasujtalis ne Teut anmutech. 15 Tashtawi ne Teut ipanpa ne wey itetakulis ken nian weli muneshtia.