1 Timoteo 1

Ne Bibliaj Tik Nawat

1 Naja, Pawlo, ititanijtuk ne Mawaltijtuk Yeshu ipanpa intatuktilis Teut tutamakishtiani wan ne Mawaltijtuk Yeshu tutejchialis, ² niktuktia ini tajkwilul itech Timoteo nukunew yekkaya tik tayulmatilis. Ma metzinmakakan ne Teut tuteku wan ne Mawaltijtuk Yeshu tutajtzin tetasujtalis, tepalewilis wan nejmachnemilis.

³ Ijkiunisan ken nimetztajtan kwak niajki Macedonia, ma shinaka tik Epesos pal tikintuktia sejse ma inte tamachtikan te kenha, ⁴ ma inte kitalilikan cuidadoj cuejcuentoj wan ma inte nakakan kikejketzat ká ne itatanoy se wan ne inoya seuk. Kitaliat achtu tajtajtanilis kiane, wan tesu tajpiat tay ipal Teut iwan tayulmatilis. ⁵ Ne tamilis ipal ne tatuktilis, yaja tetasujtalis ne kisa itech tuyujyulu yek wan tasenmatilis ipal tay yek wan tayulmatilis yekkaya. ⁶ Sejse kiajkawtiwit ne ujti, muishkweptiwit wan tanutzat tay te tatka; ⁷ kinekit muchiwat tajtultamachtianimet, wan te kimatit nian tay inat nian tay ipanpa tajtaketzat.

⁸ Tikmatit ka yek ne tajtuli asu mukwi ken muneki ⁹ wan su tikmatit ka ne tajtuli te nemi ipal ne yujyulmelawak sute ipal ne tateyekchiwat, ne te tetakamatit, ne te kitasujtat ne Teut, ne te yujyulchipawak, ne kichiwat tay te muneki, ne tekumiktianimet wan nanmiktianimet wan iknichaluanimet, ¹⁰ tatzinhejenchiwanimet, ukichsenkuchinimet, takaichtekinimet, sankataketzat, tashijshikuat, wan su nemit sejseuk tay te ipal yek tamachtilis, ¹¹ ken ina ne yeknawatilis tzitzinaka ipal ne Teut tasujtatuk ne nechmakatiwit pal nitajpia.

¹² Nikilwia panpadiush ne Mawaltijtuk Yeshu tutajtzin ká nechmakatuk nutajpal ika nechmatki yek wan nechmakak tekitilis ¹³ naja, ká katka se kukujtaketza wan se tetalultiani wan se teijilwiani; melka uni nimupalewij ika keman nikchijki te nikmati tatka nian nikpiatuya tayulmatilis. ¹⁴ Sujsul tepewik ne itetasujtalis ne Tutajtzin iwan tayulmatilis wan tetasujtalis ne ijtik ne Mawaltijtuk Yeshu.

¹⁵ Tejkia wan nemi pal muchi tikmatit ka walaj ne Mawaltijtuk Yeshu hasta ne taltikpak ma kinpalewi tateyekchiwanit, wan naja mas que ajaka, ¹⁶ wan yajika nimupalewij, pal kiane ne Mawaltijtuk Yeshu weli tailwitia keski tejchia, pal kimatit muchi ká kinekiskiat kiyulmatit ma yujyultuk senpa.

¹⁷ Ne Teut, ne tatuktiani ipal senpa, ne inte wilewi, inte muita, isel nemi, ma kipia honor wan ma inakan ka yaja wey senpa wan senpa. Amen.

¹⁸ Ini tatuktilis nimetztalilia, nukunew Timoteo, ipanpa ne teujteutaketzalis ne yajket muishpan, ma shitasuma inwan tik ne yek tasumalis; ¹⁹ ma shikpia tayulmatilis wan se yek tasenmatilis. Sejse kiajkawtiwit yajini wan pulijtuk ne barcoj ipal ne tayulmatilis, ²⁰ wan ijtik yejemet nemi Humenayos wan Aleksandro, ká nikintemakatuk iwan ne Tenewani ma mumachtikan pal te kukujtaketzat.