1 Korinto 15

Ne Bibliaj Tik Nawat

Sejseuk

15 Nukniwan, shikmatikan ne yeknawatilis ne nimetzinnawatij wan ankikwijket wan iwan annakat; ² itech anmumakishtiat su antajpiat, wan su te ankiyulmattiwit pal te tatka. ³ Nimetzinmakak, ne achtu, tay ne naja nusan nikwijtuk: ka ne Mawaltijtuk mikik ipanpa tay tikchijtiwit teyek, ken mujkwiluj, ⁴ wan ka mutalpachuj wan ka muketzki kwak panutiwit yey tunal, ken mujkwiluj, ⁵ wan ka kiski iishpan Kepas, neman ne majtakti-ume, ⁶ tipan iishpan mas que makwil tzunti tukniwan seujti, wan miak pal yejemet nemit kenhayuk, melka ankakeski miktiwit; ⁷ tipan kiski iishpan Yakob, neman muchi ne tijtitanijtuk; ⁸ ne tipan pal muchi, ken se nestuk kwak te nemituya pal nesi, nuishpan nusan, ⁹ ika naja ne mas chikitik ipal ne tijtitanijtuk; te nitatka pal nimunutza titanijtuk ika niktalultij ne sennemit ipal ne Teut. ¹⁰ Ipanpa teutasujtalis nimuchijtuk ká naja, wan ne Teut nechtasujtak tesu pal te tatka nupatiw, ka nitekittuk mas que muchi - tesu naja sute ne itetasujtalis ne Teut nuwan. ¹¹ Yajika, naja wan yejemet kenha titanajnawatijket wan kenha antayulmatket.

¹² Asu munajnawatia ka ne Mawaltijtuk muketztuk kwak miktuya, ken inat ankakeski anmutzalan ka te aka muyulkwepa kwak miktuk? ¹³ Su te aka muyulkwepa kwak miktuk, ne Mawaltijtuk nusan te muyulkwepki. ¹⁴ Su ne Mawaltijtuk te muyulkwepki, kiane tel te tatka ipatiw ne tutanajnawatilis wan nusan te tatka ipatiw ne anmutayulmatilis! ¹⁵ Kineki ina ka nusan tinatiwit tay te tejkia ipanpa ne Teut, ika tinatiwit ka ne Teut kiketzki ne Mawaltijtuk wan te kiketzki su kiane ka te aka muyulkwepa kwak miktuk, ¹⁶ ika su te aka muyulkwepa, ne Mawaltijtuk nusan te. ¹⁷ Wan su te muyulkweptuk ne Mawaltijtuk, ne tay ankiyulmatit te tatka wan annakat iwan muchi tay antateyekchijtiwit. ¹⁸ Yajika, ne miktiwit itan ne Mawaltijtuk nusan pulijtiwit. ¹⁹ Su semaya tik ini nemilis titejchiat ipanpa ne Mawaltijtuk, tejemet titamakat mas lastimaj que muchi ne takamet!

²⁰ Ashan muyulkweptuk ne Mawaltijtuk kwak miktuya, ken ne achtu ipal ne mijmiktuk, ²¹ ika ken nemi mikilis ipanpa se takat, nusan ipanpa se takat nemi muyulkwepalis, ²² ika kenha ken muchi yawit mikit ipanpa ne Adam, kiane nusan ipanpa ne Mawaltijtuk muchi yawit muyulkwepat. ²³ Sejse kwak muneki: achtu ne Mawaltijtuk, tipan muchi ká ipal ne Mawaltijtuk kwak yaja ajsi witz; ²⁴ neman ne tamilis, kwak yawi temaka ne tatekimakalis iwan ne Teut wan teteku, kwak puliwisket muchi ne tatuktianimet wan muchi ká tatekimakat wan welit wey, ²⁵ ika yaja nemi pal tatekimaka hasta kintalia muchi ne kinekit kijtakuat itan ne ijikshi. ²⁶ Ne tipan ipal yejemet ká puliwi, ne mikilis, ²⁷ ika kitalij muchi itan ne ijikshi. Kwak ina ka muchi mutalijtuk itan itatuktilis, mumati ka kineki ina muchi asunte yajuni ká kitalij muchi itan itatuktilis. ²⁸ Kwak tami kitalia muchi itan itatuktilis, kwakuni ne ipiltzin nusan yawi mutalia itan itatuktilis ne kitalia muchi itan itatuktilis, pal kiane ne Teut muchiwa muchi ijtik muchi.

²⁹ Su te, tay kichiwat ne mumakat ulyuj inpanpa ne miktiwit, su ne miktiwit te keman muyulkwepat? Taika muulyujmakat inpanpa tel, ³⁰ wan taika tisajsaytit senpa wan senpa? ³¹ Nimiki mujmusta! Uni tejkia ken ne anmumuweymatilis, nukniwan, ne nikpia tik ne Mawaltijtuk Yeshu, anmutajtzin! ³² Su nitekwanisunki ken se takat tik Epesos, ken nechpalewia su te muyulkwepat ne miktiwit? Su ijkiuni, titakwakan wan tiatikan, ka musta tiawit timikit! ³³ Maka shimushijshikukan: tukujkunpawan teyek kishpuluat ne yejyek costumbrej. ³⁴ Shimuchiwakan ken muneki wan maka shikchiwakan tay teyek. Ankakeski te kishmatit Teut; nina pal anhishpinawat!

³⁵ Yawi ina ajaka: "Ken yawit muyulkwepat ne mijmiktuk? Kwak witz, ken iweyka?" ³⁶ Mele! Ne tay tiktuka te yawi mulini su te miki, ³⁷ wan ne tay tiktuka, tesu tiktuka ne iweyka tay yawi kipia sute se iish petznaj, tinakan tawial o tay tikneki. ³⁸ Ne Teut kimaka iweyka ken kineki, wan kimaka sejse iish ne iweyka ken ipal. ³⁹ Te muchi kipia kenha inakayu: ne inakayu takamet se wan ne inakayu takwalmet seuk, ne inakayu tujtutut se wan ne inakayu mijmichin seuk. ⁴⁰ Nusan kipiat iweyka ne nemit ka ilwikak wan ne nemit pak ne tal: ne itawilyu tay ipal ne ilwikak se, wan ne itawilyu tay ipal ne tal seuk: ⁴¹ ne itawilyu ne tunal se, ne itawilyu ne metzti se, wan ne itawilyu ne sitalmet se; itawilyu se sital te kenha ken itawilyu ukse sital.

⁴² Nusan ijkiuni kwak ne miktiwit muyulkwepat. Mutuka pal wilewi, muyulkwepa pal te keman wilewi. ⁴³ Kwak mutuka, se tay te yek; kwak muyulketza, tzitzinaka. Kwak mutuka, kukuya; kwak muyulkwepa, kipia itajpal. ⁴⁴ Ne tay mutuka, se iweyka sema kipia itunal; ne tay muyulkwepa, se iweyka kipia iijiu. Su nemi se iweyka kipia itunal, nusan nemi se iweyka kipia iijiu. ⁴⁵ Hasta muijkwilujtuk ijkiuni: Adam, ne achtu takat, muchijki se almaj yultuk; ne tipan Adam se iijiu tayulkwiltia. ⁴⁶ Tesu achtu ne kipia iijiu sute ne kipia ialmaj; tipan ne kipia iijiu. ⁴⁷ Ne achtu takat kiski tik tal, ipal tewti; ne ukse takat kiski ka ilwikak. ⁴⁸ Ken nemi ne tay ipal tewti, nusan ijkiuni ne tay ipal tewti, wan ken nemi ne tay ipal ilwikak, nusan ijkiuni ne tay ipal ilwikak; ⁴⁹ wan ijkiunisan ken tikwikatiwit ne itachialis ne tewti, nusan tiawit tikwikat ne itachialis tay ipal ne ilwikak.

⁵⁰ Ini nina, nukniwan: ka se ipal nakat wan esti te yawi weli kipia ne itatekimakalis ne Teut, nian se yawi puliwi yawi kipia ne tay te keman wilewi. ⁵¹ Nimetzinhilwia ini tay ichtaka: melka muchi tejemet te tiawit timikit, muchi tiawit timupatat ⁵² mas talul que ne tuish weli tachia, kwak mukaki ne tipan trompetaj: yawi tzalani ne trompetaj wan ne mijmiktuk muyulkwepasket wan tea keman puliwisket, wan tejemet timupatasket, ⁵³ ika ini tay puliwi nemi pal mutakentia tik ne tay te yawi puliwi, wan ne tay weli miki tik ne tay te keman miki.

⁵⁴ Kwak ini tay puliwi yawi mutakentia tik ne tay te yawi puliwi wan ne tay weli miki yawi mutakentia tik ne tay te miki, kwakuni yawi muchiwa tay nemi ijkwilujtuk:

⁵⁵ Mikilis, kan nemi ne muvictoriaj? Mikilis, kan nemi ne mutzupinka? ⁵⁶ Ne itzupinka ne mikilis ne tateyekchijtuk. Ne itajpal ne tateyekchijtuk ne tajtuli. ⁵⁷ Tikilwikan panpadiush ne Teut ne techmaka ne victoriaj itech ne Tutajtzin Yeshu Mawaltijtuk.

⁵⁸ Yajika nukniwan yektasujtatuk, shinakakan chijchikawtuk, ma te metzinhijkwani tatka, shikchiwakan wey itekitilis ne Tajtzin senpa, wan shikmatikan ka ne anmutekiw kipia ipatiw ipal ne Tajtzin.