Add parallel Print Page Options

22 दाऊद कहेस, “यहोवा परमेस्सर क मन्दिर अउर इस्राएल क लोगन बरे भेंटन क बारइ क वेदी हिआँ बनी।”

दाऊद मन्दिर बरे जोजना बनावत ह

दाऊद आदेस दिहस कि इस्राएल मँ रहइवाले सबहिं तोहार बीच रहइवाला बिदेसी एक संग बटुरइँ। तोहार बीच रहइवाला बिदेसियन क उ समूह मँ स दाऊद सगंतरासन क चुनेस। ओनकर काम परमेस्सर क मन्दिर बरे पाथरन क काटिके तइयार करइ क रहा। दाऊद दुआर क पालन बरे कीलन अउर चुलन बनावइ बरे बहोत सारा लोहा प्राप्त किहस। दाऊद ओतना काँसा भी प्राप्त किहस जउन तउला न जाइ सकइ। अउर दाऊद ऍतने जियादा देवदारु क पेड़न बटोरेस जउन न गना जाइ सकेन। सीदोन अउ सोर क लोग बहोत स देवदारु क पेड़न लिआएन।

दाऊद कहेस, “हम क यहोवा बरे एक बिसाल मन्दिर बनावइ चाही। किन्तु मोरे पूत सुलैमान अबहुँ तलक बालक अउर अनुभवहीन अहइ। यहोवा क मन्दिर बहोत बिसाल होइहीं। एका अपनी बिसालता अउ सुन्दरता क बरे सबहिं रास्ट्रन मँ प्रसिद्ध होइ चाही। इहइ कारण अहइ कि मइँ यहोवा क मन्दिर बनावइ क जोजना बनाउब।” एह बरे दाऊद मरइ स पहिले मन्दिर बनावइ बरे बहोत स जोजना बनाएस।

तब दाऊद अपने पूत सुलैमान क बोलाएस। दाऊद सुलैमान स इस्राएल क यहोवा परमेस्सर बरे मन्दिर क बनावइ क कहेस। दाऊद सुलैमान स कहेस, “मोर पूत, मइँ अपने परमेस्सर यहोवा क नाउँ बरे एक ठू मन्दिर बनावइ चाहत रहेउँ। मुला यहोवा मोहसे कहेस, ‘दाऊद तू बहोत स जुद्ध किहा ह अउर बहोतस लोगन क मर्या ह एह बरे तू मोरे नाउँ क बरे मन्दिर नाहीं बनाइ सकत्या। किन्तु तोहार एक पूत अहइ जउन सान्ति प्रिय अहइ। मइँ तोहरे पूत क सान्ति क समइ प्रदान करब। ओकरे चारिहुँ कइँती क दुस्मन ओका परेसान नाहीं करिहीं। ओकर नाउँ सुलैमान अहइ अउर मइँ इस्राएल क उ समइ सुख सान्ति देब जउने समइ सुलैमान राजा होइ। 10 सुलैमान मोरे नाउँ क एक मन्दिर बनाई सुलैमान मोरे पूत अउर मइँ ओकर बाप रहब अउर मइँ सुलैमान, क राज्ज क सक्तीसाली बनाउब अउर ओकरे परिवार क कउनो निअँबर सदा इस्राएल पर ही हुकूमत करी।’”

11 दाऊद इ भी केहस, “पूत, अब यहोवा तोहरे संग रहइ। तू सफल बना अउर जइसा यहोवा कहेस ह, अपने यहोवा क मन्दिर बनावा। 12 यहोवा तोहका इस्राएल क राजा बनाई। होइ सकत ह यहोवा तोहका बुद्धि अउ समुझ देइ जेहसे तू लोगन क मार्गदर्सन कइ सका अउर अपने यहोवा परमेस्सर क व्यवस्था क पालन कइ सका। 13 अउर तोहका कामयाबी तब मिली जब तू ओन नेमन अउर व्यवस्था क पालन मँ सावधान रहब्या जउन यहोवा मूसा क इस्राएल बरे दिहे रहा। सक्तीसाली अउर वीर रहा। जिन डेरावा अउ जिन निरास भवा।

14 “सुलैमान, मइँ यहोवा क मन्दिर क जोजना बनावइ मँ करी मेहनत किहेउँ ह। मइँ तीन हजार सात सौ पचास टन सोना दिहेउँ ह अउर मइँ लगभग सैंतीस हजार पाँच सौ टन चाँदी दिहउँ ह। मइँ कासाँ अउ लोहा ऍतना जियादा दिहेउँ ह कि तउला नाहीं जाइ सकत अउर मइँ लकड़ी अउ पाथर दिहेउँ ह। सुलैमान, तू एहमँ अउर जियादा जोर सकत ह। 15 तोहरे लगे बहोत स संगतरास अउ बढ़ई अहइँ। तोहरे लगे हर एक प्रकार क काम करइ वाले कुसल मनई अहइँ। 16 उ पचे सोना, चाँदी, काँसा, अउर लोहे क काम करइ मँ कुसल अहइँ। तोहरे लगे एतने जियादा कुसल मनई अहइँ कि उ पचे गने नाहीं जाइ सकतेन। अब काम सुरू करा अउर यहोवा तोहरे संग होइ।”

17 तब दाऊद इस्राएल क सबहिं प्रमुखन क आपने पूत सुलैमान क सहायता करइ क आदेस दिहेस। 18 दाऊद ओन प्रमुखन स कहेस, “यहोवा तोहर परमेस्सर तोहार संग अहइ। उ तोहका सान्ति क समइ दिहेस ह। उ हम लोगन क उ भुइँया मँ रहइवाले लोगन क पराजित करइ मँ मदद किहेस ह। अब यहोवा अउर ओकर लोग इ भुइँया पइ पूरा अधिकार किहेन ह। 19 अब तू अपने हिरदइ अउर आतिमा क अपने यहोवा परमेस्सर क समर्पित कइ द्या अउर उ जउन कहइ, करा। यहोवा परमेस्सर बरे पवित्तर जगह बनावा। यहोवा क नाउँ बरे मन्दिर बनावा। तब करार क सन्दूख अउ दूसर सबहिं पवित्तर चिजियन मन्दिर क अन्दर लिआवा।”