Tento nak cha̱bilak lix naˈleb li ta̱cˈamok be saˈ xya̱nkeb laj pa̱banel

3  Ya̱l li nequeˈxye nak cui cuan junak na‑ala saˈ xchˈo̱l oc chokˈ aj cˈamol be saˈ xya̱nkeb laj pa̱banel, cha̱bil li naxcˈoxla xba̱nunquil. ² Abanan li ani naxcˈoxla oc chokˈ aj cˈamol be, tento nak cua̱nk saˈ xya̱lal re nak ma̱ ani ta̱a̱tinak chirix. Junak ajcuiˈ li rixakil. Ma̱cuaˈak aj calajenak. Tento nak se̱bak xchˈo̱l ut cha̱bilak xnaˈleb re nak qˈuebilak xlokˈal. Aˈanak aj qˈuehol ochochna̱l ut chixqˈuehak xchˈo̱l chixcˈutbal lix ya̱lal chi tzˈakal re ru. ³ Laj cˈamol be ma̱cuaˈak aj calajenak ut ma̱cuaˈak aj sicˈol ple̱t. Ma̱cuaˈak aj rahol ru tumin. Tu̱lanak ban ut cua̱nk saˈ xya̱lal. ⁴ Tento nak tixnau takla̱nc saˈ li rochoch re nak li ralal xcˈajol teˈx‑oxlokˈi ut teˈabi̱nk chiru. ⁵ Cui junak li cui̱nk incˈaˈ naxnau takla̱nc saˈ li rochoch, ¿chan ta ru nak ta̱ru̱k ta̱cˈamok be saˈ xya̱nkeb li rech aj pa̱banelil? ⁶ Tento nak laj cˈamol be acak xqˈui saˈ lix pa̱ba̱l. Ma̱re anchal tixnimobresi rib ut ta̱tˈanekˈ saˈ li tojbal ma̱c quitˈaneˈ cuiˈ laj tza. ⁷ Ut tento ajcuiˈ nak cha̱bilak resil lix naˈleb yalak bar xbaneb li toj ma̱jiˈ nequeˈpa̱ban. Ma̱cˈaˈak xkˈusbal re nak incˈaˈ tixqˈue rib chi a̱le̱c xban laj tza.

Tento nak cha̱bilak lix naˈlebeb li nequeˈcˈanjelac saˈ xya̱nkeb laj pa̱banel

⁸ Ut joˈcan ajcuiˈ li nequeˈcˈanjelac saˈ xya̱nkeb laj pa̱banel. Tento nak ti̱cakeb xchˈo̱l. Ut li cˈaˈru teˈxye teˈxba̱nu, cheˈxba̱nuhak ajcuiˈ. Ma̱cuaˈakeb aj calajenak. Ut incˈaˈ teˈxsicˈ xtumineb riqˈuin balakˈi̱nc. ⁹ Ma̱cˈaˈ ta̱chˈiˈchˈiˈi̱nk reheb saˈ lix cˈaˈuxeb ut teˈxqˈue xcuanquil li kalokˈlaj pa̱ba̱l li cˈutbesinbil chiku xban li Dios. ¹⁰ Joˈcan nak xbe̱n cua, ta̱tzˈilekˈ a̱tin chirixeb. Cui ma̱cˈaˈ nanauman chirixeb, teˈqˈuehekˈ chi cˈanjelac saˈ xya̱nkeb laj pa̱banel. ¹¹ Joˈcan ajcuiˈ li rixakileb li nequeˈcˈanjelac saˈ xya̱nkeb laj pa̱banel. Cha̱bilakeb lix naˈleb. Ma̱cuaˈakeb aj molol a̱tin. Ma̱cuaˈakeb aj calajenak. Ti̱cakeb ban xchˈo̱l ut ti̱cakeb lix cˈaˈux riqˈuin chixjunil. ¹² Eb laj cˈanjel saˈ xya̱nkeb laj pa̱banel, junak ajcuiˈ li rixakil ut teˈxnau takla̱nc saˈ xbe̱neb li ralal xcˈajol. Ut teˈxnau ajcuiˈ rilbal lix jun cablal. ¹³ Eb li teˈcˈanjelak chi cha̱bil, teˈoxlokˈi̱k ut teˈcacuu̱k xchˈo̱leb chixyebal resil li kapa̱ba̱l saˈ xcˈabaˈ li Jesucristo.

Lix xeˈ xto̱nal li kapa̱ba̱l

¹⁴ Usta yo̱quin chi tzˈi̱bac a̱cuiqˈuin chirix la̱ taklanquil, at Timoteo, cuan saˈ inchˈo̱l nak chi se̱b tincuulak a̱cuiqˈuin. ¹⁵ Abanan ma̱re tinba̱yk chi cuulac. Joˈcan nak yo̱quin chi tzˈi̱bac a̱cuiqˈuin re nak ta̱nau chanru teˈcˈanjelak li teˈxakaba̱k chi cˈanjelac saˈ xya̱nkeb li nequeˈpa̱ban re li yoˈyo̱quil Dios. Ut la̱o aj pa̱banel, la̱o li nakaqˈue xcuanquil ut nakacol rix li katijbal li tzˈakal ya̱l. ¹⁶ Relic chi ya̱l kˈaxal lokˈ li katijbal li quixcˈut chiku li Dios. Naxcˈut chiku li xya̱lal li kapa̱ba̱l saˈ xcˈabaˈ li Jesucristo. Li xya̱lal aˈan aˈin: