1 इतिहास 23

Awadhi Bible: Easy-to-Read Version

मन्दिर मँ लेवीबंसियन क जरिये सेवा क जोजना

23 दाऊद बूढ़ा होइ गवा, एह बरे उ अपने पूत सुलैमान क इस्राएल क नवा राजा बनाएस। ²दाऊद इस्राएल क सबहिं प्रमुखन क बटोरेस। उ याजकन अउ लेवीबंसियन क भी एकट्ठा किहस। ³दाऊद तीस बरिस अउर ओहसे ऊपर क उमर क लेवीबंसियन क गनेस। सब मिलाइके अड़तीस हजार लेवीबंसियन रहेन। ⁴दाऊद कहेस, “चौबीस हजार लेवीबंसियन यहोवा क मन्दिर क निर्माण कार्य क देखरेख करिहीं। छ: हजार लेवीबंसी अधिकारी अउर निआवधीस होइहीं। ⁵चार हजार लेवीबंसी दुआरपाल होइहीं अउर चार जहार लेवीबंसी संगीतन होइहीं मइँ ओनके बरे बिसेस बाजा बनाएँउ ह। उ पचे ओन बाजन क उपयोग यहोवा क स्तुति बरे करिहीं।”

⁶दाऊद लेवीबंसियन क तीन बर्गन मँ बाँट दिहस। उ पचे लेवी क तीन पूतन गेर्सोन, कहात अउ मरारी क परिवार समूह रहेन।

गर्सोन क परिवार समूह

⁷गर्सोन क परिवार समूह स लादान अउ सिमी रहेन। ⁸लादान क तीन पूत रहेन। ओकर सब स बड़ा पूत यहीएल रहा। ओकर दूसर पूत जेताम अउ योएल रहेन। ⁹सिमी क पूत सलोमीत, हजीएल अउ हारान रहेन। इ सबइ तीनहुँ पूत लादान क परिवारन क रहेन।

¹⁰सिमी क चार पूत रहेन। उ पचे यहत, जीना, यूस अउ बरीआ रहेन। ¹¹यहत सब स बड़का अउ जीजा दूसर पूत रहा। मुला यूस अउ बरीआ क जियादा पूत नाहीं रहेन। एह बरे यूस अउ बरीआ एक परिवार क रूप मँ गने जात रहेन।

कहात क परिवार समूह

¹²कहात क चार पूत रहेन। उ पचे अम्राम, यिसहार, हेब्रोन अउ उज्जीएल रहेन। ¹³अम्राम क पूत हारून अउर मूसा रहेन। हारून अउर ओकर पूतन सदा-सदा पवित्तर कार्य करइ बरे, यहोवा क समन्वा धूप भेंट चढ़ावइ बरे, याजक क रूप मँ यहोवा क सेवा करइ बरे अउर यहोवा क नाउँ पइ लोगन सदा-सदा आसीर्बाद देइ बरे प्रतिस्ठित कीन्ह गवा रहेन।

¹⁴मूसा परमेस्सर क मनई रहा। मूसा क पूत, लेवी क परिवार समूह क हींसा स रहेन। ¹⁵मूसा क पूत गेर्सोम अउ एलीएजेर रहेन। ¹⁶गेर्सोम क बड़का पूत सबूएल रहा। ¹⁷एलीएजेर क बड़का पूत रहब्याह रहा। एलीएजेर क अउर कउनो पूत नाहीं रहा। मुला रहब्याह क बहोत स पूत रहेन।

¹⁸यिसहार क सब स बड़का पूत सलोमीत रहा।

¹⁹हेब्रोन क सब स बड़का पूत यरीय्याह रहा। हेब्रोन क दूसर पूत अमर्याह रहा। यहजीएल तीसर पूत रहा। अउर यकमाम चउथा पूत रहा।

²⁰उज्जीएल क सब स बड़का पूत मीका रहा अउर यिस्सिय्याह ओकर दूसर पूत रहा।

मरारी क परिवार समूह

²¹मरारी क पूत महली अउ मूसी रहेन। महली क पूत एलीआज़ार अउ कीस रहेन। ²²एलीआज़ार बिना पूतन क मरा। ओकर सिरिफ बिटियन रहिन। एलीआज़ार क बिटियन अपने सम्बन्धियन स बियाह किहेन। ओनकर सम्बन्धी कीस क पूत रहेन। ²³मूसी क पूत महली, एदेर अउर यरेमोत रहेन। सब मलाइके तीन पूत रहेन।

लेवीबंसियन क काम

²⁴इ सबइ लेवी क संतान रहेन। उ पचे अपने परिवार क अनुसार सूची मँ अंकित रहेन। उ पचे परिवारन क प्रमुख रहेन। सबइ व्यक्ति क नाउँ सूची मँ रहेन। जउन सूची मँ अंकित रहेन उ सबइ बीस बरिस क या ओहसे ऊपर क रहेन। उ पचे यहोवा क मन्दिर मँ सेवा करत रहेन।

²⁵दाऊद कहे रहा, “इस्राएल क यहोवा परमेस्सर अपने लोगन क सान्ति दिहस ह। यहोवा यरूसलेम मँ सदा ही रहइ बरे आइ गवा। ह। ²⁶एह बरे लेवीबंसियन क पवित्तर तम्बू या एकर सेवा मँ काम आवइवाली कउनो चीज़ क भविस्स मँ ढोवइ क जरूरत नाहीं अहइ।”

²⁷दाऊद क अन्तिम निर्देस इस्राएल क लोगन क बरे, लेवी क परिवार समूह क सन्तानन क गनब रहा। उ पचे लेवीबंसियन क बीस बरिस अउर ओहसे ऊपर क मनइयन क गनेन।

²⁸लेवीबंसियन क काम हारून क सन्तानन क यहोवा क मन्दिर मँ सेवा कार्य करइ मँ मदद करब रहा। लेवीबंसी मन्दिर क आँगन अउर बगल क कमरन क भी देखभाल करत रहेन। ओनकर काम सबहिं पवित्तर चिजियन क सुद्ध करइ क रहा। ओनकर काम इ भी रहा कि परमेस्सर क मन्दिर मँ सेवा करइँ। ²⁹मन्दिर मँ बिसेस रोटी क मेज पइ रखइ क जिम्मेदारी ओनकर ही रहेन। उ पचे आटा, अन्नबलि अउ अखमीरी रोटि बरे भी जिम्मेदार रहेन। उ पचे पकावइ क कढ़ाइयन अउर मिस्रित भेंटन क बरे जिम्मेदार रहेन। उ पचे सारा नाप तउल क काम करत रहेन। ³⁰लेवीबंसी हर एक भिंसारे खड़े होत रहेन अउर यहोवा क धन्यवाद अउ स्तुति करत रहेन। उ पचे एका हर एक साँझ क करत रहेन। ³¹लेवीबंसी यहोवा क सबहिं होमबलियन बिस्राम क बिसेस दिनन, नवा चन्द्रिमा क उत्सव अउर सबहिं बिसेस पर्व क दिनन पइ तइयार करत रहेन। उ पचे यहोवा क समन्वा हर रोज़ सेवा करत रहेन। केतने लेवीबंसी हर दाईं सेवा करइ चाही एकरे बरे बिसेस नेम रहेन। ³²एह बरे लेवीबंसी उ सब काम करत रहेन जेनकर आसा ओनसे कीन्ह जात रही। उ पचे पवित्तर तम्बू क देखभाल करत रहेन। उ पचे पवित्तर जगह क देखभाल करत रहेन अउर उ पचे अपने सम्बन्धियन हारून क सन्तान याजकन क मदद देत रहेन। लेवीबंसी यहोवा क मन्दिर मँ सेवा कइके याजकन क मदद करत रहेन।