होसे 13

Awadhi Bible: Easy-to-Read Version

इस्राएल आपन नास खुद किहस

13 “एप्रैम बंसज इस्राएल क तमाम जातियन क बीच मँ बहोत जियादा सक्तीसाली बनि गवा। एप्रैम जब बोला करत रहा, तउ लोग काँपात रहेन। मुला एप्रैम मरि गवा, कहेकि उ बाल देवता क पूजइ क कारण पाप किहे रहा। ² अउर अब उ पचे अपने बरे मूरतियन बनाइके लगातार पाप किहेन। ओकर कुसल कारीगर आपन सबसे अच्छा कुसला स ओकर चित्रन क तरासइ लागेन। तउ उ पचे ओन चित्रन स बातन करइ लागेन अउर उ सबइ लोग ओन बछवा क चित्रन चूमइ लागेन। ³ इहइ कारण उ पचे भिंसारे क उ कोहरा अउ भिंसारे क ओस क नाईं नज़र स ओझल होइ जाइहीं। जउन गायब होइ जात ह। उ पचन्क उ भूसा क तरह उड़ा लेजाइ चाही जेका खरिहाने स उड़ावा जात ह। उ पचे उ धुआँ क समान होइहीं जउन कउनो चिमनी स उठत ह अउर लुप्त होइ जात ह।

⁴ “तू लोग जब मिस्र मँ भवा करत रह्या, मइँ तबहिं स तोहार परमेस्सर यहोवा अहउँ। मोका तजिके तू पचे कउनो परमेस्सर क नाहीं जानत रह्या। मोर इलावा तोहका कउनो नाहीं बचाइ सकत ह। ⁵ बयाबान मँ, हाँ, सूखा रेगिस्ताने मँ जहाँ पानी नाहीं होइ, मइँ तू सबन्क धियान दिहे रह्या। ⁶ मइँ इस्राएलियन क खाइ क दिहेउँ। उ पचे उ भोजन खाएन। आपन पेट भरिके उ पचे तृप्त होइ गएन। ओनका घमंड होइ गवा अउर उ पचे मोका बिसरि गएन।

⁷ “मइँ इहइ बरे सरे क तरह होइ जाबउँ। मइँ राहे पइ घात लगाए भए चीता जइसा होइ जाब। ⁸ मइँ ओन पइ उ रीछनीं क तरह झपट पड़ब, जेहसे ओकर गदेलन छोर लीन्ह गवा होइँ। मइँ ओन पइ हमला करब। मइँ ओनकर छातियन क चीर फाड़ देबउँ। मइँ उ सेर या कउनो दूसर अइसे हिसंक पसु क तरह होइ जाबँउ जउन आपन सिकार क फारिके खात रहत होत ह।

परमेस्सर क किरोध स इस्राएल क कउनो बचाइ नाहीं सकत

⁹ “हे इस्राएल, मइँ तोहार रच्छा किहे रहेउँ, मुला तू मोसे मुँह मोड़ लिहा। तउ अब मइँ तोहार नास करब ¹⁰ तोहार राजा कहाँ बाटइ जउन तोहरे सबहिं नगरन मँ तोहका बचाइ? कहाँ बाटइ तोहार सासक जेहसे तू आपन जरूरत क मागत ही कि ‘मोका एक राजा अउर राजकुमार द्या।’ ¹¹ मइँ कोहाइ गएउँ अउर मइँ तू पचन्क एक राजा दइ दिहेउँ। मइँ अउर जियादा कोहाइ गएउँ अउर मइँ तू पचन्स ओका छोरि लिहेउँ।