स्तोत्रसंहिता 86

Marathi Bible: Easy-to-Read Version

86 मी गरीब, असहाय्य माणूस आहे.
    परमेश्वरा माझे ऐक आणि माझ्या प्रार्थनेला उत्तर दे.
² परमेश्वरा मी तुझा भक्त आहे.
    कृपा करुन माझे रक्षण कर.
मी तुझा सेवक आहे.
    तू माझा देव आहेस.
माझा तुझ्यावर विश्वास आहे म्हणून मला वाचव.
³ माझ्या प्रभु, माझ्यावर दया कर
    मी दिवसभर तुझी प्रार्थना करीत आहे.
⁴ प्रभु, माझे जीवन तुझ्या हाती दिले आहे.
    मला सुखी कर, मी तुझा सेवक आहे.
⁵ प्रभु, तू चांगला आणि दयाळू आहेस.
    तुझी माणसे तुला मदतीसाठी हाका मारतात, तू त्या माणसांवर खरोखरच प्रेम करतो.
⁶ परमेश्वरा, माझी प्रार्थना ऐक.
    दयेसाठी माझी प्रार्थना ऐक.
⁷ परमेश्वरा, मी तुझी संकट काळात प्रार्थना करीत आहे.
    तू मला उत्तर देशील हे मला माहीत आहे.
⁸ देवा, इथे तुझ्यासारखा कुणीही नाही.
    तू जे केलेस ते कोणीही करु शकणार नाही.
⁹ प्रभु तूच प्रत्येकाला निर्माण केलेत.
    ते सर्व येतील आणि तुझी उपासना करतील आणि तुझ्या नावाला मान देतील अशी मी आशा करतो.
¹⁰ देवा, तू महान आहेस.
    तू अद्भुत गोष्टी करतोस.
    तू आणि फक्त तूच देव आहेस.
¹¹ परमेश्वरा, मला तुझे मार्ग शिकव.
    मी जगेन व तुझी सत्ये पाळीन.
तुझ्या नावाचा जप ही माझ्या आयुष्यातली
    सगळ्यात महत्वाची गोष्ट करायला मला मदत कर.
¹² देवा, माझ्या प्रभु मी अगदी मनापासून तुझी स्तुती करतो.
    मी तुझ्या नावाला सदैव मान देईन.
¹³ देवा, तुझे माझ्यावर खूप प्रेम आहे
    तू माझे मृत्यूलोकापासून रक्षण करतोस.
¹⁴ गर्विष्ठ लोक माझ्यावर हल्ला करतात.
    देवा, वाईट लोकांचा समूह मला ठार मारण्याचा प्रयत्न करीत आहे
    आणि ते लोक तुला मान देत नाहीत.
¹⁵ प्रभु, तू दयाळू आणि कृपाळू देव आहेस.
    तू सहनशील निष्ठावान आणि प्रेमपूर्ण आहेस.
¹⁶ देवा, तू माझे ऐकतोस हे मला दाखव.
    तू माझ्यावर दया कर.
मी तुझा दास आहे.
    मला शक्ती दे.
    मी तुझा सेवक आहे मला वाचव.
¹⁷ देवा, तू मला वाचवणार आहेस याची प्रचीती मला दाखव.
    माझ्या शत्रूंना ती खूण दिसेल आणि ते निराश होतील.
    तू माझी प्रार्थना ऐकलीस आणि तू मला मदत करणार आहेस हे यावरुन दिसून येईल.