यिर्मयाह 10

Awadhi Bible: Easy-to-Read Version

⁶ यहोवा तू जइसा कउनो दूसर नाहीं अहइ।
    तू महान अहा।
    तोहार नाउँ महान अउर सक्तितपूर्ण अहइ।
⁷ परमेस्सर, हर एक मनई क तोहार सम्मान करना चाही।
    तू सबहिं रास्ट्रन क राजा अहा।
तू ओनके सम्मान क पात्र अहा।
    रास्ट्रन मँ अनेक बुद्धिमान मनई अहइँ।
    किन्तु कउनो मनई तोहरे समान बुद्धिमान नाहीं अहइ।

⁸ दूसर रास्ट्रन क सबहिं लोग बेहुदा अउर मूरख अहइँ।
    ओनकर देवतन क सिच्छा केवल लकड़ी क टुकड़ा अहइँ।
⁹ उ पचे आपन मूरतियन क तर्सीस नगर क चाँदी
    अउर उफाज नगर क सोने क उपयोग कइके बनावत हीं।
उ सबइ देव मूरतियन बढ़इयन अउ सुनारन क जरिये बनाई जात हीं।
    उ पचे ओन देव मूरतियन क अच्छा किसिम क कीमती नीले अउर बैंगनी वस्त्र पहिरावत हीं।
    इ सबइ “कुसल कारीगरन” दुआरा बनाए गए रहेन।
¹⁰ किन्तु केवल यहोवा ही सच्चा परमेस्सर अहइ।
    उ एकमात्र परमेस्सर अहइ जउन चेतन अहइ।
    उ सास्वत सासक अहइ।
जब परमेस्सर किरोध करत ह तउ धरती काँप जात ह।
    रास्ट्रन क लोग ओकरे किरोध क रोक नाहीं सकतेन।

¹¹ यहोवा कहत ह, “ओन लोगन क इ सँदेसा द्या:
    ‘ओन लबार देवतन पृथ्वी अउ सरग नाहीं बनाएन
अउर उ पचे देवता नस्ट कइ दीन्ह जइहीं,
    अउर पृथ्वी अउर सरग स लुप्त होइ जइही।’”

¹² उ परमेस्सर एक ही अहइ जउन आपन सक्ति स पृथ्वी बनाएस।
    परमेस्सर आपन बुद्धि क उपयोग किहस अउर संसार क रचना कइ डाएस।
    आपन समुझ क अनुसार परमेस्सर पृथ्वी क ऊपर अकास क फइलाएस।
¹³ परमेस्सर कड़कत बिजली बनावत ह
    अउर उ अकास स बड़े जल क बाढ़ क सिरावत ह।
उ पृथ्वी क हर एक स्थान पइ, अकासे मँ मेघ क उठावत ह।
    उ बिजली क बर्खा क साथ पठवत ह।
    उ आपन गोदामन स पवन क निकारत ह।

¹⁴ लोग एतना बेवकूफ अहइँ।
    सुनार ओन देव मूरतियन स मूरख बनावा गएन ह जेनका उ पचे खुद बनाएन ह।
इ सबइ मूरतियन झूठ क अलावा कछू नाहीं अहइँ,
    उ सबइ निस्कृय अहइँ।
¹⁵ उ सबइ देव मूरतियन कउनो काम क नाहीं।
    उ सबइ कछू अइसी अहइँ जेनकर मजाक उड़ावा जाइ सकइ।
    निआउ क समइ आवइ पइ उ सबइ देव मूरतियन नस्ट कइ दीन्ह जइहीं।
¹⁶ किन्तु याकूब क परमेस्सर ओन देव मूरतियन क समान नाहीं अहइ।
    परमेस्सर सबहिं वस्तुअन क सृस्टि किहस,
अउर इस्राएल उ परिवार अहइ जेका परमेस्सर आपन लोग क रूप मँ चुनेस।
    परमेस्सर क नाउँ, “सर्वसक्तिमान यहोवा” अहइ।

¹⁹ ओह, मइँ बुरी तरह घायल अहउँ।
    मइँ ठीक नाहीं होइ सकत।
तउ भी मइँ खुद स कहेउँ,
    “इ मोर बेरामी अहइ, मोका एहसे पीड़ित होइ चाही।”

²⁰ मोर डेरा बर्बाद होइ गवा।
    डेरे क सारी रस्सियन टूट गइन ह।
मोर बच्चन मोका तजि गएन।
    उ पचे चला गएन।
कउनो मनई मोर डेरा लगावइ क नाहीं बचा ह।
    कउनो मनई मोरे बरे सरण ठउर बनावइ क नाहीं बचा ह।
²¹ गड़रियन (प्रमुख) मूर्ख अहइँ।
    उ पचे यहोवा क पावइ क जतन नाहीं करतेन।
उ पचे बुद्धिमान नाहीं अहइँ,
    एह बरे ओनकर रेवड़न (लोग) बिखर गइन अउर नस्ट होइ गइन ह।
²² धियान स सुना।
    एक कोलाहल, कोलाहल उत्तर स आवत अहइ।
इ यहूदा क नगरन क नस्ट कइ देइ।
    यहूदा एक सुनसान रेगिस्तान बन जाइ।
    इ गीदड़न क माँद बन जाइ।

²³ हे यहोवा, मइँ जानत हउँ कि मनई फुरइ आपन जिन्नगी क मालिक नाहीं अहइ।
    लोग फुरइ आपन भविस्स क जोजना नाहीं बनाइ सकत हीं।
    लोग फुरइ नाहीं जानतेन कि कइसे ठीक जिअत रहा जाइ।
²⁴ हे यहोवा, हमार अनुसान करा,
    किन्तु निआव स।
किरोध मँ हमका सजा जिन द्या।
    नाहीं तउ तू मोका नस्ट कइ देब्या।
²⁵ जदि तू कोहान अहा तउ दूसर रास्ट्रन क सजा द्या।
    उ पचे, न तोहका जानत हीं न ही तोहार सम्मान करत हीं।
    उ सबइ लोग तोहार आराधना नाहीं करतेन।
ओन रास्ट्रन याकूब क परिवारे क नस्ट किहन।
    उ पचे इस्राएल क पूरी तरह बर्बाद कइ दिहन।
    उ पचे इस्राएल क जन्मभूमि क नस्ट किहन।