Add parallel Print Page Options

गित्तीथ क संगत पइ संगीत निर्देसक बरे दाऊद क एक ठु पद।

हे यहोवा, हमार सुआमी, तोहार नाउँ सारी भुइँया पइ बहोतइ अद्भुत बाटइ।
    तोहार नाउँ सरगे मँ हर कइँती तोहका बड़कइ देत बाटइ।

लरिकन अउ नान्ह गदेलन क मुँहन स, तोहरी बड़कइ क गीत गावा जात हीं।
    तू आपन दुस्मनन क चुप करावइ मँ अइसा करत ह।

हे यहोवा, जब मोर निगाह अकासे पइ पड़त ह, जेका तू आपन हाथे स रच्या ह।
    अउर जब मइँ चाँद तारन क लखत हउँ जउन तोहार रचना बाटइ, तउ मइँ अचम्भा स भरि जात हउँ।
मनइयन तोहरे बरे काहे ऍतना महत्वपूर्ण होइ गएन?
    तू ओनका काहे बरे सुमिरत अहा?
मनई क पूत तोहरे बरे काहे महत्वपूर्ण बाटइ?
    काहे तू ओन पइ धियान तलक देत अहा?

मुला तोहरे बरे मनई महत्वपूर्ण अहइ!
    तू मनई क देवता क प्रतिरूप बनाया ह, अउ ओनके मूँड़े पइ महिमा अउ सम्मान क मुकुट धरे अहा।
तू आपन सृस्टि क जउन कछू भी रच्या ह
    मनइयन क ओकर हकदार बनाया ह।
मनई भेड़िन पइ, गोरू धने पइ अउ जंगल क सबहिं हिंसक जन्तुअन पइ राज्ज करत ह।
उ अकासे मँ पंछियन पइ
    अउ समुद्दर मँ तैरत भए जलचरन पइ राज्ज करत ह।
हे यहोवा, हमार सुआमी, सारी धरती पइ तोहार नाउँ बहोतइ अद्भुत अहइ।