भजन संहिता 79

Awadhi Bible: Easy-to-Read Version

¹ हे परमेस्सर, विदेसी लोग तोहरे सेवकन क संग लड़इ बरे आवा अहइँ।
    उ मनइयन तोहरे पवित्तर मन्दिर क बर्बाद किहन,
    अउ यरूसलेम क उ पचे खण्डहर बनाइ दिहन।
² तोहरे चेलन क ल्हासन क उ पचे जंगली पंछी क खाइ बरे डाइ दिहन।
    तोहरे मनवइयन क ल्हासन क उ पचे जनावरन क खाइ बरे डाइ दिहन।
³ ओन लोगन तोहार लोगन क रक्त पानी जइसा यरूसलेम क चारिहुँ कइँती फइलाएन।
    ओनकर ल्हासन क दफनावइ क कउनो भी नाहीं बचा।
⁴ हमार पड़ोसी देस हमका अपमानित किहन ह।
    हमरे आस पास क लोग सबहिं हँसत हीं, अउर हमार मसखरी उड़ावत हीं।
⁵ हे यहोवा कब तलक अइसा रहब्या, का तू सदा क बरे हम पइ कोहान रहब्या?
    का तोहार किरोध आगी क तरह धधकत रही?
⁶ आपन किरोध क ओन रास्ट्रन क विरोध मँ जउन तोहका नाहीं पहिचानतेन मोड़ द्या
    आपन किरोध क ओन रास्ट्रन क खिलाफ मोड़ द्या जउन तोहरे नाउँ क मदद बरे नाहीं पुकारतेन।
⁷ काहेकि उ सबइ रास्ट्र याकूब क नास किहन।
    उ पचे याकूब क देस क नास किहन।
⁸ तू हमरे पुरखन क पापन बरे कृपा कइके हमका सजा जिन द्या।
    हाली करा, तू हम पइ निज करुणा हाली देखॅावा
    काहेकि हम पचन्क बहोत अपमानित बाटइ।
⁹ मोर परमेस्सर, मोर उद्धारकर्ता, हमका सहारा द्या।
    आपन ही नाउँ क महिमा बरे हमार मदद करा।
हमका बचाइ ल्या।
    निज नाउँ क महिमा क खातिर हम लोगन क पाप क प्रायस्चित करा।
¹⁰ दूसर रास्ट्रन क लोगन क तू इ जिन कहइ द्या,
    “ओनकर परमेस्सर कहाँ बाटइ? का उ ओनका सहारा नाहीं दइ सकत ह?”
हे परमेस्सर, ओन लोगन क दण्ड द्या ताकि उ सजा क हम भी लखि सकी।
    ओन लोगन क तोहरे सेवकन क मारइ क सजा द्या।
¹¹ जेलि मँ बंद भए लोगन क कराहब कृपा कइके सुना।
    हे परमेस्सर, तू निज महासक्ती प्रयोग मँ लिआवा अउर ओन लोगन क बचाइ ल्या जेनका मरइ बरे ही चुना गवा ह।
¹² हे यहोवा हमरे आस-पास क रास्ट्रन क सात गुना सज़ा द्या
    काहेकि उ पचे तोहका अपमानित किहेन ह।
¹³ हम तउ तोहार लोग अही, हम तोहरे झुण्ड भेड़ी अही जेका तू पालत ह।
    हम तोहार गुनगान सदा करब।
    हे परमेस्सर हम सदा तोहार महिमा क बारे मँ बताउब।