भजन संहिता 75

Awadhi Bible: Easy-to-Read Version

² परमेस्सर कहत ह, “मइँ निआउ क समइ चुन लिहेउँ,
    मइँ निस्पच्छ होइके निआउ करब।
³ धरती अउ धरती क हर वस्तु डगमगाइ सकत ह अउर गिरइ क तइयार होइ सकत ह,
    किन्तु मइँ ही ओका स्थिर राखत हउँ।

⁴ “कछू लोग बहोत ही घमण्डी होत हीं।
    उ पचे सोचत रहत हीं कि उ पचे बहोत मजबूत अउ महत्वपूर्ण बाटेन।
मुला मई उनसे कहत हउँ, ‘घमण्डी जिन बना!
    अइसा बिउहार जिन करा कि तू बहोत मजबूत अउ महत्वपूर्ण अहइ।
⁵ अइसा जिन दिखावा कि तू बहोत सक्तीसाली अहइ
    अउर अहंकारी जिन बना।’”

⁶ इ फुरइ अहइ कि कउनो भी मनई
    धरती पइ नीच क महान नाहीं बनाइ सकत।
⁷ परमेस्सर सासक ह।
    परमेस्सर ऍकर फैसला करत ह कि कउन मनई महान होइ।
परमेस्सर ही कउनो मनई क महत्व स भरा पद पइ बइठावत ह।
    अउर कउनो क महत्वहीन पद पइ उहइ बइठावत ह।
⁸ परमेस्सर क पिआला मिलावटी मधु स भरा बाटइ।
    परमेस्सर दण्ड क इ दाखरस क उड़ेरत ह।
अउर दुट्ठ जन ओका
    आखिरी बूँद तलक पिअत हीं।
⁹ मइँ इ बातन क घोसना करब जउन परमेस्सर सदा बरे करत ह।
    मइँ इस्राएल क परमेस्सर क महिमा क गुण गाउब।
¹⁰ परमेस्सर कहत ह, “मइँ दुट्ठ लोगन क सक्ती क हटाइ देब।
    किन्तु सबइ नीक लोगन क सम्मान सक्ती स कीन्ह जाइ।”