भजन संहिता 86

Awadhi Bible: Easy-to-Read Version

¹ मइँ एक दीन, असहाय मनई अहउँ।
    हे यहोवा, तू कृपा कइके मोर सुनि ल्या, अउर तू मोर विनती क जवाब द्या।
² मइँ तोहार भगत हउँ, कृपा कइके मोर रच्छा करा।
    मइँ तोहार सेवक अहउँ अउर तू मोर परमेस्सर अहा।
    मइँ तोह पइ भरोसा किहेउँ, कृपा कइके मोका बचावा।
³ मोर सुआमी, मोह पइ दाया करा।
    मइँ सारा दिन तोहार बिनती करत रहत हउँ।
⁴ हे मोर यहोवा, मइँ आपन जिन्नगी तोहार हाथन मँ देत हउँ।
    हे मोर सुआमी, मोका, आपन सेवक क सुखी बनावा।
⁵ हे सुआमी, तू नीक अउ छिमाकर्ता अहा।
    तू आपन मनवइयन स बहोत पिरेम करत अहा, जउन सहारा पावइ क तोहका गोहरावत हीं।
⁶ हे यहोवा, मोर बिनती सुनि ल्या।
    कृपा कइके तू आपन कान क मोर पराथना पइ दाया बरे द्या।
⁷ हे यहोवा, आपन संकट क घरी मँ मइँ तोहार बिनती करत हउँ।
    मइँ जानत हउँ तू मोका जवाब देब्या।
⁸ हे सुआमी, तोहरे जइसा कउनो देवता नाहीं अहइ।
    जइसेन काम तू किहा ह वइसा काम कउनो भी नाहीं कइ सकत।
⁹ हे सुआमी, तू ही सब लोगन क रच्या ह।
    उ पचे आइहीं अउर तोहार आराधना करिहीं।
    उ पचे सबहिं तोहरे नाउँ क आदर करिहीं।
¹⁰ हे परमेस्सर, तू महान अहा।
    तू अजूबा करम करत अहा।
    तू अकेल्ले ही परमेस्सर अहा।
¹¹ हे यहोवा, मोका आपन राहन क सिच्छा द्या,
    तउ मइँ तोहरे सच्चाइ क अनुसार रहेबउँ।
कृपा कइके मोर मदद करा,
    तउ मइँ पूरे हिरदय स तोहार उपासना करबउँ।
¹² हे मोर सुआमी परमेस्सर, मइँ सम्पूर्ण हिरदय स तोहार गुण गावत हउँ।
    मइँ तोहरे नाउँ क आदर सदा सदा ही करबउँ।
¹³ काहेकि तू मोका बहोत जिआदा पिरेम किहा ह।
    तू मोका मउत क गहड़ा खाइ स बचाया ह।
¹⁴ परमेस्सर, अहंकारी लोग मोह पइ वार करत अहइँ।
    कर लोगन क समूह मोका मार डावइ चाहत अहइँ।
    अउर उ सबइ मनई तोहार आदर नाहीं करत अहइँ।
¹⁵ हे सुआमी, तू दयालु अउ कृपा स भरा परमेस्सर अहा।
    तू धीरज स भरा, बिस्सासी अउ पिरेम स भरा अहा।
¹⁶ हे परमेस्सर, देखावा कि तू मोर सुनत ह अउर मोह पइ कृपालु रहत ह।
    मइँ तोहार सेवक हउँ, तू मोका सक्ति द्या।
    मइँ तोहार सेवक हउँ, मोका बचावा!
¹⁷ हे यहोवा, कछू अइसा करा जेहसे इ साबित होइ कि तू मोर सहायता करब्या।
    तब मोर दुस्मन एका जानिहीं अउ निरास होइ जइहीं।
    तउ इ परगट होइ तू उहइ अहा जउन मोर मदद किह्या अउर मोका आराम दिह्या।