Add parallel Print Page Options

11 जब रहूबियाम यरूसलेम आवा, उ एक लाख अस्सी हजार सर्वोत्तम जोधन क बटोरेस। उ एन जोधन क यहूदा अउ बिन्यामीम क परिवार समूहन स बटोरेस। उ एनका इस्राएल क खिलाफ लड़इ बरे तइयार किहेस जेहसे उ राज्ज क रहूबियाम क वापस लउटाइ सकइ। किन्तु यहोवा क सँदेस समायाह क लगे आवा। समायाह परमेस्सर क मनई रहा। यहोवा कहेस, “समायाह यहूदा क राजा, सुलैमान क पूत रहूबियाम स बातन करा अउर यहूदा अउ बिन्यामीन मँ रहइवाले सबहिं इस्राएल क लोगन स बातन करा। ओनसे कहा, यहोवा इ कहत ह: ‘तोहका अपने भाइयन क खिलाफ नाहीं लड़इ चाही। हर एक मनई अपने घर लउटि जाइ। मइँ ही अइसा होइ दिहेउँ ह।’” एह बरे राजा रहूबियाम अउर ओकर फउज यहोवा क सँदेसा मानेस अउर उ पचे लउटि गएन। उ पचे यारोबाम पइ हमला नाहीं किहन।

रहूबियाम यहोवा क सक्तीसाली बनावत ह

रहूबियाम यरूसलेम मँ रहइ लाग। उ हमलन क खिलाफ रच्छा बरे यहूदा मँ सुदृढ़ नगर बनाएस। उ बेतलेहेम, एताम, तकोआ, बेत्सूर, सोको, अदुल्लाम, गत, मारेसा, जीप, अदौरैम, लाकीस, अजेका, 10 सोरा, अय्यालोन, अउर हेब्रोन नगरन क मरम्मत कराएस। यहूदा अउ बिन्यामीन मँ इ सबइ नगर मजबूत बनाए गएन। 11 जब रहूबियाम ओन नगरन क मजबूत बनाइ लिहस तउ ओनमाँ सेनापति रखेस। उ ओन नगरन मँ भोजन, तेल अउर दाखरस क पूर्ति क व्यवस्था किहस। 12 रहूबियाम ढार अउ भालन भी हर एक नगर मँ रखेस अउर ओनका बहोत सक्तीसाली बनाएस। रहूबियाम यहूदा अउ बिन्यामीन क लोगन अउर नगरन क अपने अधिकार मँ रखेस।

13 पूरे इस्राएल क याजक अउ लेवीबंसी रहूबियाम स सहमत रहेन अउर उ पचे ओकरे संग होइ गएन। 14 लेवी बंसियन अपनी घासवाली भुइयाँ अउर आपन खेत छोड़ दिहन अउर उ पचे यहूदा अउ यरूसलेम आइ गएन। लेवीबंसियन इ एह बरे किहेन कि यारोबाम अउर ओकर पूतन ओनका यहोवा क याजक क रूप मँ सेवा करावइ क अनुमति देइ स इन्कार कइ दिहस।

15 यारोबाम अपने ही याजकन क हुवाँ ऊँची जगहन पइ सेवा करइ बरे नियुक्त किहस जहाँ उ बोकरन अउ बछवन क ओन मूरतियन क स्थापना किहस जेनका उ बनाए रहा। 16 जब लेवीबंसियन इस्राएल क तजि दिहन तब इस्राएल क परिवार समूह क उ सबइ लोग जउन इस्राएल क यहोवा परमेस्सर क बरे बिस्सास जोग्ग रहेन, यरूसलेम मँ यहोवा, अपने बापन क परमेस्सर क बलि चढ़ावइ आएन। 17 ओन लोग यहूदा क राज्ज क सक्तीसाली बनाएस अउर उ पचे सुलैमान क पूत रहूबियाम क तीन बरिस तलक समर्थन दिहन। उ पचे अइसा करत रहेन काहेकि इ समइ मँ उ पचे वइसे रहत रहेन जइसे दाऊद अउ सुलैमान रतह रहेन।

रहूबियाम क परिवार

18 रहूबियाम महलत स बियाह किहेस। ओकर बाप यरीमोत रहा। ओकर महतारी अबीहैल रही। यरीमोत दाऊद क पूत रहा। अबीहैल एलीआब क बिटिया रही अउर एलीआब यिसै क पूत रहा। 19 महलत स रहूबियाम क इ सबइ पूत पइदा भएन: यूस, समर्याह अउर जाहम। 20 तब रहूबियाम माका स बियाह किहस। माका अबसलोम क पोती रही अउर माका स रहूबियाम क इ सबइ बच्चन भएन: अबिय्याह, अत्ते, जीजा अउर सलोमीत। 21 रहूबियाम माका स सबहिं दूसर मेहररुअन अउ दासियन स जियादा पिरेम करत रहा। माका अबसालोम क पोती रही। रहुबियाम क अट्ठारह मेहररुअन अउ साठ रखैल रहिन। रहूबियाम अट्ठाईस पूतन अउ साठ बिटियन क बाप रहा।

22 रहूबियाम अपने भाइयन मँ माका क पूत अबिय्याह क प्रमुख चुनेस। रहूबियाम इ एह बरे किहस काहेकि उ अबिय्याह क राजा बनावइ क योजना बनाएस। 23 रहूबियाम इ बुद्धिमानी क काम अपने पूतन क यहूदा अउर बिन्यामीन क पूरा प्रान्तन मँ अउर हर एक सक्तीसाली नगर मँ फैइलाइ कइ क किहस। उ अपने पूतन क बहोत जियादा भोजन दिहेस अउर ओकरे बरे मेहररुअन क खोज किहस।