जकर्याह 9

Awadhi Bible: Easy-to-Read Version

दूसर रास्ट्रन क संग निआव

9 एक ठु भविस्सबाणी: यहोवा क सँदेसा हद्राक क देस अउ ओकर राजधानी दमिस्क क खिलाफ अहइ। इ सँदेसा इ बिदेसी देस क बारे मँ दीन्ह ग रहा। काहेकि न सिरफ इस्राएल क परिवार समूह बल्कि सबइ मानव जाति यहोवा क मदद बरे ओकरी कइँती लखत अहइँ। ² इ भविस्सबाणी भी हामात क खिलाफ अहइ जउन हद्राक क चउहद्दी मँ अहइ। इ भविस्सबाणी सोर तथा सीदोन क भी खिलाफ अहइँ भले ही उ बहोत बुद्धिमान अहइँ। ³ सोर एक ठु किला क नाई बना अहइ। हुआँ क लोग चाँदी ऍतना बटोर लिहे अहइँ, कि उ धूलि क नाईं सुलभ बाटइ अउर सोना ऍतना साधारण अहइ जइसे माटी। ⁴ मुला अब यहोवा ओकरे सबइ अधिकार क लेइ बरे जात ह। उ पचे ओकर सक्तीसाली नौसेना क नस्ट करी अउर उ सहर आगी स नस्ट होइ जाइ।

⁵ अस्कलोन मँ रहइवाले लोग इ सबइ घटना क लखिहीं अउ उ पचे डेरइहीं। अज्जा क लोग काँप उठिहीं अउ एक्रोन क लोग समूची आसा क तजि देइहीं, जब उ पचे ओन घटनन क होब होत लखिहीं। अज्जा मँ कउनो राजा बचा नाहीं रही। कउनो भी मनई अब अस्कलोन मँ नाहीं रही। ⁶ अस्दाद मँ बहोत सारा लोग इ भी नाहीं जानिहीं कि ओनकर पिता कउन अहइँ, “अउ मइँ पलिस्ती लोगन घमण्ड क हटाइ देब। ⁷ मइँ उ पचन्क मुँह स उ पचन्क गोस क लइ लेब जेहमाँ खून अहइ; मइँ उ पचन्क क उ घृणित भोजन क लइ लेब जउन ओकर दाँतन क बीच होइ। सबइ जिअत बचा भवा प्राणियन मोर परमेस्सर स सम्बन्धित होइ। तउ उ यहूदा क बंसज क नाईं होइ जाब्या, अउर एक्रोन क लोग यबूसी लोग क जइसा होइ जाइ। ⁸ मइँ आपन मन्दिर पइ सिबिर लगाउब। मइँ ओकर रच्छा सिपाही ह रूप मँ ओन लोगन स करब जउन आइ अउर हमला करइ बरे जाइ। कउनो अत्याचारी मोर लोगन क खिलाफ अउर नाहीं बढ़ सकब, काहेकि मइँ ओका निहारत हउँ।”

भविस्स क राजा

यहोवा आपन लोगन क रच्छा करी