कुस्रू बन्दियन क वापसी मँ मदद करत ह

1 फारस क राज्ज कुस्रू क सासन क पहिले बरिस यहोवा कुस्रू क आतिमा क एक ठु घोसणा करइ क बरे उत्साहित किहस। कुस्रू उ घोसणा क लिखवाएस अउ अपने राज्ज मँ हर एक जगह बँचवाएस। इ एह बरे कीन्ह गवा रहा ताकि यहोवा क उ सँदेसा जउन यिर्मयाह क जेरिये कहा गवा रहा, पूरा होइ सकइ। घोसणा इ अहइ:

² फारस क राजा कुस्रू क सँदेसा:

सरग क परमेस्सर यहोवा, धरती क सारे राज्ज मोका दिहेस ह अउर यहोवा मोका यहूदा देस क यरूसलेम मँ ओकर एक ठु मन्दिर बनावइ बरे चुनेस। ³ यहोवा, इस्राएल क परमेस्सर अहइ, उ परमेस्सर जउन यरूसलेम मँ अहइ। जदि परमेस्सर क कउनो लोग तोहरे बीच रहत अहइ तउ मइँ इ पराथना करत हउँ कि परमेस्सर ओका आसीर्बाद देइ। उ पचे क यहूदा देस क यरूसलेम मँ जाइ चाही। उ पचे यहोवा क मन्दिर क बनावइ बरे जाइ चाही, ⁴ अउर एह बरे कउनो भी उ जगह मँ जहाँ इस्राएल क लोग बचे होइँ। उ जगहिया क लोगन क ओन बचे हुवन क मदद करइ चाही। ओन लोगन क चाँदी, सोना, गाइ अउर दूसर चिजियन द्या। यरूसलेम मँ परमेस्सर क मन्दिर बरे ओका भेंट द्या।

⁵ एह बरे यहूदा अउर बिन्यामीन क परिवार समूहन क प्रमुखन यरूसलेम जाइ क तइयारी किहन। उ पचे यहोवा क मन्दिर क बनवाइ बरे यरूसलेम जात रहेन। परमेस्सर जउन लोगन क प्रोत्साहित किहे रहा उ पचे भी यरूसलेम जाइ क तइयार होइ गएन। ⁶ ओनकर सबहिं पड़ोसियन ओका चाँदी अउर सोना क चिजियन औजार, जनावरन अउर कीमती चिजियन क ओन दुसर चिजियन क अतिरिक्त जउन उ पचे मेल भेंट क रूप मँ दिहन, दइ क ओनका मदद किहन। ⁷ राजा कुस्रू भी ओन चिजियन क लिआवा जउन यहोवा क मन्दिर क रहिन। नबूकदनेस्सर ओन चिजियन क यरूसलेम स लूट लिआवा रहा। नबूकदनेस्सर ओन चिजियन क अपने उ मन्दिर मँ धरेस, जेहमाँ उ अपने लबार देवतन क धरत रहा। ⁸ फारस क राजा कुस्रू अपने उ मनई स ओकरे धने क देखरेख करत रहा, एन चिजियन क बाहेर लिआवइ बरे कहेस। उ मनई क नाउँ मिथूदात रहा। एह बरे मिथूदात ओन चिजियन क यहूदा क प्रमुख सेसबस्सर क लगे लइके आवा।

⁹ जिन चिजियन क मिथूदात यहोवा क मन्दिर स लिआवा रहा, उ सबइ इ सबइ रहिन: सोना क भाँड़ी 30, चाँदी क भाँड़ी 1,000, चाकू अउर कड़ाहियन 29, ¹⁰ सोना क खोरन 30, सोना क खोरन जइसे चाँदी क खोरन 410, अउ 1,000 दूसर तरह क भाँडी।

¹¹ सब मिलाइके हुवाँ सोना चाँदी क बनी पाँच हजार चार सौ चिजियन रहिन। सेसबस्सर एन सबहिं चिजियन क अपने संग उ समइ लिआवा जब बन्दियन बाबेल छोड़ेन अउर यरूसलेम क वापस लउट गएन।