Add parallel Print Page Options

याकूब आपन पूतन क असीसत ह

49 तब याकूब आपन सबहि बेटवन क आपन लगे बोलाएस। उ कहेस, “मोर सबइ बेटउनो, हिआँ मोरे लगे आवा। मइँ तोहका बताउब कि भविस्स मँ का होइ।

“याकूब क पूते, एक साथे आवा अउ सुना,
    आपन पिता इस्राएल क सुना।

रूबेन

“रूबेन, तू मोर पहिलउटी क बेटवा अहा।
    तू मोर पहिलउटी क बेटवा अउ मोरी सकती क पहिला सबूत अहा।
तू मोर सबहि बेटवन स
    जियादा इज्जतदार अउ बरिआर अहा।
मुला तोहार उमंग बाढ़े का लहर क
    नाईं बेकाबू रहा।
इसलिए तू मोर सबहि पूतन स
    जियादा सम्मानित पूत अउर नाही रहिसकब्या।
तू आपन बाप क बिछाउना पइ चढया
    अउ ओकर पत्नियन मँ स एक क संग सोया।
तू आपन पिता क बिछाउना क
    लज्जित किहेस ह।

सिमोन अउ लेवी

“सिमोन अउ लेवी भाई अहइँ।
    ओनका आपन तरवारे स लड़ब पियारा अहइ।
उ पचे छुपे रूप बुरी योजना बनाएन,
    मइँ ओनकइ योजना क कउनो हीसा नाहीं चाहत हउँ
मइँ ओनकइ छुपी बइठकन क अनुमोदन नाही करब।
    उ पचे मनइयन क कतल किहन जब उ सबइ किरोध मँ रहेन अउ
    उ पचे सिरिफ मजाक बरे जनावरन क चोट पहोंचाएन।
ओनकइ किरोध एक सराप अहइ।
    इ सबइ बहोत जियादा कठोर अहइ जब उ सबइ पगलात ही।
याकूब क देस मँ ओनके परिवारन क आपन भुइँया न होइ।
    उ पचे पूरा इस्राएल मँ फइलि जइही।

यहूदा

“यहूदा, तोहार भाईयन तोहार प्रसंसा करिहीं।
    तू आपन दुस्मनन क हरउब्या।
    तोहरे भाई तोहरे समन्वा निहुरिही।
यहूदा उ सेर क नाईं अहइ जउन कउनो जनावर क मारे होइ।
    हे मोर पूत, तू उ सेर क तरह अहा जउन आपना सिकार क बाद
अराम करई बरे सोइ जात ह।
    अउर कउनो ऍतना बहादुर नाही कि ओका छेड़ि देइ।
10 यहूदा क परिवार क मनई राजा होइहीं।
    ओकरे परिवार क राज-चीन्हा सीलो।[a]
क अवाई स पहिले खतम न होइ।
    तब अनेक लोग ओकर हुकुम मनिहीं।
11 उ आपन गदहा क अंगूरे क लता स बाँधत ह।
    उ आपन गदहा क बच्चन क सबसे बढ़िया अंगूरे क लता मँ बाँधत ह।
उ आपन ओढ़ना क धोवइ बरे सबसे बढ़िया दाखरस क बइपरत ह।
12 ओकर आँखिन दाखरस पिए स ललछउँड़ रहत हीं।
    ओकर दँतवन दूध पिए स उज्जर अहइँ।

जबूलन

13 “जबूलब समुद्दर क निअरे रही।
    ऍकर समुद्दर क किनारा जहाजन बरे सुरच्छित रही।
    ऍकर पहटा सीदोन तलक फइला होइ।

इस्साकर

14 “इस्साकर उ गदहा क तरह अहइ जउन बहोत जियादा कठोर काम किहे अहइ।
    उ भारी बोझ ढोवइ क कारण पस्त पड़ा अहइ।
15 उ लखी कि ओकरे आराम क जगह अच्छी अहइ।
    अउर इ कि ओकर भुइँया आनन्दायक ह।
तब उ भारी बोझा ढोवइ क तइयार होइ।
    उ गुलाम क रुप मँ काम करब अंगीकार करी।

दान

16 “दान आपन लोगन क निआव वइसे ही करब्या
    जइसे इस्राएल क दूसर परिवार क संग करत ही।
17 दान सड़क क किनारे
    सरप क तरह अहइ।
उ रास्ता क लगे ओलरा भवा
    खौफनाक सरप क तरह अहइ,
जउन घोड़न क गोड़न क डसत ह,
    अउ सवार भुइँया प भहराइ पड़त ह।

18 “यहोवा, मइँ मुक्ति क जोहत अहउँ।

गाद

19 “डाकुअन क एक ठु गिरोह गाद प हमला करी।
    मुला गाद ओनका मार भगाई।”

आसेर

20 “आसेर क भुइँया बहोत बढ़िया उपज देइ।
    ओका उहइ खइया क मिली जउन राजा लोगन बरे जोग्ग होइ।

नप्ताली

21 “नप्ताली एक अजाद मादा हिरन क तरह अहइ जेका अजाद कीन्ह गवा ह।
    उ सुन्नर सब्द कहत ह।

यूसुफ

22 “यूसुफ बहोत सुफल अहइ।
    यूसुफ फलन स लदी भइ गवा क तरह अहइ।
उ झरना क लगे जमी अंगूरे क गवा क तरह बाटइ,
    बाड़ा क सहारे जमी अंगूरे क गवा क तरह अहइ।
23 ढेर मिला ओकरे खिलाफ भएन
    अउ ओसे लड़ेन।
धनुर्धारी मनइयन ओकर दुस्मन होइ गवा।
24 मुला उ आपन सकतीवाला धनुख
    अउ फुर्ताला बाँहे स जुद्ध जीतेस।
उ याकूब क सकतीवाला परमेस्सर गड़रियन,
    इस्राएल क चट्टान स सकती पावत ह।
25 अउर आपन पिता क परमेस्सर स सकती पावत ह।
परमेस्सर तोहका आसीर्बाद देइ।
    सर्वसक्तीमान परमेस्सर तोहका आसीर्बाद देइ।
उ तोहका ऊपर स आसीर्बाद देइ
    अउर खाले गहिर समुद्दर स आसीर्बाद देइ।
होइ सकत ह उ तोहका छाती
    अउ गरभ स आसीर्बाद देइ।
26 मोरे महतारी-बाप क बहोत स बढ़िया चीजन होत रहिन।
    अउर मइँ तोहार पिता बहोत जियादा आसीर्बाद पावत रहा।
अब मइँ आपन आसीर्बाद क यूसुफ पइ जमा करब जउन
    पहाड़ क समान ऊँचा होइ, हाँ ओकरे सिर पई जेका ओकरे भाईयन स
    अल्गाइ दीन्ह गवा रहेन।

बिन्यामीन

27 “बिन्यामीन एक अइया भुखा बड़का कूकुर क समान अहइ।
    जउन भिन्सारे मारत ह ओका खात ह।
    संझा क उ बचा खुचा स काम चलावत ह।”

28 इ सबइ इस्राएल क बारह परिवार अहइँ। अउर उहइ चीजन अहइँ जेनका ओनके पिता ओनसे कहे रहा। उ हर एक पूत क उ आसीर्बाद दिहस जउन ओकरे बरे ठीक रहा। 29 तब इस्राएल ओनका एक हुकुम दिहस। उ कहेस, “जब मइँ मरउँ तउ मइँ आपन लोगन क बीच रहइ चाहत हउँ। मइँ आपन पुरखन क संग हित्ती एप्रोन क खेतन क गुफा मँ दफनावा जाइ चाहत हउँ। 30 उ गुफा मम्रे क नगिचे मकपेला क खेते मँ अहइ। इ कनान देस मँ अहइ। इब्राहीम उ खेत क एप्रोन स ऐह बरे बेसहेस जेहसे ओकरे लगे एक ठु कब्रिस्तान होइ सकइ। 31 इब्राहीम अउ ओकर मेहरारु सारा उहइ गुफा मँ दफनावा गए अहइँ। इसहाक अउ ओकर मेहरारु रिबका उहइ गुफा मँ दफनाए गएन। मइँ आपन मेहरारु लिआ क उहइ गुफा मँ दफनावा। 32 उ गुफा उ खेत मँ अहइ जेका हित्ती लोगन स बेसहा ग रहा।” 33 आपन पूतन स बातन खतम करइ क पाछे याकूब ओलर गवा, गोड़वन क आपन बिछउना प धरेस अउ मरि गवा।

Footnotes

  1. 49:10 सीलो एक कठिन इब्रानी सब्द, सम्भवत: एक नाउँ, जेका अरथ होसकत ह, “उहइ एक जेका आधिकार मँइ अहइ।”