96 اُن نئے کاموں کے بارے میں جنہیں خدا وند نے کیا ہے نیا گیت گاؤ۔
    اے اہل زمین ! خدا وند کے احترام میں گاؤ۔
² خدا کے احترام میں گاؤ۔ اُس کے نام کو مُبارک کہو۔
    اسکی خوشخبری کو سناؤ۔ انکا ذِکر کرو جو ہمیں ہر روز بچاتا ہے۔
³ تمام قوموں میں ہر جگہ اُس کے جلال کی خبریں سناؤ۔
    سب لوگوں میں اس کے حیرت انگیز کاموں کو بیان کرو جو خدا کر تا ہے۔
⁴ خدا وند عظیم ہے اور ستائش کے لا ئق ہے۔
    وہ دوسرے “دیوتاؤں ” سے زیادہ مہیب ہے۔
⁵ قوموں کے سب “خدا وند ”محض بت ہیں۔
    مگر خدا وند نے آسمانوں کو بنایا ہے۔
⁶ اسکے حضور میں عظمت اور جلال ہے۔
    خدا کی ہیکل میں جلال اور قدرت ہے۔
⁷ قبیلو اور قومو خدا وند کے جلال
    اور قوّت کی ستائش میں گیت گاؤ۔
⁸ خدا کے نام کی تمجید کرو۔
    اپنا ہدیہ اٹھاؤ اور اُسکی بارگاہ میں آؤ ”
⁹ آرائش اور تقدس کے ساتھ خدا کی عبادت کرو۔
    اے اہل زمین ! اُسکی ستائش کرو۔
¹⁰ قوموں میں اعلان کرو کہ خدا بادشاہ ہے۔
    اِس لئے کہ دُنیا تباہ نہیں ہو گی۔
    خدا لوگوں کا فیصلہ صداقت سے کریگا !
¹¹ اے آسمان خوشی منا اور زمین شادماں ہو۔
    اے سمندر اور اسکی ساری چیزیں خوشی سے شور مچاؤ۔
¹² اے کھیتو! اور اِس میں اُگنے و الی ہر شئے باغ باغ ہو جاؤ۔
    اے جنگل کے درختو ! گاؤ اور خوشیاں مناؤ۔
¹³ خوش ہو جاؤ کیوں کہ خدا وند آرہا ہے۔
    خدا وند زمین پر انصاف کر نے آرہا ہے۔
    وہ راستی اور انصاف سے دنیا پر حکو مت کریگا۔