13 Одржувајте го братољубието меѓу вас. ² Не пропуштајте да бидете гостољубиви, зашто некои луѓе така имаат угостено ангели, без да го знаат тоа. ³ Сеќавајте се на затворените, како да сте со нив во окови, не заборавајте ги страдалниците, како да сте и вие дел од нивното тело.

Повик на брачна чистота

⁴ Бракот треба да се почитува од сите. Мажот и жената да ја чуваат својата интимност без неверства, зашто на блудниците и прељубниците ќе им суди Бог!

Повик на скромност

⁵ Во вашите постапки не бидете алчни за пари. Бидете задоволни со тоа што го имате. Господ ни ветува:

„Нема да ве оставам, нема да ве напуштам^[a]!“

⁶ Затоа храбро можеме да кажеме:

„Јас не страхувам, зашто Господ е со мене;

што може да ми направи човекот^[b]?“

Повик на следење добар пример

⁷ Помнете ги вашите старешини кои први ви ја проповедаа Божјата порака. Видете го резултатот од нивниот начин на живеење и земете ја за пример нивната вера!

Поглед кон Христос, а не кон обичаите

⁸ Исус Христос не се менува: Тој е истиот, вчера, денес и засекогаш! ⁹ Не дозволувајте да ве заведат со некои чудни учења. Внатрешната сила се добива преку Божјата дарежлива благонаклоност, а не преку држење обичаи за храна; оние што се држеа до овие обичаи, немаа никаква полза од тоа. ¹⁰ А ние имаме жртвеник од кој дури ни свештениците што служат во Храмот^[c] немаат право да јадат!

¹¹ Првосвештеникот ја внесува крвта од жртвуваните животни во Најсветото место на Храмот, како принос за гревовите. Но телата на животните се палат надвор од Храмот. ¹² Затоа и Исус беше погубен надвор од градските порти, за да го исчисти Својот народ од гревови, преку Својата пролеана крв. ¹³ Така ние сега треба „да излеземе од тој Храм“ и да пристапиме кон Исус, станувајќи така соучесници во срамот на којшто Тој беше изложен. ¹⁴ Зашто ние овде на Земјава немаме град во кој вечно ќе живееме, туку го очекуваме во иднина.

¹⁵ Нашата постојана жртва е, со помошта на Исус, да Му принесуваме слава на Бог со своите усни, кои ќе Го величаат и прославуваат Неговото име. ¹⁶ Не заборавајте да им помагате на другите и да ги делите своите добра со нив, зашто и тоа се богоугодни жртви.

¹⁷ Слушајте ги вашите духовни водачи и потчинувајте им се. Тие бдеат над вашите души и за тоа се одговорни пред Бог. Овозможете им тоа да го прават со радост, а не со воздишки, зашто тоа нема да биде во ваш интерес.

Лични молби и молитви од писателот

¹⁸ Молете се за нас! Ние сме уверени дека имаме чиста совест, бидејќи секогаш се трудиме во се да се однесуваме како што прилега. ¹⁹ Посебно сакам да се молите наскоро да можам повторно да ве посетам.

²⁰ Бог е извор на мирот и Тој го воскресна од мртвите нашиот Господ Исус Христос. Исус е сега најголемиот Пастир, со чијашто крв се склучи вечниот Завет во полза на Неговото стадо. ²¹ Се молам Бог да ве оспособи за секакво добро дело, за да можете да ја извршувате Неговата волја. Бог нека го изврши во нас она што Му е угодно, преку Исус Христос, Кому што Му припаѓа вечна слава! Амин.

²² Ве молам, браќа, внимателно да го ислушате ова кратко писмо што ви го напишав со цел да ве охрабрам.

²³ Ве известувам дека нашиот брат Тимотеј го пуштија од затвор! Ако тој пристигне навреме, заедно ќе ве посетиме.

²⁴ Поздравете ги сите ваши духовни водачи и сите Божји луѓе. И христијаните од Италија ви испраќаат поздрави.

²⁵ Бог нека биде милостиво благонаклонет спрема сите вас!