Исус како добар Пастир

10 Ве уверувам дека, штом некој не влегува низ вратата на трлото, туку се обидува да прескокне на друго место, тој е крадец и разбојник. ² Вистинскиот пастир на овците влегува низ вратата. ³ Нему вратарот Му отвора. Овците го слушаат Неговиот глас, а Тој ги повикува Своите овци по име и ги изведува. ⁴ Кога ќе ги изведе сите Свои овци, Тој оди пред нив, а Неговите овци Го следат, бидејќи Му го познаваат гласот. ⁵ Тие никогаш нема да следат туѓинец^[a], туку ќе бегаат од него, бидејќи не му го познаваат гласот.“ ⁶ Исус им ја кажа оваа алегорична приказна, но тие не разбраа што сакаше да им каже.

⁷ Тогаш Исус повторно им рече: „Ве уверувам дека Јас сум вратата за овците. ⁸ Сите^[b] што дојдоа пред Мене беа крадци и разбојници, но Божјите овци не ги послушаа. ⁹ Јас сум вратата. Секој што ќе влезе преку Мене, ќе се спаси; ќе може да влегува, да излегува^[c] и да наоѓа пасиште. ¹⁰ Крадецот доаѓа само за да украде, да убие и да уништи. Јас дојдов за да дадам живот - и тоа живот во сета негова полнота.

¹¹ Јас сум добриот Пастир. Добриот пастир го дава Својот живот за овците. ¹² Наемникот не е вистински пастир; овците не се негови, и кога тој ќе забележи дека се приближува волк ги остава овците и бега. Тогаш волкот го напаѓа стадото и го распрснува. ¹³ Наемникот бега, зашто е наемник и не му е грижа за овците.

¹⁴ Јас сум добриот Пастир. Јас ги познавам Моите овци и тие Ме знаат Мене, ¹⁵ како што Таткото Ме знае Мене, и како што Јас Го знам Таткото. И Својот живот го давам за овците. ¹⁶ Имам и други овци, кои не се од ова стадо. И нив треба да ги приберам, кога ќе го слушнат Мојот глас. Тогаш ќе има едно стадо и еден Пастир. ¹⁷ Таткото Ме сака, бидејќи Јас го давам Својот живот за повторно да си го земам. ¹⁸ Никој не ми го одзема животот, туку Јас доброволно го давам. Имам моќ да го дадам Својот живот и имам моќ повторно да си го вратам. Ова овластување го примив од Мојот Татко.“

¹⁹ Заради овие зборови на Исус, повторно се појави раздор меѓу еврејските верски водачи. ²⁰ Многумина од нив велеа: „Обземен е од демон! Полудел! Зошто Го слушате!?“

²¹ Други, пак, велеа: „Овие зборови не се зборови на човек обземен од демон! Може ли човек што е обземен од демон да им ги отвора очите на слепи луѓе!?“

Исус е отфрлен

²² Беше зима и во Ерусалим се славеше празникот Ханука^[d]. ²³ Исус се шеташе во храмот, под Соломоновиот трем. ²⁴ Еврејските верски водачи се насобраа околу Него и Го прашаа: „До кога ќе не држиш во неизвесност? Ако си Ти Месијата, кажи ни отворено!“

²⁵ Исус им одговори: „Јас ви кажав, но вие не верувате. Делата^[e], што ги вршам во името на Мојот небесен Татко, покажуваат кој сум Јас. ²⁶ И покрај тоа, вие не верувате, зашто не сте од Моите овци^[f]. ²⁷ Моите овци го познаваат Мојот глас. Јас ги познавам, а тие Ме следат. ²⁸ Јас им давам вечен живот и тие никогаш нема да згинат. Никој не може да ги грабне од Мојата рака. ²⁹ Мојот Татко, Кој Ми ги даде, е посилен од сите^[g]. Никој не може да ги грабне од раката на Мојот Татко. ³⁰ Јас и небесниот Татко сме едно.“

³¹ Еврејските верски водачи повторно грабнаа камења, за да Го каменуваат. ³² Исус им рече: „По упатство на Мојот небесен Татко направив многу добри дела со кои им помогнав на луѓето. Поради кое од тие добри дела Ме каменувате?“

³³ Еврејските водачи Му одговорија: „Не Те каменуваме поради добрите дела, туку поради богохулство, зашто, иако си човек, се правиш Бог!“

³⁴ Исус им одговори: „Зар не е запишано во вашиот Закон^[h] дека Бог вели за народните водачи: ,Јас реков, богови^[i] сте‘? ³⁵ Ако Бог ги нарече богови оние на кои им беше дадена Божјата порака (а знаеме дека тоа што го вели Светото Писмо е секогаш точно), ³⁶ како, тогаш, вие велите за Оној што Таткото Го освети и испрати во светот, дека хули на Бога, затоа што рекол ,Јас сум Божјиот Син‘? ³⁷ Ако Јас не го правам истото она што го прави и Мојот небесен Татко, тогаш немојте да Ми верувате. ³⁸ Но, ако го правам истото, тогаш, дури и да не Ми верувате Мене, верувајте им на делата, за да сфатите^[j] еднаш засекогаш дека Таткото е во Мене и Јас сум во Таткото!“ ³⁹ Тогаш тие уште еднаш се обидоа да Го уапсат, но Тој им се истргна од рацете и си замина.

⁴⁰ Потоа Исус повторно отиде од другата страна на реката Јордан, на местото каде што Јован Крстител во почетокот крштаваше, и таму остана. ⁴¹ Многумина доаѓаа кај Него и велеа: „Јован не направи ниту едно чудо, но се што рече Јован за овој човек беше вистина.“ ⁴² И голем број луѓе таму поверуваа во Исус.